ఆగస్ట్ నెలలో శ్రీవారి హుండీకి భారీ ఆదాయం

తిరుమల శ్రీవారిని నిత్యం వేలాది మంది భక్తులు దర్శించుకుంటూ ఉంటారు. ఎక్కడెక్కడి నుంచో వచ్చే భక్తులు.. ఎన్నో వ్యయప్రయాసలకోర్చి వెంకన్నను దర్శించుకుని తరిస్తూ ఉంటారు. ఇక వెంకన్న దర్శనం తర్వాత శ్రీవారి హుండీలో కానుకలు సమర్పించుకుని మొక్కులు చెల్లించుకుంటూ ఉంటారు. అయితే ఏటా శ్రీవారిని దర్శించుకునే భక్తుల సంఖ్య పెరుగుతూ ఉన్నట్లుగానే.. శ్రీవారి హుండీ ఆదాయం కూడా పెరుగుతూ వస్తోంది. ఈ వివరాలను తిరుమల తిరుపతి దేవస్థానం ఎప్పటికప్పడు వెల్లడిస్తూనే ఉంటుంది. నెలమొత్తంలో శ్రీవారి హుండీకి వచ్చిన ఆదాయాన్ని నెల పూర్తైన తర్వాత వెల్లడించడం ఆనవాయితీ. ఈ క్రమంలోనే ఆగస్టు నెలలో శ్రీవారి హుండీ ఆదాయం ఎంతో టీటీడీ వెల్లడించింది.

ఆగస్ట్ నెలలో శ్రీవారి హుండీకి రికార్డు స్థాయిలో ఆదాయం వచ్చింది. ఈ ఏడాదిలోనే అత్యధిక ఆదాయం ఆగస్ట్ నెలలో వచ్చినట్లు టీటీడీ తెలిపింది. ఆగస్టు నెలలో భక్తుల రద్దీకి తగినట్లుగానే ఆదాయం కూడా పెరిగినట్లు టీటీడీ వెల్లడించింది. డయల్ యువర్ ఈవో కార్యక్రమంలో టీటీడీ ఈవో శ్యామలరావు ఈ వివరాలను వెల్లడించారు. 2024లో మొదటి ఏడు నెలల్లో శ్రీవారి హుండీకి రూ.795.35 కోట్ల ఆదాయం వచ్చినట్లు టీటీడీ తెలిపింది. అయితే ఆగస్ట్ నెలలో శ్రీవారి హుండీ ఆదాయం రూ.125. 67 కోట్లు సమకూరినట్లు టీటీడీ తెలిపింది. ఈ ఏడాదిలో ఇదే అత్యధికమని చెప్పిన తిరుమల తిరుపతి దేవస్థానం.. దీనితో కలిపి ఈ ఏడాది ఇప్పటి వరకూ శ్రీవారి హుండీ ఆదాయం రూ. 921.02 కోట్లకు చేరినట్లు తెలిపింది.

శ్రీవారి హుండీ ఆదాయం నెలవారీ లెక్కల విషయానికి వస్తే జనవరిలో రూ.116.46 కోట్లు ఆదాయం సమకూరితే.. ఫిబ్రవరిలో రూ.111.71 కోట్లు వచ్చింది. మార్చిలో రూ 118.49 కోట్లు, ఏప్రిల్ నెలలో రూ 101. 63 కోట్లు ఆదాయం వచ్చింది. ఇక మే నెలలో రూ 108.28 కోట్ల ఆదాయం సమకూరితే.. జూన్ నెలలో 113. 64 కోట్ల రూపాయల ఆదాయం వచ్చింది. జులై నెలలో ఏకంగా రూ. 125. 35 కోట్లు ఆదాయం వస్తే.. ఆ రికార్డును తిరగరాస్తూ ఆగస్ట్ నెలలో శ్రీవారి హుండీ ఆదాయం రూ.125.67 కోట్లు వచ్చింది. ఇక ఆగస్టు నెలలో తిరుమల శ్రీవారిని 22.42 లక్షల మంది భక్తులు దర్శించుకున్నారని టీటీడీ ఈవో శ్యామలరావు వెల్లడించారు.