రాయనపాడు స్టేషన్ వరద నీటిలో చిక్కుకున్న గోదావరి ఎక్స్‌ప్రెస్

బంగాళాఖాతంలో ఏర్పడిన అల్పపీడనంతో రాష్ట్రవ్యాప్తంగా భారీ నుంచి అతి భారీ వర్షాలు కురుస్తున్నాయి. ఉమ్మడి కృష్ణా, గుంటూరు, పశ్చిమ గోదావరి జిల్లాల్లో వరుణుడు విలయం సృష్టించాడు. ముఖ్యంగా ఎన్టీఆర్ జిల్లాలో రోడ్లు, రహదారులు వాగులను తలపిస్తున్నాయి. ఎక్కడ చూసిన వరద నీటిలో ప్రజలు తీవ్రఅవస్థలు పడుతున్నారు. వర్షపు నీరు ఇళ్లల్లోకి చేరడంతో జనం బిక్కుబిక్కుమంటూ గడుపుతున్నారు. ఇబ్రహీంపట్నం మండలం రాయనపాడు రైల్వే స్టేషన్ జలదిగ్భందంలో చిక్కుకుంది. దీంతో ఆ స్టేషన్ మీదుగా వెళ్లే రైళ్లను నిలిపివేసి.. ప్రయాణికులను సురక్షితంగా బయటకు తీసుకొస్తున్నారు. చెన్నై నుంచి న్యూ ఢిల్లీ వెళ్తున్న తమిళనాడు ఎక్స్ప్రెస్‌, హైదరాబాద్ నుంచి విశాఖపట్నం వెళ్తోన్న గోదావరి ఎక్స్‌ప్రెస్ రైళ్ల నుంచి ప్రయాణికులను దింపి విజయవాడ రైల్వే స్టేషన్‌కు పంపుతున్నారు.

ఎన్డీఆర్ఎఫ్ సిబ్బంది, అంబులెన్సులు, పోలీసులు రైల్వే స్టేషన్ వద్దకు చేరుకుని వారిని సురక్షితంగా బయటికి తీసుకు రావడానికి ప్రయత్నాలు చేస్తున్నారు. గోదావరి ఎక్స్‌ప్రెస్ నుంచి ప్రయాణికులను బస్సులో విజయవాడ స్టేషన్‌కు పంపుతున్నట్టు దక్షిణ మధ్య రైల్వే డీఆర్ఎం ట్వీట్ చేసింది. వారిని అక్కడ నుంచి ప్రత్యేక రైలులో విశాఖ నగరానికి పంపుతామని తెలిపింది. కొండపల్లి, రాయనపాడు మధ్య రైల్వే ట్రాక్ మునిగిపోవడంతో రైళ్లను నిలిపివేసినట్టు పేర్కొంది.

మరోవైపు, భారీ వర్షాల కారణంగా తెలుగు రాష్ట్రాల మీదుగా ప్రయాణించే 30కి పైగా రైళ్లను దక్షిణ మధ్య రైల్వే రద్దు చేసింది. కొన్నింటిని పాక్షికంగా రద్దు చేయగా.. మరికొన్నింటిని దారి మళ్లించింది. సికింద్రాబాద్‌-గుంటూరు (గోల్కొండ ఎక్స్‌ప్రెస్‌), విశాఖపట్నం-సికింద్రాబాద్‌ (వందేభారత్‌), విజయవాడ-సికింద్రాబాద్‌ (శాతవాహన), సికింద్రాబాద్‌-సిర్పూర్‌కాగజ్‌నగర్‌ (భాగ్యనగర్‌ ఎక్స్‌ప్రెస్‌), సికింద్రాబాద్‌-గుంటూరు (ఇంటర్‌సిటీ), సికింద్రాబాద్‌-హౌవ్‌రా (ఫలక్‌నుమా ఎక్స్‌ప్రెస్‌), సికింద్రాబాద్‌-తిరువనంతపురం (శబరి ఎక్స్‌ప్రెస్‌), మహబూబ్‌నగర్‌-విశాఖపట్నం (సూపర్‌ఫాస్ట్‌), లింగంపల్లి-ముంబయి (దేవనగరి ఎక్స్‌ప్రెస్‌), కరీంనగర్‌-తిరుపతి (సూపర్‌ఫాస్ట్‌) రైలు రద్దయ్యాయి.

పలు రైళ్లు రద్దవడం, రాకపోకలకు అంతరాయం ఏర్పడింది. దీంతో ప్రయాణికులు అవస్థలు పడుతున్నారు. కొన్నిచోట్ల పట్టాలపైకి వరదనీరు చేరడంతో రైళ్ల రాకపోకలకు నిలిచిపోయాయి. దీంతో విజయవాడతో పాటు రాయనపాడు రైల్వేస్టేషన్లలో ప్రయాణికులు పడిగాపులు కాస్తున్నారు. వృద్ధులు, చిన్నారులు ఇబ్బందులు ఎదుర్కొంటున్నారు.