పిన్నెల్లికి.. ఏపీ హైకోర్టు బెయిల్.. కండీషన్స్ అప్లై

మాచర్ల మాజీ ఎమ్మెల్యే, వైసీపీ నేత పిన్నెల్లి రామకృష్ణారెడ్డికి బెయిల్ మంజూరైంది. పిన్నెల్లి బెయిల్ పిటిషన్ మీద విచారించిన ఏపీ హైకోర్టు.. ఆయనకు బెయిల్ మంజూరు చేసింది. ఎన్నికల సమయంలో నమోదైన ఈవీఎం ధ్వంసం కేసు సహా మరో రెండు కేసుల్లో పిన్నెల్లి రామకృష్ణారెడ్డికి ఆంధ్రప్రదేశ్ హైకోర్టు బెయిల్ మంజూరు చేసింది. అయితే పలు షరతులు విధించింది. పాసుపోర్టును అప్పగించాలంటూ షరతులతో కూడిన బెయిల్ మంజూరు చేసింది. జూన్ 26 నుంచి నెల్లూరు జైలులో పిన్నెల్లి రామకృష్ణారెడ్డి రిమాండ్ ఖైదీగా ఉన్నారు. బెయిల్ మంజూరు కావటంతో కోర్టు ఉత్తర్వులు అందిన వెంటనే ఆయన విడుదలయ్యే అవకాశాలు ఉన్నాయి.

మరోవైపు సుమారు రెండు నెలలుగా నెల్లూరు జైలులో ఉన్న పిన్నెల్లి రామకృష్ణారెడ్డి.. జిల్లా కోర్టులోనూ ఒకట్రెండుసార్లు బెయిల్ పిటిషన్లు దాఖలు చేశారు. అయితే జిల్లా కోర్టును వాటిని కొట్టివేసింది. 2024 సార్వత్రిక ఎన్నికల సమయంలో మాచర్ల అసెంబ్లీ నియోజకవర్గం నుంచి వైసీపీ తరుఫున పోటీ చేశారు పిన్నెల్లి రామకృష్ణారెడ్డి. అయితే పోలింగ్ సందర్భంగా పాల్వాయి గేట్ సమీపంలోని పోలింగ్ కేంద్రంలోకి ప్రవేశించి.. ఈవీఎం ధ్వంసం చేశారని పిన్నెల్లి రామకృష్ణారెడ్డి మీద ఆరోపణలు ఉన్నాయి. దీనికి సంబంధించిన వీడియో కూడా సోషల్ మీడియాలో వైరల్ అయ్యింది. అలాగే టీడీపీ తరుఫున ఏజెంట్‌గా ఉన్న నంబూరి శేషగిరిరావు అనే వ్యక్తిపైనా దాడి చేశారనే ఆరోపణలు ఉన్నాయి. వీటితో పాటుగా కారంపూడి సీఐ నారాయణస్వామిపై దాడి చేశారనే ఆరోపణలు వచ్చాయి. ఈ నేపథ్యంలో ఈ ఘటనలపై కేసులు నమోదు చేసిన పోలీసులు జూన్‌లో పిన్నెల్లి రామకృష్ణారెడ్డిని అరెస్ట్ చేశారు. ఆ తర్వాత కోర్టు ఆదేశాలతో నెల్లూరు జైలుకు తరలించారు.

ఇక జూన్ 26 నుంచి నెల్లూరు జైలులో ఉన్న పిన్నెల్లి రామకృష్ణారెడ్డి బెయిల్ కోసం అటు జిల్లా కోర్టును, ఇటు హైకోర్టులోనూ బెయిల్ పిటిషన్లు దాఖలు చేశారు. అయితే పిన్నెల్లికి ఉన్న నేరచరిత్రను గమనించి.. ఆయనకు బెయిల్ ఇవ్వొద్దంటూ ప్రభుత్వం వాదనలు వినిపిస్తూ వచ్చింది. ఈ నేపథ్యంలోనే జిల్లా కోర్టు రెండుసార్లు పిన్నెల్లి రామకృష్ణారెడ్డి బెయిల్ పిటిషన్లను కొట్టివేసింది. అయితే హైకోర్టులో పిన్నెల్లి బెయిల్ పిటిషన్ మీద వాదనలు కొనసాగాయి. చివరకు ఇరు పక్షాల వాదనలు విన్న హైకోర్టు.. పిన్నెల్లికి షరతులతో కూడిన బెయిల్ మంజూరు చేస్తూ నిర్ణయం తీసుకుంది. అలాగే పాస్‌పోర్టు అప్పగించాలని ఆదేశించింది.