ఇబ్బంది లేదు, చాలా సింపుల్,.. ప్రకాశం బ్యారేజీపై కన్నయ్య నాయుడు

విజయవాడ ప్రకాశం బ్యారేజీ గేట్ల వ్యవహారాన్ని ఓ కొలిక్కి తీసుకొచ్చే పనిలో ఉంది ఏపీ ప్రభుత్వం. ఈ మేరకు ఇంజినీరింగ్‌ నిపుణుడు, ఏపీ జలవనరుల శాఖ సలహాదారు కన్నయ్యనాయుడు ప్రకాశం బ్యారేజీని పరిశీలించారు. అక్కడ ఇరిగేషన్ అధికారులతో కలిసి వెళ్లారు.. ప్రకాశం బ్యారేజీ గేట్ల నిర్వహణ కోసం నిర్మించిన అయిస్ట్‌ బ్రిడ్జి ఎక్కి పరిశీలించారు. అయితే బ్యారేజీకి సంబంధించి రెండు గేట్లు స్వల్పంగా దెబ్బతిన్నట్లు గుర్తించారు. బ్యారేజీ పటిష్ఠంగా ఉందని.. గేట్లు ఎత్తడం, మూయడం కోసం ఏర్పాటు చేసిన మెకానిజం, మోటార్ యంత్రాల పనితీరును కన్నయ్యనాయుడు అడిగి తెలుసుకున్నారు.

ప్రకాశం బ్యారేజీ గేట్లు దెబ్బతినలేదని.. ఒక గేటుకు బోటు తగిలిందన్నారు కన్నయ్యనాయుడు. అక్కడ కౌంటర్‌ వెయిట్‌ బ్రేక్‌ అయ్యిందని.. కొత్త బాక్సులను డిజైన్‌ చేసినట్లు తెలిపారు. కౌంటర్‌ వెయిట్‌ లేకున్నా.. గేట్లు దింపేందుకు ఏర్పాట్లు చేస్తున్నామన్నారు. మళ్లీ బ్యారేజీ గేట్లు ఎత్తేలోపే కౌంటర్‌ వెయిట్‌ ఏర్పాటు చేసుకోవచ్చని.. ఒక్క గేటుకు సమస్య ఉందని.. మిగిలిన గేట్లు ఎత్తుకోవచ్చన్నారు. గేట్లు దించకముందే బోట్లను తొలగిస్తామన్నారు. బోట్లు ఎలా తీయాలో సాయంత్రంలోపు ఒక నిర్ణయం తీసుకుంటామన్నారు. జలవనరుల శాఖ అధికారులతో కన్నయ్యనాయుడు సమావేశమై.. దెబ్బతిన్న గేట్లు, కౌంటర్ వెయిట్ తిరిగి ఏర్పాటు చేయడంపై వారికి కొన్ని సూచనలు చేశారు.

ఇదిలా ఉంటే.. ప్రకాశం బ్యారేజీ గేట్లకు అడ్డుగా ఇరుక్కుపోయిన బోట్లను తొలగించాలని అధికారులకు సూచించారు కన్నయ్యనాయుడు. ఆ బోట్లను తొలగించిన తర్వాతే మరమ్మత్తులు సాధ్యమవుతాయని.. బ్యారేజీలో వరద 5 లక్షల క్యూసెక్కులకు తగ్గాకే పనులు చేపట్టాల్సి ఉంటుందన్నారు. ఈ బోట్ల తొలగింపు, మరమ్మత్తుల బాధ్యతల పర్యవేక్షణ జలవనరుల శాఖ మాజీ మంత్రి దేవినేని ఉమా చూసుకుంటున్నారు. బ్యారేజీ గేట్ల దగ్గర ఇరుక్కుపోయిన బోట్లు తొలగించేందుకు కాకినాడ నుంచి నిపుణులను రప్పించే ప్రయత్నంలో ఉన్నారు. మొత్తం మీద ప్రకాశం బ్యారేజీ దగ్గర పరిస్థితుల్ని చక్కదిద్దే పనిలో ఉన్నారు.

మరోవైపు ప్రకాశం బ్యారేజీకి వరద తగ్గుముఖం పడుతోందన్నారు ఏపీ జలవనరుల శాఖ మంత్రి నిమ్మల రామానాయుడు. 11 లక్షల నుంచి 8 లక్షల క్యూసెక్కులకు వరద తగ్గిందన్నారు.. ప్రకాశం బ్యారేజీ గేట్లను ఢీకొన్న పడవలను వరద తగ్గాక తొలగిస్తామన్నారు. ప్రకాశం బ్యారేజీ చరిత్రలోనే ఇంత పెద్ద ఎత్తున వరద రాలేదని.. భవిష్యత్తులో కరకట్టలను మరింత పటిష్ఠం చేసేలా చర్యలు తీసుకుంటామని తెలిపారు. విజయవాడలో వరద ప్రభావిత ప్రాంతాల్లో సహాయ చర్యలు ముమ్మరం చేశారని.. ప్రతి ఇంటికీ ఆహారం, తాగునీరు, పండ్లు పంపిణీ చేస్తున్నామన్నారు. రోడ్లపై బురద తొలగించేందుకు సిబ్బందిని రప్పించే పనిలో ఉన్నామని..పడవలు, ట్రాక్టర్ల ద్వారా ఆహారం పంపిణీ చేస్తున్నామన్నారు.