రాజధాని అమరావతికి ప్రపంచ బ్యాంకు, ఏడీబీ రుణం

కేంద్ర ప్రభుత్వం ఇటీవల ప్రవేశపెట్టిన వార్షిక బడ్జెట్‌లో ప్రతిపాదించిన మేరకు... రాజధాని అమరావతి నిర్మాణానికి తొలి విడతలోనే రూ.15 వేల కోట్ల రుణం ఇచ్చేందుకు ప్రపంచబ్యాంకు సుముఖత వ్యక్తం చేసినట్టు తెలుస్తోంది. ఈ మొత్తాన్ని ఆసియా అభివృద్ధి బ్యాంక్‌ (ఏడీబీ)తో కలసి ఆ మొత్తాన్ని ప్రపంచ బ్యాంకు మంజూరు చేయనుంది. దీంతో పాటు భవిష్యత్తులో మరింత ఆర్థికసాయం అందించే అంశంపైనా చర్చిస్తున్నట్టు సమాచారం. ఈ నేపథ్యంలో ప్రపంచబ్యాంకు, ఏడీబీలకు చెందిన ప్రతినిధుల బృందం ఆగస్టు 19 నుంచి 27 వరకు రాజధానిలో విస్తృతంగా పర్యటించనుంది.

రుణ మంజూరుకు సంబంధించిన వివిధ అంశాలపై రాష్ట్ర ప్రభుత్వం, సీఆర్‌డీఏ అధికారులతో చర్చించనుంది. ఇటీవల అమరావతిలో పర్యటించిన నలుగురు సభ్యుల ప్రపంచ బ్యాంకు బృందం.. ముఖ్యమంత్రి చంద్రబాబుతోనూ సమావేశమైన విషయం తెలిసింది. వాస్తవానికి 2019కి ముందే రాజధాని నిర్మాణానికి ప్రపంచబ్యాంకు రుణం ఇవ్వడానికి సిద్దమైంది. ఏఐఐబీతో కలిసి తొలి విడతలో రూ.3,500 కోట్లు రుణం ఇచ్చేందుకు సముఖత వ్యక్తం చేసింది. ఇందుకు అవసరమైన ప్రక్రియ సైతం పూర్తయ్యింది.

కానీ, అంతలోనే ప్రభుత్వం మారడం వల్ల అమరావతికి రుణం అవసరం లేదని నాటి ఏపీ ముఖ్యమంత్రి వైఎస్ జగన్మోహన్ రెడ్డి కేంద్రానికి చెప్పారు. దీంతో ఆ రుణ ఆ ప్రక్రియ నిలిచిపోయింది. తాజాగా, కూటమి ప్రభుత్వం ఏర్పడటంతో మళ్లీ అమరావతి నిర్మాణంలో కదలిక వచ్చింది. రాజధాని నిర్మాణాన్ని వేగంగా పట్టాలెక్కించే ప్రక్రియలో భాగంగా కేంద్ర ప్రభుత్వాన్ని చంద్రబాబు సర్కారు సాయం కోరింది. దీనికి కేంద్రం సానుకూలంగా స్పందించింది. ప్రస్తుత ఆర్థిక సంవత్సరంలోనే విదేశీ ఆర్థిక సంస్థల ద్వారా రూ.15 వేల కోట్ల సాయం అందజేసేందుకు ఆమోదం తెలిపి, బడ్జెట్‌లో ప్రతిపాదించింది.

ఈ ప్రక్రియ వేగంగా ముందుకెళ్లడంతో కేంద్రం సూచన మేరకే ఏడీబీతో కలిసి ప్రపంచ బ్యాంకు అమరావతికి రుణం ఇచ్చేందుకు ముందుకు వచ్చింది. రుణం మంజూరుకు అవసరమైన కార్యాచరణ చాలా వరకు 2019కి ముందే పూర్తవడంతో, ఇప్పుడు మిగిలి ప్రక్రియను పూర్తిచేసి, వీలైనంత త్వరగా మంజూరు చేసే అవకాశమున్నట్టు సమాచారం.

కాగా, రాజధానిలో ప్రాజెక్టుల వారీగా ఎంత మేర రుణం ఇవ్వగలుగుతామన్నది ప్రపంచ బ్యాంకు ఏడీబీ ప్రతినిధుల బృందం నిర్ణయించనుంది. దీంతో ఆ బృందానికి సవివర నివేదికలను అందించేందుకు సీఆర్‌డీఏ కమిషనర్‌ భాస్కర్‌ కొద్ది రోజులుగా వివిధ శాఖల అధికారులతో కీలక సమీక్షలు నిర్వహిస్తున్నారు. అమరావతిలో శాశ్వత ప్రభుత్వ కాంప్లెక్స్‌లో భాగంగా నిర్మించే సచివాలయ టవర్లు, హైకోర్టు, ఎమ్మెల్యే, ఎమ్మెల్సీ, ఐఏఎస్‌, ఎన్‌జీఓ, సెక్రటరీలు, జడ్జీల భవనాలు, ప్రభుత్వ టైప్‌ - 1, టైప్‌ - 2 భవనాలు, ఎల్‌పీఎస్‌ ఇన్ర్ఫా, ట్రంక్‌ ఇన్ర్ఫా, రాజధాని సంబంధిత ప్రాజెక్టులు, ప్రతిపాదిత ప్రాజెక్టులన్నింటిపైనా సమగ్ర సమాచారాన్ని ఆయా విభాగాలు సిద్ధం చేసేలా నిర్దేశించారు.