తిరుమలలో వారందరికీ టీటీడీ లాస్ట్ వార్నింగ్.. దొరికితే కఠిన చర్యలే.

కలియుగ ప్రత్యక్ష దైవం ఆ ఏడుకొండలవాడు కొలువైన తిరుమలలో అసాంఘిక కార్యక్రమాలు చోటుచేసుకుంటున్న ఘటనలు అప్పుడప్పుడూ వెలుగులోకి వస్తూనే ఉన్నాయి. తాజాగా కొంతమంది యువకులు రోడ్డుపై వీరంగం సృష్టించిన వీడియోలు సోషల్ మీడియాలో వైరల్ అవుతున్నాయి. నందకం అతిథి గృహం వద్ద తాగి మద్యం మత్తులో రోడ్డుపై హల్ చల్ చేస్తున్న దృశ్యాలు నెట్టింట చక్కర్లు కొడుతున్నాయి. ఇక మద్యం మత్తులో బీర్ బాటిళ్లతో దాడి చేసుకునేవరకూ ఈ పరిస్థితి వెళ్లింది. ఈ నేపథ్యంలో తిరుమల కొండపై ప్రక్షాళనకు నడుం బిగించిన టీటీడీ.. కీలక చర్యలు ప్రారంభించింది. ఇటీవల జరిగిన ఘటన ఎఫెక్ట్‌తో టీటీడీ విజిలెన్స్ అధికారులు రంగంలోకి దిగారు.

టీటీడీ సివిఎస్‌వో శ్రీధర్‌ ఆదేశాల మేరకు టీటీడీ విజిలెన్స్‌, భద్రతా సిబ్బంది, స్థానిక పోలీసులతో కలిసి ఆదివారం తిరుమలలోని బాలాజీ నగర్‌‌లో తనిఖీలు నిర్వహించారు. బాలాజీ నగర్ వెనుకభాగంలో ఉన్న కార్మికుల నివాసాలపై దాడులు జరిపారు. గతంలో తిరుమల కొండపై నిర్మాణ పనుల కోసం వచ్చిన కూలీలు, కార్మికులు.. బాలాజీ నగర్ వెనుక వైపున షెడ్లు నిర్మించుకున్నారు. అందులోనే ఉంటూ వచ్చారు. అయితే పనులు పూర్తై, కాంట్రాక్టర్ వెళ్లిపోయినప్పటికీ చాలా మంది అలాగే అక్కడే ఉంటున్నట్లు టీటీడీ విజిలెన్స్ సిబ్బంది గుర్తించారు. సుమారు 70 మంది వరకూ కూలీలు, కార్మికులు కొండపైనే ఉన్నట్లు గుర్తించారు. ఇందులో కొంతమంది అనధికార వ్యక్తులు కూడా ఉన్నట్లు తేలింది.

ఈ నేపథ్యంలో తిరుమల భద్రతను దృష్టిలో ఉంచుకుని టీటీడీ విజిలెన్స్ అధికారులు, పోలీసులు కలిపి ఆదివారం ఉదయం పది నుంచి 12 గంటల వరకూ జాయింట్ ఆపరేషన్ నిర్వహించారు. కార్మికులను గుర్తించేందుకు వీరి జాబితాను ఇంజినీరింగ్ విభాగానికి పంపారు. అనంతరరం తిరుమల కొండపైకి అనధికారికంగా ప్రవేశించే వారిని అడ్డుకునేందుకు ఈ తరహా దాడులు చేయాలని టీటీడీ నిర్ణయించింది. ఇకపై ఇలాంటి దాడులు జరుగుతూ ఉంటాయన్న టీటీడీ.. తిరుమలలో అనధికారికంగా ఉంటున్న వ్యక్తులు, ధ్రువీకరణ పత్రాలు లేనివారిపై చట్టపరమైన చర్యలు తీసుకుంటామని హెచ్చరించింది.