వైసీపీని వీడబోతున్నారనే ప్రచారంపై,,,,మాజీ మంత్రి రోజా క్లారిటీ

గ్రేటర్ హైదరాబాద్ పరిధిలోని అక్రమ కట్టడాలపై హైడ్రా (హైదరాబాద్ డిజాస్టర్ రెస్పాన్స్ అండ్ అసెట్ మానిటరింగ్ అండ్ ప్రొటెక్షన్) ఉక్కుపాదం మోపుతోంది. అక్రమార్కులు, కబ్జాకోరులకు కంటిమీద కునుకు లేకుండా చేస్తోంది. చెరువులు, కుంటలు, నాలాల ఆక్రమణలకు పాల్పడి నిర్మించిన కట్టడాలను కూల్చేస్తోంది. సామాన్యుల నుంచి సెలబ్రెటీల వరకు ఎవరూ అక్రమ నిర్మాణాలు చేపట్టిన బుల్డోజర్లతో నేలమట్టం చేస్తోంది. అక్రమ కట్టడాలపై సీఎం రేవంత్ కఠినంగా వ్యవహరిస్తుండటంతో హైడ్రా అధికారులు కూడా ఎక్కడా తగ్గకుండూ కూల్చివేతలు చేపడుతున్నారు.

ఇక చెరువులు, కుంటలు, బఫర్‌ జోన్లు, ప్రభుత్వ స్థలాల్లో నిర్మాణాలకు అనుమతులు ఇచ్చిన అధికారులకు కూడా హైడ్రా చెమటలు పట్టిస్తోంది. గతంలో నిషేదిత స్థలాల్లో నిర్మాణాలకు అనుమతులిచ్చిన అధికారులపై చర్యలు తీసుకునేందుకు ఇప్పటికే హైడ్రా కమిషనర్ సైబరాబాద్ కమిషనర్‌కు ఫిర్యాదు చేయగా.. పోలీసులు యాక్షన్‌లోకి దిగారు. హెచ్ఎండీఏ పరిధిలో అక్రమ నిర్మాణాలకు యథేచ్ఛగా పర్మిషన్లు ఇచ్చిన అధికారులపై క్రిమినల్ కేసులు నమోదు చేస్తున్నారు. తాజాగా.. నగర పోలీసులు ఆరుగురు అధికారులపై క్రిమినల్ కేసులు నమోదు చేశారు. సైబరాబాద్ ఈఓడబ్ల్యూ వింగ్‌లో కేసులు నమోదు చేసినట్లు సీపీ అవినాష్‌ వెల్లడించారు.

నిజాంపేట మున్సిపల్ కమిషనర్ రామకృష్ణ, చందానగర్ జీహెచ్ఎంసీ డిప్యూటీ కమిషనర్ సుదామ్ష్‌, బాచుపల్లి ఎమ్మార్వో పూల్‌ సింగ్‌, మేడ్చల్- మల్కాజ్‌గిరి ల్యాండ్ రికార్డ్స్‌ అసిస్టెంట్ డైరెక్టర్ శ్రీనివాసులు, హెచ్ఎండీఏ అసిస్టెంట్ ప్లానింగ్ ఆఫీసర్ సుధీర్‌ కుమార్‌, హెచ్ఎండీఏ సిటీ ప్లానర్‌ రాజ్‌ కుమార్‌ల పోలీసులు తాజాగా క్రిమినల్ కేసులు నమోదు చేశారు. హైడ్రా సిఫార్సుల మేరకు ఆరుగురు అధికారులపై క్రిమినల్ కేసులు నమోదు చేసినట్లు పోలీసులు వెల్లడించారు. ఎఫ్టీఎల్లో అనుమతులు ఇచ్చిన అధికారులపై చర్యలు ఉంటాయని పోలీసులు తీవ్ర హెచ్చరికలు జారీ చేశారు.

నేడు కూడా హైడ్రా కూల్చివేతలు కొనసాగుతున్నాయి. ఇవాళ ఉదయం నగర పరిధిలోని గగన్‌పహాడ్ ప్రాంతంలో హైడ్రా కూల్చివేతలను ప్రారంభించింది. అప్పా చెరువుకు అక్రమించి ఎఫ్టీఎల్, బఫర్‌ జోన్లలో నిర్మించిన అక్రమ కట్టడాలను భారీ బందోబస్తు నడుమ హైడ్రా సిబ్బంది బుల్డోజర్లతో నేలమట్టం చేస్తున్నారు.