స్టీల్‌ ప్లాంటు ఉద్యోగుల పరిస్థితి ఏమిటి?

విశాఖపట్నం స్టీల్‌ప్లాంటులో ఉత్పత్తి మెరుగుదలకు ఎటువంటి చర్యలు చేపట్టని యాజమాన్యం ఉద్యోగులు, కార్మికుల సంఖ్య కుదింపునకు మాత్రం పక్కా ప్రణాళిక సిద్ధం చేసింది. ఇప్పుడున్న ఉద్యోగుల్లో మూడో వంతు మందిని 2025 మార్చి నాటికి తగ్గించాలని కేంద్ర ఉక్కు మంత్రిత్వ శాఖ ఆదేశించింది. దానికి అనుగుణంగా యాజమాన్యం రకరకాల పేర్లతో ఇప్పటినుంచే సిబ్బందిని తగ్గించే ప్రయత్నం చేస్తోంది.స్టీల్‌ ప్లాంటు వార్షిక ఉత్పత్తి సామర్థ్యం ఏడాదికి 70 లక్షల టన్నులు. దీనికి 15 వేల మంది రెగ్యులర్‌ సిబ్బంది (అధికారులు, కార్మికులు) అవసరం. కానీ ఇప్పుడు 12 వేల మంది మాత్రమే ఉన్నారు. వారి సంఖ్య కూడా మార్చి 31 నాటికి 9,500కి తీసుకురావాలని లక్ష్యంగా పెట్టుకున్నారు. ఇందులో భాగంగా కొందరిని ఇతర ప్లాంట్లకు డిప్యుటేషన్‌పై పంపడానికి ఏర్పాట్లు చేస్తున్నారు. మరికొందరిని స్వచ్ఛంద పదవీ విరమణ పథకం (వీఆర్‌ఎస్‌) కింద పంపించేయాలని ప్లాన్‌ చేశారు. దీనికి కేంద్ర ప్రభుత్వం రూ.1,250 కోట్లు కేటాయించింది. ముడి పదార్థాల కొనుగోలుకు నిధులు లేవని, నిర్వహణ మూలధనం సర్దుబాటు చేయాలని ఉద్యోగ, కార్మిక సంఘాలు కొన్ని నెలలుగా డిమాండ్‌ చేస్తుంటే పట్టించుకోని ప్రభుత్వం వీఆర్‌ఎస్‌కు మాత్రం నిధులు కేటాయించింది. ఇక కాంట్రాక్టు కార్మికుల విషయానికి వస్తే వారు ప్రస్తుతం 12 వేల మంది ఉన్నారు. వారిని 33 శాతం తగ్గించాలని లక్ష్యంగా పెట్టుకున్నారు. దీనికోసం కొన్ని విభాగాల్లో రోజు తప్పించి రోజు విధులకు రావాలని ఇప్పటికే ఆదేశాలు జారీ చేశారు. మరికొన్ని విభాగాల్లో వారానికి ఐదు రోజులే పనిచేయాలని, నెలకు 20 రోజులకు మించి చేయడానికి వీల్లేదని ఆంక్షలు పెట్టారు. పరోక్షంగా పని దినాలు తగ్గించేస్తున్నారు. దీనితో ఉద్యోగులు ఆందోనళలో ఉన్నారు.