హర్యానా అసెంబ్లీ ఎన్నికల తేదీ మార్పు.. కాశ్మీర్‌తో పాటు కౌంటింగ్

హర్యానా అసెంబ్లీ ఎన్నికల తేదీ మారింది. కేంద్ర ఎన్నికల సంఘం హర్యానా పోలింగ్ తేదీని మార్చింది. అక్టోబర్‌ 1న పోలింగ్‌ జరగాల్సి ఉండగా.. అక్టోబర్‌ 5కు మార్చింది. ఇక అక్టోబర్‌ 4న ఓట్ల లెక్కింపు చేపట్టాల్సి ఉండగా.. జమ్మూ కాశ్మీర్‌తో పాటే అక్టోబర్‌ 8న కౌంటింగ్ చేపట్టి ఫలితాలు వెల్లడించనున్నారు. బిష్ణోయ్‌ కమ్యూనిటీ నుంచి వచ్చిన విజ్ఞప్తి మేరకు ఎన్నికల సంఘం ఈ నిర్ణయం తీసుకుంది. ప్రజాస్వామ్యంలో సంస్కృతి, సంప్రదాయాలను గౌరవించాలనే ఉద్దేశంతో ఈ నిర్ణయం తీసుకున్నట్లు ఈసీ శనివారం (ఆగస్టు 31) ఒక ప్రకటనలో తెలిపింది. హర్యానా అసెంబ్లీ పదవీకాలం నవంబర్ 3తో ముగియనుంది.

‘బిష్ణోయ్ కమ్యూనిటీ ఓటింగ్ హక్కులు, సంప్రదాయాలు.. రెండింటినీ గౌరవించటానికి ఈ నిర్ణయం తీసుకున్నాం. వారు తమ గురు జంభేశ్వరుని స్మారకార్థం అసోజ్ అమావాస్య ఉత్సవాల్లో పాల్గొనే శతాబ్దాల నాటి ఆచారాన్ని గౌరవిస్తున్నాం’ అని ఎన్నికల సంఘం పేర్కొంది.

 బిష్ణోయ్ వర్గానికి చెందిన ప్రజలు తమ మూలపురుషుడు గురు జంబేశ్వర్‌ స్మారకంగా ఏటా అసోజ్‌ అమావాస్య పండుగను జరుపుకొంటారు. అక్టోబర్‌ 2న నిర్వహించుకునే ఈ వేడుకలో హర్యానాతో పాటు, పంజాబ్‌, రాజస్థాన్‌కు చెందిన ప్రజలు పెద్ద సంఖ్యలో పాల్గొంటారు.

హర్యానా అసెంబ్లీలో మొత్తం 90 స్థానాలు ఉన్నాయి. 2019 అసెంబ్లీ ఎన్నికల్లో బీజేపీ 40 సీట్లలో గెలుపొందింది. దుష్యంత్‌ సింగ్‌ చౌతాలా నేతృత్వంలోని జననాయక జనతా పార్టీ (జేజేపీ)తో పొత్తు పెట్టుకుని ప్రభుత్వాన్ని ఏర్పాటు చేసింది. 2014లోనూ బీజేపీ ప్రభుత్వాన్ని ఏర్పాటు చేసింది. ప్రస్తుత ఎన్నికల్లోనూ గెలిచి హ్యాట్రిక్‌ విజయం సాధించాలని బీజేపీ పట్టుదలతో ఉంది. అయితే, ఈసారి తీవ్రమైన ప్రభుత్వ వ్యతిరేకత ఎదురవుతోంది. పదేళ్లుగా అధికారానికి దూరంగా ఉన్న కాంగ్రెస్ పార్టీ.. ఈసారి ఎలాగైనా బీజేపీని ఓడించి గద్దెనెక్కాలని గట్టి పట్టుదలతో ఉంది.

ఆర్టికల్ 370 రద్దు తర్వాత జమ్మూ కాశ్మీర్‌లో తొలిసారి అసెంబ్లీ ఎన్నికలు జరుగనున్నాయి. నియోజకవర్గాల పునర్విభజన తర్వాత జమ్మూ కాశ్మీర్ అసెంబ్లీ సీట్లు 90కి పెరిగాయి. ఇక్కడ మూడు దశల్లో పోలింగ్ (సెప్టెంబరు 18, 25, అక్టోబరు 1) నిర్వహించేందుకు ఈసీ షెడ్యూల్ విడుదల చేసింది. అక్టోబర్ 8న ఫలితాలను వెల్లడించనున్నారు.