అగ్గిపుల్లే కదాని విసిరాడు.. క్షణాల్లో బీభత్సం

అనంతపురం జిల్లా కళ్యాణదుర్గంలో ఓ వ్యక్తి చేసిన చిన్న తప్పు కొద్దిసేపు అందర్నీ టెన్షన్ పెట్టించింది. చిన్న అగ్గి పుల్లతో అందర్నీ పరుగులు పెట్టించాడు. పట్టణంలోని పాత బస్టాండ్ దగ్గర ఉన్న పెట్రోల్ బంక్ నుంచి ఓ వ్యక్తి క్యాన్‌లో ఐదు లీటర్ల పెట్రోల్ ఫిల్ చేయించుకుని తీసుకొచ్చాడు. అక్కడి నుంచి వచ్చి మార్గ మధ్యలో ఓ షాపు దగ్గర పని ఉందని ఆగాడు.. అక్కడ రోడ్డు పక్కన బైక్ పార్క్ చేశాడు. మనోడు పని చూసుకోవడానికి షాపులోకి వెళ్లాడు.. ఇంతలో క్యాన్ పగిలిపోవడంతో పెట్రోల్ లీక్ అయ్యింది. అలా పెట్రోల్ రోడ్డుపై పడిపోయింది.

ఇంతలో ఓ వ్యక్తి ఆ పక్కనే షాపు దగ్గర నిలబడిన వ్యక్తి జేబులోని బీడీ బయటకు తీశాడు.. అగ్గి పుల్ల గీసి బీడీ వెలగించాడు. ఆ తర్వాత ఆ అగ్గిపుల్లను కిందపడేశాడు. దీంతో పెట్రోల్‌పై పడి ఒక్కసారిగా మంటలు చెలరేగగా.. అక్కడే ఉన్న ఇద్దరు వ్యక్తులు భయంతో పరుగులు తీశారు. ఆ మంటలు పక్కనే ఉన్న బైక్‌కు అంటుకోగా.. ఓ వ్యక్తి దానిని పక్కకు లాగి మంటల్ని ఆర్పేశాడు. అలాగే షాపులు, బైక్‌లకు మంటలు అంటుకోగా.. వెంటనే అప్రమత్తంమైన షాపుల యజమానులు నీళ్లు చల్లి మంటల్ని ఆర్పేశారు. ఓ వ్యక్తి చేసిన చిన్న తప్పుకు అందరూ టెన్షన్ పడ్డారు. పెద్ద ప్రమాదం నుంచి బయటపడ్డామని ఊపిరి పీల్చుకున్నారు. అతడు బీడీ వెలిగించి అగ్గి పుల్ల విసిరేయడం.. ఆ తర్వాత మంటలు చెలరేగడం.. పక్కనే ఉన్న సీసీ కెమెరాలో రికార్డయ్యాయి.

కళ్యాణదుర్గంలో మహిళా సంఘాల సభ్యులు ధర్నాకు దిగారు. వెలుగు, బ్యాంకు అధికారులు ఓ ప్రైవేట్‌ వ్యక్తితో కుమ్మక్కై తమ సంఘాల ఉమ్మడి ఖాతాల్లోని రూ.లక్షలు స్వాహా చేశారని ఆరోపిస్తున్నారు. స్థానికంగా ఉన్న కెనరా బ్యాంకుకు తలుపులు వేసి రోడ్డుపై బైఠాయించారు. మల్లికార్జునపల్లిలో 21 మహిళా సంఘాలు ఉండగా.. ఆ సంఘాల సభ్యులకు తెలియకుండా గ్రామ యానిమేటరు భర్త, బ్యాంకు మేనేజరు, వెలుగు అధికారులు కుమ్మక్కై రుణాలు, బ్యాంకు చెల్లించాల్సిన మొత్తాన్ని నొక్కేశారని మహిళలు ఆరోపించారు. గత నెలలో కలెక్టర్, ఉన్నతాధికారులు విచారణ చేయించగా రూ.75 లక్షలు మాయం చేసినట్లు తేలిందన్నారు.