ఆ పని చేయండి రూ.50 వేలు బహుమతిగా పొందండి!

వాహనదారులు ట్రాఫిక్ నిబంధనలు పాటించకపోవడం వల్ల నిత్యం రోడ్లపై అనేక ప్రమాదాలు జరుగుతూ ఉంటాయి. అందుకే ట్రాఫిక్ రూల్స్ పాటించని వాహనదారులపై పోలీసులు.. చలాన్లు వేస్తూ ఉంటారు. దేశంలో రోజురోజుకు రోడ్లపైకి వచ్చే కొత్త వాహనాల సంఖ్య పెరుగుతున్నట్లే.. ట్రాఫిక్‌ రూల్స్‌ను అతిక్రమించేవారి సంఖ్య కూడా పెరుగుతూనే ఉంది. ఇక ఈ ట్రాఫిక్ రూల్స్‌ను వాహనదారులు పాటించేలా పోలీసులు రకరకాల చర్యలు చేపడుతూనే ఉంటున్నారు. అయినా చాలా మంది వాహనదారులు వాటిని పట్టించుకోకుండా వెళ్తూనే ఉన్నారు. సీసీటీవీ కెమెరాలు, వైరల్ వీడియోల ఆధారంగా వాహనదారులను గుర్తించి చలాన్లు వేయడం సహా అత్యాధునిక టెక్నాలజీని ఉపయోగించి.. వాహనదారులపై కఠిన చర్యలు తీసుకుంటునే ఉన్నారు. తాజాగా ఢిల్లీ ట్రాఫిక్ పోలీసులు సరికొత్త విధానాన్ని తీసుకువచ్చారు.

ఢిల్లీ నగరంలో చాలా ప్రాంతాల్లో గంటల తరబడి ట్రాఫిక్‌ జామ్ ఏర్పడుతూ ఉంటుంది. అయితే అదే సమయంలో ట్రాఫిక్ రూల్స్‌ను ఉల్లంఘించి వెళ్లేవారి సంఖ్య కూడా పెరుగుతూ ఉంటుంది. ఈ క్రమంలోనే ఎవరైనా వాహనదారులు గానీ, రోడ్డుపై నడిచే పాదచారులు, ఇతర పౌరులు.. వాహనదారులు ట్రాఫిక్ నిబంధనలు పాటించేలా చేయవచ్చని ఢిల్లీ ట్రాఫిక్ పోలీసులు వెల్లడించారు. అదెలాగంటే ట్రాఫిక్ రూల్స్‌ను అతిక్రమించే వారి వాహనదారుల ఫోటోలు, వివరాలను ఢిల్లీ ట్రాఫిక్ పోలీసులకు అందించి.. భారీగా నగదు బహుమతిని పొందవచ్చని తెలిపారు. దీనికోసం ఎక్కడికీ వెళ్లాల్సిన అవసరం లేదని.. ఎక్కడైతే ట్రాఫిక్ ఉల్లంఘనలు జరిగాయో అక్కడి నుంచే సెల్‌ఫోన్లో.. ఫోటోలు, వీడియోలు పంపించవచ్చని.. ఇలా ఇచ్చిన వారికి భారీగా నగదు ప్రోత్సాహం అందిస్తామని తెలిపింది.

ఇందుకోసం ట్రాఫిక్‌ ప్రహారీ అనే యాప్‌ను తీసుకువచ్చింది. ఈ యాప్‌లో ట్రాఫిక్‌ ఉల్లంఘనలకు పాల్పడే వాహనదారులకు సంబంధించిన ఫొటోలు, వీడియోలు, వెహికల్ నంబర్‌ సహా పలు వివరాలను అప్‌లోడ్‌ చేయాల్సి ఉంటుంది. ఇలా ట్రాఫిక్‌ రూల్స్‌ను అతిక్రమించే వారికి సంబంధించిన వివరాలు అందించిన వారికి గరిష్ఠంగా రూ.50 వేలు నజరానాగా ఇవ్వనున్నట్టు ఢిల్లీ ట్రాఫిక్ పోలీస్ విభాగం తెలిపింది. సెప్టెంబర్‌ 1వ తేదీ నుంచే ఈ విధానం అందుబాటులోకి వచ్చిందని తెలిపింది. ఈ ట్రాఫిక్ ప్రహారీ యాప్ ద్వారా వచ్చిన ఫిర్యాదులను పరిష్కరించి వెంటనే సదరు వాహనదారులపై కఠిన చర్యలు తీసుకుంటామని ఢిల్లీ ట్రాఫిక్ పోలీసులు వెల్లడించారు. ఈ యాప్‌ ద్వారా ఫిర్యాదు చేసిన వారికి రూ.10 వేల నుంచి రూ.50 వేల వరకు రివార్డు ఇస్తామని చెప్పారు.

అయితే ఇప్పటికే ఉన్న ట్రాఫిక్‌ సెంటినల్‌ మొబైల్ యాప్‌ను అప్‌డేట్‌ చేసి.. ఈ ట్రాఫిక్ ప్రహారీ యాప్‌ను సరికొత్తగా ప్రవేశపెట్టాలని ఢిల్లీ లెఫ్టినెంట్ గవర్నర్ వీకే సక్సేనా.. ఇటీవలె ఢిల్లీ ట్రాఫిక్ పోలీసులకు ఆదేశాలు జారీ చేశారు. ఇందులో ఎవరైతే ఎక్కువగా ఫిర్యాదులు అందిస్తారో వారికి నగదు రివార్డు లభిస్తుంచనుంది. ఈ నగదు రివార్డులను 4 కేటగిరీల కింద ఢిల్లీ ట్రాఫిక్ పోలీసులు అందజేయనున్నారు. అధిక ఫిర్యాదులు చేసి తొలి స్థానంలో నిలిచిన వారికి రూ. 50 వేలు, 2వ స్థానంలో ఉన్న వారికి రూ. 25 వేలు.. 3వ స్థానంలో ఉన్న వారికి రూ.15 వేలు.. 4వ స్థానంలో నిలిచిన వారికి రూ. 10 వేలు ఇవ్వనున్నారు. ఇలా చేయడం వల్ల ట్రాఫిక్ రూల్స్‌ను అతిక్రమించే వారి సంఖ్య తగ్గుతుందని ఢిల్లీ ట్రాఫిక్ పోలీసులు భావిస్తున్నారు.