రూ.2.5 కోట్లతో..విజయవాడ వరద బాధితులకు అండగా దివీస్ సంస్థ

భారీ వర్షాలు, వరదలతో విజయవాడ నగరంలోని చాలా ప్రాంతాల్లో మొత్తం నీటమునిగి అస్తవ్యస్తం అయ్యాయి. ఇక ఆ ప్రాంతాల్లో నివసిస్తున్న జనం.. తిండి, తాగునీరు లేక తీవ్ర అవస్థలు పడుతున్నారు. ఈ క్రమంలోనే ప్రభుత్వం, వివిధ స్వచ్ఛంద సంస్థలు రంగంలోకి దిగి.. వరద బాధితులకు సహాయం అందిస్తున్నాయి. ఈ నేపథ్యంలోనే తాజాగా ఫార్మా కంపెనీ అయిన దివీస్ ల్యాబ్స్ కూడా రంగంలోకి దిగింది. భారీ వరదలతో అతలాకుతలం అయిన బెజవాడ నగరానికి తమ వంతు సహాయ సహకారాలు అందించాలని నిర్ణయించుకుంది. ఈ క్రమంలోనే విజయవాడ నగరంలోని వరద బాధితులకు ఆహారం అందించాలని నిర్ణయించింది. 5 రోజుల పాటు వరద బాధితులకు తమ సంస్థ ఆహారం అందించనున్నట్లు దివీస్ ల్యాబొరేటరీస్ సంస్థ ఎండీ మురళీకృష్ణ తాజాగా వెల్లడించారు.

ఈ ప్రకృతి విపత్తు సమయంలో విజయవాడ వరద బాధితులకు దివీస్ సంస్థ చేయూతను అందిస్తోంది. 5 రోజుల పాటు వరద బాధితులకు ఆహారం సరఫరా చేస్తామని ప్రకటించింది. నిత్యం విజయవాడ నగరంలోని 1.70 లక్షల మందికి ఆహారాన్ని అందిస్తామని తెలిపింది. అక్షయపాత్ర ద్వారా వరద బాధితులకు ఆహారం అందిస్తున్నట్లు దివీస్‌ ఎండీ మురళీకృష్ణ స్పష్టం చేశారు. సుమారు రూ.2.5 కోట్ల అంచనా వ్యయంతో 5 రోజులపాటు ఈ సాయం కొనసాగుతుందని మురళీకృష్ణ వెల్లడించారు.

ఇక మంగళగిరిలోని అక్షయ పాత్ర సంస్థ సరికొత్త రికార్డును సృష్టించింది. కేవలం ఒక్కరోజు 3 లక్షల మంది వరద బాధితులకు ఆహారాన్ని తయారు చేసి పంపిణీ చేసి ఒక ఘనతను సాధించింది. ప్రస్తుతం విజయవాడలో వరద బీభత్సం సృష్టిస్తున్న వేళ.. అక్కడి వరద బాధితులను ఆదుకునేందుకు వారికి ఆహారాన్ని తయారు చేసి సరఫరా చేయాలని ముఖ్యమంత్రి నారా చంద్రబాబు నాయుడు అక్షయపాత్ర సంస్థకు ఆదేశాలు జారీ చేశారు. దీంతో సోమవారం ఒకేసారి 3 లక్షల ఆహార ప్యాకెట్లు తయారు చేసి వరద బాధితులకు పంపించింది. అక్షయపాత్ర సంస్థ చరిత్రలో ఇదే అతిపెద్ద రికార్డు అని ఆ సంస్థలో పనిచేస్తున్న ఉద్యోగులు పేర్కొంటున్నారు. ఈ నేపథ్యంలోనే తాజాగా దివీస్ సంస్థ కూడా ఈ అక్షయపాత్ర సంస్థ ద్వారానే విజయవాడ వరద బాధితులకు ఆహారం సరఫరా చేయనున్నట్లు ప్రకటించింది.