ప్రకాశం బ్యారేజ్‌కి వరద ఆల్ టైం రికార్డ్.. తొలిసారి 11 లక్షల క్యూసెక్కులు

ఆంధ్రప్రదేశ్‌‌ను వర్షాలు ముంచెత్తాయి.. ముఖ్యంగా విజయవాడలో పరిస్థితి మరీ దారుణంగా ఉంది. ఈ వర్షాలు, వరదలతో ప్రకాశం బ్యారేజ్‌కి ఆల్ టైం రికార్డుస్ధాయిలో వరద నీరు ప్రవహిస్తోంది. తొలిసారి వరద నీరు 11 లక్షల క్యూసెక్కులు దాటింది.. ప్రకాశం బ్యారేజ్ దగ్గర కృష్ణమ్మ ప్రవాహం ప్రమాదకరంగా ఉంది. 125 ఏళ్ల తర్వాత బ్యారేజ్ చరిత్రలో రికార్డు స్ధాయిలో కృష్ణమ్మకి వరద ప్రవాహం చేరింది. ప్రకాశం బ్యారేజ్ దగ్గర ఇన్ ఫ్లో 11.25 లక్షలు క్యూసెక్కులు దాటేసింది. 2009 సంవత్సరం అక్టోబర్ 5న వరదనీరు రికార్డుస్ధాయిలో 10,94,422 క్యూసెక్కులు దాటింది. 2009 వరదలని మించిన స్ధాయిన కృష్ణమ్మకి వరద పోటెత్తింది. అంతకముందు 1903 అక్టోబర్ 7లో మాత్రమే 10,60,830 లక్షల క్యూసెక్కుల వరద వచ్చింది.

ఇపుడు ఏకంగా 11 లక్షల క్యూసెక్కుల వరద ప్రవాహం ఉంది. అంతకంతకు పెరుగుతున్న వరద ప్రవాహంతో కృష్ణా పరీవాహక ప్రాంతాలు బిక్కుబిక్కుమంటున్నాయి. ఇప్పటికే బుడమేరుకి గండిపడటంతో సింగ్ నగర్, ఊర్మిళా నగర్, ప్రకాశ్ నగర్, వాంబేకాలనీ, ఖండ్రిగ, పైపుల రోడ్, న్యూ రాజరాజేశ్వరిపేట, వైఎస్సార్ కాలనీ, జక్కంపూడి కాలనీ తదితర ప్రాంతాలు నీటమునిగాయి. కృష్ణలంక రైల్వే బ్రిడ్జి, రైల్వే బ్రిడ్జి అంచు వరకు వరదనీటి ప్రవాహం ప్రమాదకరంగా ఉంది. నీటి ప్రవాహం మరింత పెరిగితే రైల్వే బ్రిడ్జిపై నుంచి వరద నీరు ప్రవహించే అవకాశం ఉంది. ప్రకాశం బ్యారేజీకి వరద ఉధృతిలో పెద్ద ఎత్తున బోట్లు కొట్టుకొస్తున్నాయి. ముందు ఎగువ నుంచి ప్రకాశం బ్యారేజీ వైపు ఒక బోటు కొట్టుకొచ్చింది. వేగంగా వచ్చిన బోటు ప్రకాశం బ్యారేజీ గేటు 69ను ఢీ కొన్నది. ఈ ఘటనలో గేటు లిఫ్ట్ చేసే ప్రాంతంలో డ్యామేజీ అయ్యింది.

మరోవైపు ముఖ్యమంత్రి చంద్రబాబు విజయవాడలోనే మకాం వేశారు. వరద పరిస్థితిపై ఉదయం విజయవాడ కలెక్టరేట్‌లో అధికారులతో ఆయన ఉన్నతస్థాయి సమీక్ష నిర్వహించారు. ఒక్క రాత్రి ధైర్యంగా ఉండాలని ముంపు ప్రాంతాల ప్రజలకు హామీ ఇచ్చానని.. ఆ హామీని నిలబెట్టుకునే దిశగా అధికార యంత్రాంగం పనిచేయాలన్నారు. వరదలో చిక్కుకున్న వారిలో ఎంతమందిని రక్షించగలిగామన్నదే ముఖ్యమని.. బోట్లు కూడా కొట్టుకుపోయే సవాళ్లు ముందున్నాయన్నారు. బోట్లలో వచ్చిన వారిని తరలించేందుకు బస్సులు సిద్ధంగా ఉంచాలని అధికారులకు సూచనలు చేశారు. అవసరమైతే వృద్ధులు, రోగులు ఇబ్బంది పడకుండా హోటళ్లలోనే ఉంచాలని.. మరికొంతమంది బాధితుల కోసం కల్యాణ మండపాలు, ఇతర కేంద్రాలు సిద్ధం చేయాలన్నారు. మొత్తం 47 కేంద్రాలు గుర్తించనట్లు ముఖ్యమంత్రికి అధికారులు వివరించారు.

సుమారు లక్షన్నర మంది వరకు ఆహార పంపిణీ జరిగిందని అధికారులు చంద్రబాబుకు తెలిపారు. విపత్తు సమయంలో వరద బాధితులు తీసుకునే తాగునీరు ఎంతో ముఖ్యమని.. అందుబాటులో ఉన్న మినరల్‌ వాటర్‌ వారి కోసమే కేటాయించాలని సూచించారు. కృష్ణానది కరకట్టపై వెంకటపాలెం దగ్గర గండి పడే పరిస్థితి గురించి అడిగి తెలుసుకున్నారు. ఆ గండిని పూడ్చగలిగామని ముఖ్యమంత్రికి అధికారులు వివరించారు. తనతో సహా అధికారులంతా బృందంగా ఏర్పడాలని.. ప్రజలకు అండగా నిలబడాలని సూచించారు.