ఏపీలో వినాయక మండపాలు ఏర్పాటు చేస్తున్నారా.. ఇలా దరఖాస్తు చేసుకోండి

ఆంధ్రప్రదేశ్‌లో వినాయక మండపాలు ఏర్పాటు చేయాలనుకుంటున్నవారికి ముఖ్యమైన గమనిక. రాష్ట్ర ప్రభుత్వం సింగిల్‌ విండో విధానం అందుబాటులోకి తీసుకొచ్చింది. గణేష్‌ మండపాల ఏర్పాటుకు సంబంధించి ప్రజలకు అన్ని రకాల అనుమతులు మంజూరును సులభతరం చేసింది. అగ్నిమాపక, కార్పొరేషన్/మున్సిపల్, విద్యుత్తు, పోలీసు శాఖల నుంచి ఎన్‌వోసీ పత్రం తీసుకోవాల్సి ఉంటుంది. ఈ ఎన్‌వోసీలు పొందేందుకు అనుసరించాల్సిన ప్రక్రియను జిల్లాలవారీగా వాట్సాప్‌ ద్వారా ఫోన్‌కు వచ్చేలా ఏర్పాటు చేశారు.

మండపం ఏర్పాటు చేయాలనుకునే వారు ముందుగా https://ganeshutsav.net// వెబ్‌సైట్‌ ద్వారా వివరాలు నమోదు చేసి దరఖాస్తులు చేసుకోవాలి. మండపాలు ఏర్పాటు చేసే కమిటీ సభ్యుల వివరాలు, ఏ పోలీసు స్టేషన్‌ పరిధిలోకి వస్తుంది, ప్రదేశం, విగ్రహంతో పాటు మండపం ఎత్తు, విగ్రహాన్ని ఏ రోజు పెడతారు, నిమజ్జనం ఎక్కడ ఏ సమయంలో చేస్తారు, ఏ వాహనంతో తరలిస్తారు తదితర వివరాలను నమోదు చేయాలి. ఈ దరఖాస్తు సంబంధిత పోలీసు స్టేషన్‌ ఎస్‌హెచ్‌వో దగ్గరకు వెళుతుంది.

ప్రభుత్వ నియమాలకు అనుగుణంగా ఉంటే మీ సేవలో కమిటీ సభ్యులు చలానా కట్టాలి. ఆ తర్వాత ప్రభుత్వం ఏర్పాటు చేసిన https://ganeshutsav.net/applicationStatus వైబ్‌సైట్‌లో దరఖాస్తుదారుని ఫోన్‌ నంబరు ఎంటర్‌ చేసి ఎన్‌వోసీ పొందొచ్చు. అలాగే కమిటీ పాటించాల్సిన నిబంధనలతో కూడిన క్యూఆర్‌ కోడ్‌ను ఉత్సవ మండపంలో ఉంచాలని సూచిస్తున్నారు. తనిఖీలు చేపట్టేందుకు వచ్చే అధికారులకు దీనిని చూపించాల్సి ఉంటుంది. విగ్రహాలను రహదారులకు దూరంగా ట్రాఫిక్‌ ఇబ్బందులు లేకుండా ఏర్పాటు చేసుకోవాలని సూచిస్తున్నారు అధికారులు.

వినాయక మండపాలు ఏర్పాటు చేసే కమిటీ సభ్యుల ఆధార్‌ కార్డులు, చిరునామా, ఫోన్‌ నంబర్లు తీసుకుంటారు. వినాయక చవితి మండపాల దగ్గర ఎక్కువ శబ్దం వచ్చే స్పీకర్లను ఉపయోగించకూడదంటున్నారు పోలీసులు. ఉదయం 6 గంటల నుంచి 10 వరకు మాత్రమే స్పీకర్లను వినియోగించాలని.. భద్రతా కమిటీ సభ్యులు రాత్రులు మండపాల వద్దనే ఉండాలని సూచించారు. వినాయక నిమజ్జనం చేసే రూట్‌ మ్యాప్‌ను ముందుగా పోలీసులకు తెలియజేయాలని.. డ్రైవర్‌ దగ్గర అండర్‌ టేకింగ్‌ లెటర్‌ తీసుకోవాల్సి ఉంటుంది. వినాయక ఉత్సవ మండపాల వద్ద, ఊరేగింపుల్లో బాణసంచాను ఉపయోగించకూడదు.

వినాయక నిమజ్జనం సమయంలో అశ్లీల నృత్యాలు, డీజే శబ్దాలపై కూడా నిషేధం విధించారు పోలీసులు. ఇతర వ్యక్తులను రెచ్చగొట్టే విధంగా ప్రవర్తించకూడదని.. బలవంతపు చందాలు, వసూళ్లు, దర్శనాల టికెట్లు వంటివి పెట్టకూడదని హెచ్చరించారు. ఎవరైనా అటువంటి చర్యలకు పాల్పడితే 100కి డయల్‌ చేయాలని.. అలాగే అవసరమైన చోట ప్రతి మండపానికి సంబంధిత పోలీస్‌ స్టేషన్‌ నుంచి ఒక కానిస్టేబుల్‌ను కో-ఆర్డినేటర్‌గా అధికారులు నియమించాలని భావిస్తున్నారు. ప్లాస్టర్‌ ఆఫ్‌ పారిస్, కృత్రిమ రంగులు ఉపయోగించిన విగ్రహాలను పర్యావరణ పరిరక్షణ నిమిత్తం ఉపయోగించకూడదని సూచించారు.. మట్టితో తయారు చేసిన విగ్రహాలను ఉపయోగించాలి.

విగ్రహం వద్ద పాయింట్‌ బుక్, రిజిస్టర్‌ ఉండాలని పోలీసులు సూచించారు. హుండీని రాత్రి పూట మండపంలో ఉంచకూదడని.. నిర్దేశించిన విధంగా ఊరేగింపు ప్రారంభించాలంటున్నారు. అలాగే నిర్ణీత సమయంలో రాత్రి 10 గంటల లోపు నిమజ్జనం చేయాలంటున్నారు. ఎలాంటి అవాంఛనీయ ఘటనలు జరగకుండా ప్రశాంత వాతావరణంలో వేడుకలు నిర్వహించాలని సూచించారు.