లావోస్‌లో ‘సైబర్ బానిసలు’గా భారతీయులు.. 47 మందిని రక్షించిన అధికారులు

మంచి జీతం, జీవితం లభిస్తాయనే నమ్మకంతో విదేశాలకు విమానం ఎక్కుతారు. ఇలా విదేశాల్లో ఉద్యోగం కోసం వెళ్లిన భారతీయ యువకులు సైబర్ నేరగాల ముఠాకు చిక్కి బానిసలుగా మారడం ఆందోళనకు గురిచేస్తోంది. లావోస్‌లో బానిసలుగా మారిన భారతీయులను అక్కడి అధికారులు రక్షించారు. ఉద్యోగాల పేరిట యువతను ఆకర్షించి లావోస్‌కు తీసుకెళ్లి.. అక్కడి వారితో బలవంతంగా సైబర్‌ నేరాలు చేయిస్తున్నట్టు వెల్లడయ్యింది. భారత్‌లోని ప్రజలకు ఫోన్లు చేయడం, లింక్‌లు పంపి ఆన్‌లైన్‌లో డబ్బులు దోచేయడమే ఈ సైబర్‌ బానిసల ఉద్యోగం. ఒకవేళ ఆ ముఠాలు చెప్పినట్టు వినకపోతే వేధింపులు, దాడులకు తెగబడతారు.

 శనివారం లావోస్‌లో బొకియో ప్రావిన్సుల గోల్డెన్‌ ట్రయాంగిల్‌ స్పెషల్ ఎకనామిక్ జోన్ (సెజ్‌)లో ఏర్పాటైన సైబర్‌ స్కామ్‌ సెంటర్లలో చిక్కుకున్న 47 మంది భారతీయులను అధికారులు శనివారం రక్షించారు. అనంతరం అక్కడ భారత రాయబార కార్యాలయంలో బాధితులను అప్పగించారు. వీరిలో 30 మందిని క్షేమంగా స్వదేశానికి పంపినట్టు రాయబార కార్యాలయం అధికారులు వెల్లడించారు. మిగతావారిని సాధ్యమైనంత త్వరగా పంపేందుకు ఏర్పాట్లు చేస్తున్నట్లు వెల్లడించారు. ఇప్పటి వరకు సైబర్ ముఠాల బారి నుంచి ఆ దేశంలో 635 భారతీయులను రక్షించినట్టు తెలిపారు. గత నెల భారత రాయబార కార్యాలయం 13 మందిని కాపాడి, స్వదేశానికి పంపింది.

విదేశాల్లో ఉద్యోగం కోసం ఎదురుచూస్తోన్న యువతను లక్ష్యంగా చేసుకుంటాయి సైబర్ ముఠాలు. వారిని ఉచ్చులోకి లావోస్‌, కాంబోడియాలకు పంపి.. అక్కడికి చేరగానే పాస్‌పోర్టు లాక్కుంటారు. బయటకు వెళ్లనివ్వరు. స్కామ్‌ సెంటర్లలోనే బానిసల్లా గడపాల్సి ఉంటుంది. అమ్మాయిలు మాదిరిగా గొంతు మార్చి ఫోన్లలో మాట్లాడాల్సి ఉంటుంది. నకిలీ యాప్‌లు, ఫేక్‌ సోషల్‌ మీడియా ఖాతాల్లో అందమైన యువతుల ఫొటోలు పెట్టి హనీట్రాప్ చేస్తుండాలి. వారికి రోజువారీ టార్గెట్‌లు ఉంటాయి. నిర్దేశించినంత సొమ్ము కొల్లగొట్టకపోతే భోజనం పెట్టకపోవడం, విశ్రాంతికి కూడా సమయం లేకుండా కఠినమైన శిక్షలు విధిస్తారు.

లావోస్, కాంబోడియాలో ఉద్యోగాల పేరుతో వచ్చే ఆఫర్లను గుడ్డిగా అంగీకరించవద్దని అధికారులు హెచ్చరిస్తున్నారు. చాలావరకు సైబర్‌ మోసాలకు సంబంధించినవే ఉంటాయని, యువత అప్రమత్తంగా ఉండాలని సూచిస్తున్నారు. గత నెలలో లావోస్‌లో పర్యటించిన భారత విదేశాంగ మంత్రి ఎస్‌.జైశంకర్‌.. భారతీయ యువతను ముఠాలు లావోస్‌ రప్పించి, బలవంతంగా సైబర్‌ నేరాలు చేయిస్తుండటంపై ఆ దేశ ప్రధానితో చర్చించారు. సైబర్‌ ముఠాలపై కఠిన చర్యలు తీసుకోవాలని కోరారు.