జాక్‌పాట్ కొట్టిన కడప యువతి.. రూ.1.70 కోట్ల ప్యాకేజీతో అమెజాన్‌లో ఉద్యోగం

కృషితో నాస్తి దుర్భిక్షం అన్నారు పెద్దలు. ప్రయత్నం చేస్తే సాధ్యం కానిది ఏదీ లేదని నిరూపించింది ఓ అమ్మాయి. నేటి కాలంలో ఉద్యోగం సంపాదించాలంటే తలకు మించిన భారంగా భావిస్తోన్న నిరుద్యోగులకు రోల్ మోడల్‌గా నిలిచింది ఓ యువతి. తన తొలి ప్రయత్నంలో కళ్లుచెదిరే ప్యాకేజీతో ప్రముఖ అంతర్జాతీయ సంస్థలో ఉద్యోగం సాధించింది కడప నగరానికి చెందిన ఎర్రనాగుల అమృతవల్లి. వేలు లక్షలు కాదు ఏకంగా ఆమెకు వార్షిక వేతనం రూ.1.70 కోట్లతో అమెరికాకు చెందిన కంపెనీ ఉద్యోగం ఆఫర్ చేసింది. సాధారణ ఓ మధ్య తరగతి కుటుంబానికి చెందిన ఆమె.. విజయవాడలోని ఓ ప్రైవేటు కాలేజీలో ఇంటర్మీడియట్‌ పూర్తి చేసింది.

అనంతరం ఇంజినీరింగ్ కోర్సుల్లో ప్రవేశాలకు నిర్వహించిన ఐఐటీ జేఈఈ పరీక్షలో ప్రతిభ చూపింది. త్రుటిలో ఐఐటీలో సీటు చేజారినా.. ఎన్ఐటీ దుర్గాపూర్‌‌లో కంప్యూటర్‌ సైన్స్‌ ఇంజినీరింగ్‌‌‌లో చేరింది. అక్కడ బీటెక్ పూర్తి చేసిన తర్వాత... అమృతవల్లిఉన్నత చదువు కోసం అమెరికా వెళ్లింది. యూనివర్శిటీ ఆఫ్‌ ఫ్లోరిడాలో కంప్యూటర్‌ సైన్స్‌ బ్రాంచ్‌‌లో ఎంఎస్‌ పూర్తిచేసింది. డిగ్రీ తీసుకున్న నెల రోజుల్లోనే కొలువు సాధించింది. ప్రముఖ సంస్థ అమెజాన్‌కు ఎంపికయ్యింది. వాషింగ్టన్‌లోని సియాటెల్‌లో అమెజాన్‌ కేంద్ర కార్యాలయంలో సాఫ్ట్‌వేర్‌ డెవలప్‌మెంట్‌ ఇంజినీర్‌గా చేరనున్నారు. తమ కుమార్తెకు భారీ ప్యాకెజీతో ఉద్యోగం రావడంపై ఆమె తల్లిదండ్రులు హర్షం వ్యక్తం చేస్తున్నారు. అమృతవల్లికి ఉపాధ్యాయులు, బంధువులు అభినందనలు తెలియజేశారు. చిన్నప్పటి నుంచి అమృత చదువులో చురుకుగా ఉండేదని అంటున్నారు.

కాగా, ఇటీవల ప్రకాశం జిల్లాకు చెందిన ఓ యువతి కూడా ఏకంగా ఐదు ఐటీ ఉద్యోగాలు సాధించింది. రోజుల వ్యవధిలోనే మొదటిసారి ఎంపికైన ఉద్యోగానికి దాదాపు నాలుగు రెట్లు అధికమైన ప్యాకేజీతో ఐదో ఉద్యోగం సొంతం చేసుకుంది శ్రావణి అనే అమ్మాయి. అద్దంకిలో పదో తరగతి చదివిన శ్రావణి.. ఆ తర్వాత గుంటూరు‌లో ఇంటర్మీడియట్ పూర్తిచేసింది. అనంతరం ఎంసెట్ రాసి ఇంజనీరింగ్ విభాగంలో 6 వేల ర్యాంకు సాధించింది. పెదకాకాని మండలంలోని వీవీఐటీ కాలేజీలో సీఎస్‌సీ బ్రాంచిలో చేరింది.

అక్కడే ఫైనల్‌ ఇయర్ చదువుతున్న సమయంలో జరిగిన క్యాంపస్ ఇంటర్వ్యూలలో యాక్సెంచర్ కంపెనీలో తొలిసారిగా ఉద్యోగం సాధించింది. ఏడాదికి రూ.4.5 లక్షల వేతనంతో ఉద్యోగం సాధించింది. ఆ తర్వాత రూ.5 లక్షలతో ఓడో కంపెనీ, ఐబీఎం సంస్థలో రూ.9 లక్షలతో మరో ఐటీ జాబ్, ఫ్లిప్‌కార్ట్‌ సంస్థలో రూ.11 లక్షలు, చివరగా వాల్‌మార్ట్‌లో రూ.23 లక్షల వార్షిక వేతనంతో ఉద్యోగం సాధించింది.