సెప్టెంబర్ 7న మద్యం షాపులు బంద్

ఏపీలో మందబాబులకు బ్యాడ్‌న్యూస్.. వచ్చే నెలలో వైన్ షాపులు బంద్ కాబోతున్నాయి. సెప్టెంబరు 7 నుంచి మద్యం షాపులు బంద్‌ చేయాలని నిర్ణయించినట్లు ఏపీ బేవరేజెస్‌ కార్పొరేషన్‌ కాంట్రాక్టు, అవుట్‌ సోర్సింగ్‌ ఉద్యోగుల సంక్షేమ సంఘం తెలిపింది. ఉద్యోగ భద్రత కల్పించాలనే డిమాండ్‌‌తో బంద్‌కు పిలుపునిచ్చినట్లు తెలిపారు. గత ప్రభుత్వ హయాంలో ఇంటర్వ్యూల ద్వారా తమను ఎంపిక చేశారని గుర్తు చేశారు ఉద్యోగులు. ఇప్పుడు తాము ఉద్యోగాలు కోల్పోయే పరిస్థితి వచ్చిందని.. ఉద్యోగ భద్రత కల్పించే విషయంలో ప్రభుత్వం స్పందించే వరకు బంద్‌ కొనసాగిస్తామన్నారు.

ఈ మేరకు తమకు న్యాయం చేయాలని ఉద్యోగుల సంఘం నేతలు ముఖ్యమంత్రి చంద్రబాబుకు లేఖ రాశారు. ప్రైవేటు మద్యం షాపుల పాలసీ వస్తే.. రాష్ట్రవ్యాప్తంగా 15 వేల మంది ఉద్యోగులు రోడ్డున పడే పరిస్థితి వస్తుందన్నారు. మద్యం షాపుల్లో కాకపోయినా.. తమకు ప్రత్యామ్నాయ మార్గాల్లో ఉద్యోగ భద్రత కల్పించాలని కోరారు. సెప్టెంబర్ 4 నుంచి నిరసన కార్యక్రమాలు చేపడుతున్నామని.. తాము ప్రభుత్వానికి వ్యతిరేకం కాదని, కేవలం ఉపాధి కల్పించాలనేది తమ డిమాండ్ అంటున్నారు.

ఏపీ ప్రభుత్వం కొత్త మద్యం పాలసీని తీసుకురావాలని భావిస్తోంది. ఆ దిశగా నూతన మద్యం పాలసీ ఎలా ఉండాలని అధ్యయనం చేసేందుకు మంత్రులు కొల్లు రవీంద్ర, నాదెండ్ల మనోహర్, సత్యకుమార్, గొట్టిపాటి రవి, కొండపల్లి శ్రీనివాస్‌తో ఓ కమిటీని ఏర్పాటు చేసిన సంగతి తెలిసిందే. ఈ కమిటీ వివిధ రాష్ట్రాల మద్యం పాలసీలను పరిశీలించి.. ఆ తర్వాత కొత్త మద్యం పాలసీని ప్రకటించనున్నారు. అయితే ప్రాథమికంగా అందతున్న సమాచారం మేవరకు.. తెలంగాణలో అమలవుతున్న మద్యం పాలసీకి కొన్ని మార్పులు చేసి ఏపీలో అమలు చేయాలనే ఆలోచన ఉన్నట్లు ప్రచారం జరుగుతోంది. అక్టోబర్ 1 నుంచి కొత్త పాలసీని అమలు చేయాలని భావిస్తున్నారట.

తెలంగాణ పాలసీని అమలు చేస్తే.. తమ ఉద్యోగాలు పోతాయని మద్యం షాపుల్లో పనిచేసే ఉద్యోగులు ఆందోళనలో ఉన్నారు. ప్రస్తుతం ప్రభుత్వం ఆధ్వర్యంలో నడుస్తున్న మద్యం షాపుల స్థానంలో ప్రైవేట్ మద్యం షాపులు ఏర్పాటు చేస్తే.. తమకు ఇబ్బందులు తప్పవని ఆందోళన వ్యక్తం చేస్తున్నారు. అందుకే తమ ఉద్యోగాల సంగతి తేల్చాలని కోరుతున్నారు. అంతేకాదు గత ప్రభుత్వ హయాంలో తమకు జీతాలు కూడా సరిగా ఇవ్వలేదని.. తమకు రావల్సిన పీఎఫ్, ఓటీ, ఇఎస్ఐల డబ్బును కూడా ఏజెన్సీలు చెల్లించలేదన్నారు. ఇప్పుడు తమను ఉద్యోగాల నుంచి తొలగిస్తే.. తమ కుటుంబాలు రోడ్డున పడతాయని ఆవేదన వ్యక్తం చేస్తున్నారు. మరి మద్యం షాపుల ఉద్యోగుల డిమాండ్లు.. షాపులు బంద్ చేయడంపై ప్రభుత్వం ఎలా స్పందిస్తుంది అన్నది చూడాలి.