తోడేళ్లతో వీరోచిత పోరాటం చేసి.. బిడ్డను కాపాడుకున్న తల్లి

ఉత్తరప్రదేశ్‌లో తోడేళ్లు మనుషుల ప్రాణాలు తోడేస్తున్నాయి. బహ్రెయిచ్ జిల్లాలో తోడేళ్ల గుంపు గ్రామాల్లోకి చొరబడి... దాడులు చేస్తుండటంతో జనం వణికిపోతున్నారు. మూడు నెలల్లో తోడేళ్ల దాడుల్లో 9 మంది చనిపోగా.. మరో 30 మందికిపైగా గాయపడ్డారు. ఈ క్రూర జంతువులు చిన్నారులనే టార్గెట్ చేస్తున్నాయి. ఈ నేపథ్యంలో ఓ మహిళ..తోడేళ్లతో వీరోచిత పోరాటం చేసి తన బిడ్డను రక్షించించుకుంది. మృత్యువుకు ఎదురొడ్డి పోరాడిన ఆ తల్లి ధైర్యసాహసాల ముందు ఆ తోడేలు తోక ముడవక తప్పలేదు. బిడ్డకు తల్లి రక్షణ కవచంగా నిలిచి.. వారి ప్రాణాలకు తన ప్రాణాలను అడ్డువేస్తుందనడానికి ఈ ఘటన ప్రత్యక్ష ఉదాహరణ.

హర్ది ప్రాంతంలో జరిగిన ఈ ఘటనకు సంబంధించిన వివరాల్లోకి వెళ్తే.. పూరే దిల్‌దార్‌సింగ్‌ గ్రామానికి చెందిన ఐదేళ్ల బాలుడు పరాస్‌, తన తల్లి గుడియా పక్కన నిద్రిస్తున్నాడు. ఆదివారం తెల్లవారుజామున వింత శబ్దం విని ఆమె ఒక్కసారిగా మేల్కొంది. కళ్లు తెరిచి చూసే సరికి ఎదురుగా తోడేలు. తన కుమారుడి మెడ పట్టుకుని లాక్కెళ్తోంది. దీంతో ఆ తల్లి ఏ మాత్రం కూడా ఆలస్యం చేయకుండా.. మంచంపై నుంచి శివంగిలా దూకి తోడేలు వైపు దూసుకెళ్లింది. భయపడకుండా ఆ క్రూర జంతువు మెడ చుట్టూ రెండు చేతులు గట్టిగా బిగించి అదిమి పట్టుకుంది. వెంటనే సాయం కోసం కేకలు వేసింది.

దీంతో ఆ తోడేలు ఆ బాబును వదిలి అక్కడి నుంచి పరారైంది. దాడిలో గాయపడిన బాలుడ్ని అనంతరం కుటుంబసభ్యులు సమీపంలోని ఆసుపత్రికి తరలించారు. ప్రస్తుతం ఆ బాలుడు కోలుకుంటున్నాడు. ప్రాణాలకు తెగించి బిడ్డను రక్షించుకున్న ఆ మాతృమూర్తి ధైర్య సాహసాలను అందరూ మెచ్చుకుంటున్నారు. ‘మరో ఆలోచనకు తావివ్వకుండా నేను నులక మంచం నుంచి దూకి తోడేలు వద్ద పరుగెత్తాను.. బిడ్డను కాపాడే ప్రయత్నంలో నేను ఆ అడవి జంతువుపైకి విసిరి, దాని మెడ చుట్టూ నా చేతులను గట్టిగా చుట్టాను. నేను తోడేలును నా శక్తితో గొంతు పిసికి చంపడానికి ప్రయత్నించాను.. దీంతో అది పట్టుకోల్పోయి పారస్‌ను వదలి పారిపోయింది’ అని చెప్పారు. మరోసారి తన కొడుకుపై ఆ తోడేలు దాడిచేస్తే చంపేస్తానని అన్నారు.

బాలుడు మాట్లాడుతూ.. మా ఇంటికి గుమ్మం లేదని, నేను అమ్మ పక్కన నిద్రపోతున్న సమయంలో తోడేలు దాడిచేసిందని అన్నాడు. మా అమ్మ వల్లే నేను ప్రాణాలతో ఉన్నానని చెప్పాడు. కాగా, తోడేలు దాడిలో అంజలి అనే ఓ రెండేళ్ల చిన్నారి సోమవారం తెల్లవారుజామున ప్రాణాలు కోల్పోయింది. అమ్మ పక్కనే నిద్రపోతున్న ఆ చిన్నారిని తోడేలు ఎత్తుకెళ్లింది. ఈ విషయం తెలిసి అక్కడకు చేరుకున్న అటవీ సిబ్బంది చుట్టుపక్కల గాలించారు. కానీ, దాని జాడ దొరకలేదు. తోడేళ్లను పట్టుకోడానికి యూపీ ఆపరేషన్ భేడియాను చేపట్టారు.