ఏపీ వరద బాధితుల ,,,,కరెంట్ బిల్లులు, బకాయిలు వాయిదా

ఆంధ్రప్రదేశ్ వరద ప్రాంతాల్లో ఈ నెల కరెంటు బిల్లుల వసూలుపై ముఖ్యమంత్రి నారా చంద్రబాబు నాయుడు కీలక ప్రకటన చేశారు. వరద ప్రభావిత ప్రాంతాల్లో కరెంట్ బిల్లుల్ని వాయిదా వేస్తున్నట్లు తెలిపారు. వరదల్లో పాడైపోయిన వాటి మరమ్మత్తులకు రేట్లను ప్రభుత్వమే ఖరారు చేయాలని.. ఎవరికి ఇష్టం వచ్చిన రేట్లు వాళ్ళు డిమాండ్‌ చేసి ప్రజలను దోచుకోకుండా చూడాలని భావిస్తున్నామన్నారు. అలాగే వరదల్లో నష్టపోయిన వాహనాల రిపేర్లు, ఎలక్ట్రానిక్ పరికరాల రిపేర్లు, గ్యాస్‌ స్టవ్‌ల రిపేర్లు.. ఇలా ఏ రిపేర్‌కు అయినా ఒక రేటును ప్రభుత్వం నిర్ణయిస్తుంది అన్నారు. ఆన్‌లైన్‌లో ఇటువంటి సేవలు అందించేవారితో కూడా మాట్లాడుతున్నట్లు చెప్పారు.

  వరద ప్రభావిత ప్రాంతాల్లో నీటి సరఫరాను పునరుద్ధరించామని.. పారిశుద్ధ్య పనులను త్వరితగతిన పూర్తి చేస్తామన్నారు. అగ్నిమాపక యంత్రాల సాయంతో ఇప్పటి వరకు 5వేల ఇళ్లను శుభ్రం చేశామని.. ఇతర రాష్ట్రాల నుంచి అగ్నిమాపక యంత్రాలను తెప్పిస్తున్నట్లు చెప్పారు. కొన్ని ప్రాంతాల్లో వరద నీరు నిల్వ ఉన్నాయని.. అవి తప్పితే ఇప్పటివరకు యుద్ధప్రాతిపదికన చాలా ప్రాంతాల్లో విద్యుత్‌ను పునరుద్ధరించామన్నారు. అలాగే వరద ప్రభావిత ప్రాంతాల్లో వైద్య శిబిరాలు ఏర్పాటు చేశామని.. అవసరమైన చోట ఉచిత బస్సు రవాణా సౌకర్యాన్ని కల్పిస్తామన్నారు.

నేటి నుంచి మూడు రోజుల పాటు రోజుకు 80,000 మందికి చొప్పున నూడుల్స్‌ ప్యాకెట్లు, ఆరు యాపిల్స్, ఆరు బిస్కట్లు, పాలు, వాటర్‌ బాటిళ్లు అందిస్తామని, అలాగే చౌకగా కూరగాయలు కూడా అందించే ఏర్పాట్లు చేస్తున్నామని చంద్రబాబు తెలిపారు. వరద బాధితులకు కూరగాయలన్నీ రూ.2, రూ.5, రూ.10కే అందిస్తామన్నారు. ఒక్కో ఇంటికి 25 కిలోల బియ్యం, లీటర్‌ పామాయిల్‌, కిలో పప్పుతో కిట్‌లు అందిస్తున్నామన్నారు. వరద బాధితుల అవసరాలు తీర్చేందుకు కృషి చేస్తున్నామని.. 20కి పైగా సెల్‌ఫోన్ టవర్ల పునరుద్ధరణకు చర్యలు తీసుకుంటున్నామన్నారు. పారిశుద్ధ్యం, వైద్య శిబిరాలు, సాధారణ స్థితిపై ప్రజల నుంచి అభిప్రాయాలు తీసుకుంటామన్నారు.

ఆంధ్రప్రదేశ్‌కు కేంద్రప్రభుత్వం అండగా ఉంటుందన్నారు కేంద్ర వ్యవసాయశాఖ మంత్రి శివరాజ్‌సింగ్ చౌహాన్. ఆయన ఏపీలోని వరద ప్రభావిత ప్రాంతాల్లో పర్యటించారు. భారీ వర్షాలు, వరదలతో తీవ్రంగా దెబ్బతిన్న రాష్ట్రానికి అవసరమైన సహకారాన్ని కేంద్రం అందిస్తుందన్నారు. ప్రాథమిక అంచనాల ప్రకారం 1.8 లక్షల హెక్టార్లలో పంట దెబ్బతిందని.. 2 లక్షల మంది రైతులు నష్టపోయారని ఆయన తెలిపారు. వరద నష్టంపై నిపుణుల బృందాలు అధ్యయనం చేస్తున్నాయని.. అది పూర్తవగానే కేంద్రం నుంచి తక్షణ, దీర్ఘకాలిక సాయం తప్పక అందుతుందన్నారు. రాష్ట్ర ప్రభుత్వం అంత వేగంగా, సమర్థంగా పనిచేయకపోతే ప్రాణనష్టం తీవ్రత ఊహకందేది కాదన్నారు. వరద బాధితుల్ని ఆదుకునేందుకు రాష్ట్ర ప్రభుత్వం అన్ని అవకాశాల్నీ వినియోగించుకుందని.. డ్రోన్ల ద్వారా పాలు, మంచినీళ్లు, ఆహారం అందజేయడం మొదటిసారి ఇక్కడే చూస్తున్నానని తెలిపారు. ముఖ్యమంత్రి చంద్రబాబు అడిగిన వెంటనే ప్రధాని, కేంద్ర హోంమంత్రులు పంపిన ఎన్‌డీఆర్‌ఎఫ్‌ బృందాలు, వాయుసేన, నౌకాదళాలకు చెందిన హెలికాప్టర్లు బాధితులకు సాయం అందించాయన్నారు. మరోవైపు కేంద్రం నుంచి వచ్చిన బృందం కూడా ఏపీలోని వరద ప్రభావిత ప్రాంతాల్లో పర్యటిస్తోంది.