అనారోగ్యంతో ఆసుపత్రుల్లో చేరిన ఐఐఐటీ విద్యార్థులు,,,విచారణకు త్రిసభ్య కమిటీ వేసిన విద్యా శాఖ మంత్రి

నూజివీడు ట్రిపుల్‌ ఐటీలో ఫుడ్ పాయిజన్‌‌తో పెద్ద సంఖ్యలో విద్యార్థులు అస్వస్థతకు గురైన అంశాన్ని రాష్ట్ర ప్రభుత్వం తీవ్రంగా పరిగణించింది. విద్యార్థులకు పరిశుభ్రమైన ఆహారం అందజేయడంలో నిర్లక్ష్యంగా వ్యవహరించిన డైరెక్టర్‌పై రాష్ట్ర విద్య, ఐటీ శాఖల మంత్రి నారా లోకేశ్‌ చర్యలు తీసుకున్నారు. డైరెక్టర్‌ చంద్రశేఖర్‌ను ఆ బాధ్యతల నుంచి తప్పించారు. వరంగల్‌ నిట్‌ ఫ్రొఫెసర్ అయిన చంద్రశేఖర్‌ను గతేడాది నవంబరులో నాటి వైఎస్ఆర్సీపీ ప్రభుత్వం నూజివీడు ట్రిపుల్ ఐటీ డైరెక్టర్‌గా నియమించింది.

కాగా, ట్రిపుల్‌ఐటీ విద్యార్థులు, వారి తల్లిదండ్రుల్లో నమ్మకాన్ని కల్పించే చర్యల్లో భాగంగా పర్యవేక్షణకు త్రిసభ్య కమిటీని ప్రభుత్వం వేసింది. ఇందులో కళాశాల విద్య కమిషనర్‌ పోలా భాస్కర్, హయ్యర్ ఎడ్యుకేషన్ బోర్డు ఇంఛార్జి ఛైర్మన్‌ రామమోహన్‌రావు, ఏలూరు కలెక్టర్‌ వెట్రి సెల్వీలను సభ్యులుగా నియమించింది. ఆహార నాణ్యత, సహా పలు సున్నితమైన అంశాలపై ఫిర్యాదుల స్వీకరణ, ఇతరత్రా సమస్యల తక్షణ పరిష్కారానికి ఈ కమిటీ ప్రణాళికను రూపొందించాలని మంత్రి లోకేశ్‌ సూచించారు.

విద్యార్థులకు అందజేసే ఆహార నాణ్యత, పారిశుద్ధ్యం, మెస్‌లో పరిశుభ్రత చర్యల కోసం ప్రామాణిక ఆపరేటింగ్‌ ప్రొటోకాల్‌ అమలు.. హాస్టల్‌లో మెరుగైన ప్రమాణాల అమలుకు తీసుకునే చర్యలను ఈ కమిటీ పరిశీలించనుంది. ట్రిపుల్‌ఐటీ అవసరాల మేరకు చిన్నచిన్న మరమ్మతులు, లైంగిక వేధింపులపై ఫిర్యాదుల పరిష్కారానికి అంతర్గత కమిటీ, ఫిర్యాదులపై నిర్లక్ష్యం వహించకుండా విచారణ చేపట్టి సత్వర చర్యలు, ప్రతి డిపార్టుమెంట్‌ స్థాయిలో తగిన యంత్రాంగాన్ని ఏర్పాటుచేసి డ్రగ్స్, పొగాకు రహితంగా తీర్చిదిద్దడంపై కార్యాచరణ ప్రణాళికను రూపొందించనుంది.

దీంతో పాటు విద్యార్థుల్లో మానసిక ఒత్తిడి తగ్గించడం, జీవన నైపుణ్యానికి చర్యలు తీసుకోవడం, కాలేజీలో వెల్‌నెస్‌ టీమ్‌ ఏర్పాటును ఈ కమిటీ పరిశీలిస్తుంది. వెల్‌నెస్‌ టీమ్‌లో స్టూడెంట్ వెల్ఫేర్ డీన్, ఇద్దరు సీనియర్‌ ప్రొఫెసర్లు సభ్యులుగా, ప్రతి విభాగం నుంచి విద్యార్థి మానిటర్లు, తల్లిదండ్రులు ప్రతినిధులుగా ఉంటారు. కాగా, ట్రిపుల్ ఐటీలో 1000 మందికిపైగా విద్యార్థులు అస్వస్థతకు గురైన విషయం రాష్ట్రవ్యాప్తంగా తీవ్ర కలకలం రేపింది.