టీటీడీ కొత్త విధానంతో ఆ సమస్యకు చెక్.. నిశ్చింతగా దర్శనం

కలియుగ ప్రత్యక్ష దైవం తిరుమల శ్రీవారిని నిత్యం వేలాది మంది భక్తులు దర్శించుకుంటూ ఉంటారు. ఎక్కడెక్కడి నుంచో శ్రీవారి దర్శనం కోసం ఎన్నో కష్టాలు పడి తిరుమలకు చేరుకుంటూ ఉంటారు. ఇక తిరుమలకు చేరుకున్న తర్వాత కొంతమంది ఉండటానికి గదులు తీసుకుంటే.. మరికొంత మంది లాకర్లలో తమ సామాగ్రి భద్రపరుచుకుంటూ ఉంటారు. అయితే ఎన్ని లాకర్లు, ఎన్ని గదులు అందుబాటులో ఉన్నాయనే సంగతి తెలియక అప్పుడప్పుడూ ఇబ్బంది పడుతుంటారు. శ్రీవారి భక్తులకు ఎదురయ్యే ఈ ఇబ్బందులను దృష్టిలో ఉంచుకుని టీటీడీ కీలక నిర్ణయం తీసుకుంది. తిరుమల శ్రీవారి భక్తుల సౌకర్యం కోసం ఎన్ని లాకర్లు అందుబాటులో ఉన్నాయనే విషయాన్ని ఎప్పటికప్పుడు ఎలక్ట్రానిక్ డిస్‌ప్లే బోర్డులు, ఇన్ఫర్‌మేషన్ కియోస్క్‌ల మీద ప్రదర్శించాలని నిర్ణయం తీసుకుంది.

ఈ మేరకు తిరుమలలోని సప్తగిరి సత్రాలు, సీఆర్వో కార్యాలయాన్ని టీటీడీ ఈవో శ్యామలరావు, అదనపు ఈవో వెంకయ్య చౌదరి పరిశీలించారు. సెంట్రల్ రిసెప్షన్ కార్యాలయాన్ని సందర్శించిన వీరు.. భక్తులకు గదుల కేటాయింపు ప్రక్రియను పరిశీలించారు. అనంతరం శ్రీవారి దర్శనానికి వచ్చిన కర్ణాటక సహా పొరుగు రాష్ట్రాల భక్తులతో మాట్లాడారు. ఎలక్ట్రానిక్ డిస్‌ప్లేలు, ఇన్ఫర్మేషన్ కియోస్క్‌లను పరిశీలించారు. అనంతరం పిఎసిలలో యాత్రికులకి లాకర్లు ఎన్ని అందుబాటులో ఉన్నాయనే విషయం అనౌన్స్‌మెంట్లు చేయాలని, అందుబాటులో ఉన్న వాటిని భక్తులకు కేటాయించాలని అధికారులను ఆదేశించారు.

అలాగే సప్తగిరి సత్రాలు వద్ద గదులను పరిశీలించిన టీటీడీ ఈవో, అదనపు ఈవో.. కారిడార్లు, బాత్‌రూమ్‌లలో పరిశుభ్రత, స్విచ్‌బోర్డులు, జలప్రసాదం, పరుపులు, మంచాలు, బెడ్‌షీట్లను తనిఖీ చేశారు. గదులను పరిశుభ్రంగా ఉంచాలని సిబ్బందికి స్పష్టం చేశారు. అలాగే గదులను ఆధునీకరించేందుకు వెంటనే చర్యలు చేపట్టాలని అధికారులను ఆదేశించారు. పరిసరాలను పరిశుభ్రంగా ఉంచాలని, డీప్‌క్లీనింగ్‌ చేపట్టాలని ఈవో స్పష్టం చేశారు. తరువాత యాత్రికులతో మాట్లాడి కౌంటర్ల వద్ద గదుల కేటాయింపు ప్రక్రియను పరిశీలించారు. ఈ కార్యక్రమంలో టీటీడీ ఈవో, అదనపు ఈవోలతో పాటుగా పలువురు అధికారులు పాల్గొన్నారు.