చంద్రబాబుకు సెప్టెంబర్ 1 మర్చిపోలేని రోజు,,,రాష్ట్రవ్యాప్తంగా తెలుగు దేశం పార్టీ సంబరాలు

సెప్టెంబర్ 1.. ఆంధ్రప్రదేశ్ ముఖ్యమంత్రి నారా చంద్రబాబునాయుడుకి జీవింతలో మరపురాని రోజు. 1995లో ఆయన ఇదే రోజు (సెప్టెంబర్ 1)న ఉమ్మడి ఆంధ్రప్రదేశ్‌కు మొదటి సారి ముఖ్యమంత్రి అయ్యారు. 1995 సెప్టెంబర్ 1న కొన్ని ప్రత్యేక పరిస్థితుల్లో ఆయన సీఎం అయ్యారు.. అలాగే ఉమ్మడి రాష్ట్రంలో కూడా ఎక్కువ కాలం ముఖ్యమంత్రిగా బాధ్యతలు చేపట్టిన వ్యక్తిగా కూడా నిలిచారు. అయితే చంద్రబాబు తొలిసారి ముఖ్యమంత్రిగా ప్రమాణస్వీకారం చేసి సెప్టెంబర్ 1తో 30 ఏళ్లు కానుండటంతో.. సమాజానికి ఆయన చేసిన సేవలను ప్రజలకు తెలియజేసేందుకు టీడీపీ రాష్ట్రవ్యాప్తంగా సంబరాలు చేస్తోంది.

ఈ సందర్భంగా మంత్రి టీజీ భరత్, ఎమ్మెల్యే వసంత కృష్ణప్రసాద్, ఎమ్మెల్సీ అశోక్‌బాబు, టీడీపీ వికలాంగుల సంక్షేమ సంఘం అధ్యక్షుడు గోనుగుంట్ల కోటేశ్వరరావు వివరాలను వెల్లడించారు. నారా చంద్రబాబు మొదటిసారి ఉమ్మడి రాష్ట్ర ముఖ్యమంత్రి పదవి చేపట్టి సెప్టెంబరు 1కి 30 ఏళ్లవుతున్నాయన్నారు. ఈ సందర్భంగా రాష్ట్రవ్యాప్తంగా సంబరాలు నిర్వహిస్తున్నట్లు తెలిపారు. చంద్రబాబు ముఖ్యమంత్రి కావడం రాష్ట్ర చరిత్రలోనే గొప్ప మలుపు అన్నారు. ఉమ్మడి రాష్ట్రంలో, విభజన తర్వాత ఆంధ్రప్రదేశ్‌లో ఆయన చేపట్టిన సంక్షేమ కార్యక్రమాలు, తీసుకున్న నిర్ణయాలు ఇప్పటికీ ప్రజల మనస్సులో చెరగి ముద్ర వేశాయన్నారు. చంద్రబాబు విజన్‌-2020 ప్రణాళికను ఎగతాళి చేశారని, కానీ ఇప్పుడదే నిజమై కళ్ల ముందు కనిపిస్తోందన్నారు. అయితే రెండు రోజుల క్రితం జరిగిన కేబినెట్ భేటీలో ఈ అంశం చర్చకు రాగా.. మంత్రులు అందరూ చంద్రబాబుకు ముందుగానే శుభాకాంక్షలు తెలిపారు.

మరోవైపు ముఖ్యమంత్రి చంద్రబాబు కర్నూలు జిల్లా పర్యటిస్తారు. సెప్టెంబర్ మాసానికి సంబంధించిన ఎన్టీఆర్‌ భరోసా పింఛన్లు ఒక రోజు ముందుగానే.. ఇవాళ పంపిణీ చేస్తోంది. ఈ క్రమంలోనే తెల్లవారుజామునే పలు ప్రాంతాల్లో పించన్ల పంపిణీ కొనసాగుతోంది. వాస్తవానికి సెప్టెంబర్ 1న పింఛన్లు పంపిణీ చేయాలి.. కానీ ఆ రోజు ఆదివారం కావడం.. ప్రభుత్వ ఉద్యోగులకు సెలవు దినం కావడంతో ముఖ్యమంత్రి చంద్రబాబు కీలక నిర్ణయం తీసుకున్నారు. ఉద్యోగుల సెలవుకు ఇబ్బంది లేకుండా.. పింఛన్లు తీసుకునేవారికి మరో రోజు ఆలస్యం కాకుండా.. ఒకరోజు ముందుగానే అందజేస్తున్నారు.

ముఖ్యమంత్రి చంద్రబాబు కర్నూలు జిల్లా మండల కేంద్రం ఓర్వకల్లులో పర్యటిస్తారు. శనివారం మధ్యాహ్నం 2 గంటల కు సీఎం ఓర్వకల్లు విమానాశ్రయానికి చేరుకుంటారు. అక్కడినుంచి రోడ్డు మార్గంలో పించన్ల పంపిణీ గ్రామ సభా వేదిక దగ్గరకు చేరుకుంటారు. అక్కడే ఆయన స్వయంగా ఓర్వకల్లులో లబ్ధిదారులకు నేరుగా పింఛన్లను అందజేస్తారు. గ్రామంలో రచ్చకట్ట వేదికగా గ్రామ సభ నిర్వహిస్తారు. అక్కడి నుంచి ఓర్వకల్లు ఎయిర్‌పోర్టుకు చేరుకుని.. నేరుగా హైదరాబాద్ వెళ్లనున్నారు.