కోల్‌కతా డాక్టర్ కేసులో.. ఆర్జీ కార్ మెడికల్ కాలేజీ మాజీ ప్రిన్సిపల్ అరెస్ట్

కోల్‌కతాలోని ఆర్జీ కర్ మెడికల్ కాలేజీ ఆసుపత్రి మాజీ ప్రిన్సిపాల్ సందీప్ ఘోష్‌ ను సీబీఐ అరెస్టు చేసింది. మెడికల్ కాలేజీ, ఆసుపత్రిలో ఆర్థిక అవకతవకలకు పాల్పడ్డారనే ఆరోపణలపై ఆయనను రెండు వారాల పాటు సుదీర్ఘంగా విచారించిన సీబీఐ.. సోమవారం రాత్రి అదుపులోకి తీసుకుంది. ఆయనతో పాటు మరో ముగ్గుర్ని సీబీఐ అరెస్ట్ చేసి జైలుకు తరలించింది. ఘోష్ హయాంలో అక్రమాలు జరిగినట్టు సీబీఐ ఎఫ్ఐఆర్ నమోదు చేసిన విషయం తెలిసిందే. కోల్‌కతా హైకోర్టు ఆదేశాల మేరకు ఘోష్‌తో పాటు మరో రెండు ప్రైవేటు సంస్థలపై కూడా సీబీఐ అభియోగాలు మోపింది. ఆసుపత్రికి ఔషధాలు సరఫరా చేసిన బిప్లవ్ సింఘా, సుమన్ హజారాతో పాటు సెక్యూరిటీ గార్డు అఫ్సార్ అలీలను సీబీఐ అరెస్ట్ చేసినట్టు విశ్వసనీయ వర్గాలు వెల్లడించాయి.

 అవినీతి కేసుకు సంబంధించి ఘోష్ నివాసంలో ఆగస్టు 25న సీబీఐ సోదాలు నిర్వహించింది. ఆర్జీ కర్ ఆసుపత్రిలో ఆగస్టు 9న జరిగిన జూనియర్ వైద్యురాలి హత్యాచార ఘటనపై సీబీఐ దర్యాప్తు చేపట్టింది. మరోవైపు, ఘోష్ తన హయాంలో ఆర్థిక అవకతవకలకు పాల్పడ్డారనే ఆరోపణలపై మనీలాండరింగ్ కేసు కింద ఎన్‌ఫోర్స్‌మెంట్ డైరెక్టరేట్ (ఈడీ) కూడా విచారణ జరుపుతోంది. శవాలతో వ్యాపారం చేశాడని, బయోమెడికల్ వ్యర్థాల రవాణా, ఔషధాలు, వైద్య పరికరాల సరఫరాదారులు చెల్లించే కమీషన్‌కు అనుకూలంగా టెండర్లు ఖరారు, పరీక్షల్లో ఉత్తీర్ణత సాధించేందుకు ₹ 5 నుంచి 8 లక్షల వరకు చెల్లించాలని విద్యార్థులపై ఒత్తిడి తెచ్చారని ఆరోపిస్తూ ఆర్జీ కర్ మెడికల్ కాలేజీ మాజీ డిప్యూటీ సూపరింటిండెంట్ అక్తర్ అలీ కలకత్తా హైకోర్టులో పిటిషన్ వేశారు. ఈ పిటిషన్‌పై విచారణ చేపట్టిన హైకోర్టు.. ఈడీ దర్యాప్తునకు ఆదేశించింది.

ఈ ఆరోపణల నేపథ్యంలో సందీప్ ఘోష్ సభ్యత్వాన్ని ఇండియన్ మెడికల్ అసోసియేషన్ (ఐఎంఏ) ఇటీవల రద్దు చేసింది. ఘటన జరిగిన వెంటనే ఎందుకు ఫిర్యాదు చేయలేదని సుప్రీంకోర్టు సైతం ఘోష్ వైఖరిని ప్రశ్నించింది. ఇక, హత్యాచార ఘటన అనంతరం గంటల వ్యవధిలోనే ఘోష్‌ను ఆర్జీ కర్ మెడికల్ కాలేజీ నుంచి బదిలీ చేశారు. దీనిపై తీవ్ర విమర్శలు వ్యక్తం కావడంతో రాజీనామా చేయకతప్పలేదు. ఈ విషయంలో మమతా బెనర్జీ సర్కారు వ్యహరించిన తీరుపై అనుమానాలు వ్యక్తమయ్యాయి. మరోవైపు, యావత్తు దేశాన్ని తీవ్ర దిగ్భ్రాంతికి గురిచేసిన కోల్‌కతా ట్రెయినీ వైద్యురాలి హత్యాచారం కేసులో ప్రధాన నిందితుడితో పాటు మాజీ ప్రిన్సిపాల్ సందీప్ ఘోష్‌కు రెండుసార్లు పాలీగ్రాఫ్ టెస్ట్ కూడా నిర్వహించారు.