కంటైనర్ నుంచి రూ.12 కోట్ల విలువైన 1,600 ఐఫోన్లు చోరీ

కంటెయినర్‌లో తరలిస్తోన్న కోట్లాది రూపాయాలు విలువైన ఐ-ఫోన్లను దుండగులు చోరీచేశారు. హరియాణా నుంచి చెన్నైకు ఐ-ఫోన్లతో వెళ్తోన్న ట్రక్కు మార్గమధ్యంలో మధ్యప్రదేశ్ వద్ద దోపిడీకి గురయ్యింది. ఆగస్టు 15న చోటుచేసుకున్న ఈ దోపిడీ ఘటన ఆలస్యంగా వెలుగులోకి వచ్చింది. సాగర్‌ జిల్లాలో కంటైనర్‌ ట్రక్కు నుంచి దాదాపు 1,600లకు పైగా ఐఫోన్ల (iPhones)ను దుండగులు ఎత్తుకెళ్లినట్టు పోలీసులు తెలిపారు. చోరీ అయిన ఫోన్ల విలువ రూ.11-12 కోట్ల వరకు ఉంటుందని పేర్కొన్నారు. విధుల్లో నిర్లక్ష్యంగా వ్యవహరించినందుకు ముగ్గురు పోలీసులను విధుల నుంచి సస్పెండ్ చేశారు.

సాగర్ జోన్ ఐజీ ప్రమోద్ వర్మ్ కథనం ప్రకారం.. ఆగస్టు 14న ఢిల్లీ శివారులోని గురుగ్రామ్‌ నుంచి 1,600పైగా ఐ-ఫోన్లతో ఓ కంటెయినర్ ట్రక్కు బయలుదేరింది. ఈ ట్రక్కు ఆగస్టు 15న మధ్యప్రదేశ్‌లోని సాగర్ జిల్లాలోకి రాగానే జిల్లా కేంద్రానికి 35 కిలోమీటర్ల దూరంలో దానిపై కొందరు దుండగులు దాడి చేశారు. కంటైనర్‌ను నడుపుతోన్న డ్రైవర్‌కు మత్తుమందు ఇచ్చి, నోటికి ప్లాస్టర్ వేసి అరవకుండా చేసిన దుండుగులు.. అతడ్ని లోపలి బంధించారు. అనంతరం ట్రక్కులోని ఐఫోన్ల ఎత్తుకెళ్లినట్లు ఐజీ ప్రమోద్ వర్మ తెలిపారు. డ్రైవర్ స్పృహలోకి వచ్చిన తర్వాత చోరీని గుర్తించి వెంటనే పోలీసులకు సమాచారం ఇచ్చారు.

ఈ ఘటనపై ఆలస్యంగా స్పందించిన పోలీసులు.. కేసు నమోదుచేసి దర్యాప్తు చేపట్టారు. చోరీ వెనుక ట్రక్కులో ఉన్న సెక్యూరిటీ గార్డు హస్తం ఉన్నట్టు భావిస్తున్నారు. అతడ్ని ప్రధాన నిందితుడిగా పేర్కొన్నారు. సెక్యూరిటీ గార్డే తన అనుచరులకు ఫోన్‌ చేసి దాడి చేయించినట్లు ప్రాథమికంగా నిర్ధరించామని ఐజీ వివరించారు. చోరీపై దర్యాప్తు కొనసాగుతోందని, నిందితుల కోసం గాలిస్తున్నామని పేర్కొన్నారు.

అయితే, డ్రైవర్‌ ఫిర్యాదు చేసిన వెంటనే కేసు నమోదు చేయకుండా అలసత్వం వహించిన ముగ్గురు సిబ్బందిపై పోలీసు ఉన్నతాధికారులు చర్యలు చేపట్టారు. ఈ చోరీపై ఇప్పటివరకు యాపిల్‌ సంస్థ పోలీసులను సంప్రదించకపోవడం గమనార్హం. అలాగే, ట్రక్కులో ఐ-ఫోన్లు దోపిడి జరిగిన ప్రాంతంలో సీసీటీవీ కెమెరాలను పరిశీలిస్తున్నామని ప్రమోద్ వర్మ తెలిపారు. అలాగే ఈ వాహనం ప్రయాణించిన ప్రాంతంలోని వీడియో ట్రాక్‌ను స్వాధీనం చేసుకున్నట్టు చెప్పారు.