కంటతడి పెట్టిస్తున్న కోల్‌కతా హత్యాచార బాధితురాలి తల్లి లేఖ

నెల రోజుల క్రితం పశ్చిమ బెంగాల్‌లోని ఆర్‌జీ కర్ మెడికల్ కాలేజీ ఆస్పత్రిలో ఓ ట్రైనీ డాక్టర్‌పై జరిగిన అత్యాచారం, హత్య ఘటన దేశం మొత్తాన్ని తీవ్ర విషాదంలోకి నెట్టింది. ఇక ఈ దారుణానికి పాల్పడిన నిందితుడిని ఉరి తీయాలని దేశం మొత్తం డిమాండ్ చేస్తున్నారు. అయితే ఆ ట్రైనీ డాక్టర్‌పై గ్యాంగ్ రేప్ జరిగిందని గత కొన్ని రోజులుగా వస్తున్న వార్తలను.. ఈ కేసు విచారణ చేస్తున్న సీబీఐ అధికారులు కొట్టిపారేశారు. ఘటన జరిగిన సమయంలో నిందితుడు సంజయ్ రాయ్ ఒక్కడే ఉన్నాడని తేల్చారు. ఈ క్రమంలోనే గురువారం ఉపాధ్యాయ దినోత్సవం సందర్భంగా.. బాధితురాలి తల్లి ఒక లేఖను విడుదల చేశారు. ఆ ట్రైనీ డాక్టర్ కలలను నిజం చేయడంలో సహకరించిన ప్రతీ ఒక్క టీచర్‌కు ఆమె ధన్యవాదాలు తెలిపారు. అంతేకాకుండా వైద్య వృత్తి పట్ల తన కుమార్తెకు ఉన్న అమితమైన ప్రేమను ఆ లేఖలో పేర్కొనడంతో.. అది చదివినవారు కంటతడి పెట్టకుండా ఉండలేకపోతున్నారు.

టీచర్స్ డే సందర్భంగా.. తన కుమార్తె తరఫున ఆమె ఉపాధ్యాయులందరికీ తన తరఫున శుభాకాంక్షలు తెలిపారు. తన కుమార్తె చిన్నతనం నుంచి ఆమె కలలు కన్న డాక్టర్‌ వృత్తిని చేపట్టేవరకు అండగా నిలిచిన ప్రతీ ఒక్కరికీ ధన్యవాదాలు చెప్పారు. డాక్టర్ కావాలి అనేది తన కుమార్తె చిన్ననాటి కల అని.. అయితే డబ్బు కోసం కాకుండా వీలైనంత ఎక్కువమందికి మెరుగైన వైద్యం అందిచాలనేది ఆమె కోరిక అని పేర్కొంది. ఉపాధ్యాయ దినోత్సవం సందర్భంగా ఆ లేఖను సోషల్‌ మీడియాలో బాధితురాలి తల్లి షేర్ చేశారు.

తల్లిదండ్రులుగా తాము ఆమెకు అవసరమైన సహాయం అందించామని.. తన కుమార్తెకు మంచి ఉపాధ్యాయులు లభించినందునే.. ఆమె డాక్టర్ కావాలనే తన కలను నెరవేర్చుకుని చివరికి తెల్లకోటు వేసుకోగలిగిందని పేర్కొన్నారు. తన కుమార్తె ఎప్పుడూ ఒకే విషయం చెప్పేదని.. "అమ్మా, నాకు డబ్బు అవసరం లేదు. నా పేరు ముందు నాకు చాలా డిగ్రీలు కావాలి. వీలైనంత ఎక్కువ మంది రోగులను నయం చేయాలనుకుంటున్నాను" అని ఆమె తీవ్ర భావోద్వేగంతో లేఖ రాశారు. ఇక తన కుమార్తెపై అఘాయిత్యం జరిగిన గురువారం రోజున కూడా ఆమె ఇంటి నుంచి వెళ్లి ఆస్పత్రిలో చాలా మంది రోగులకు సహాయం చేసిందని గుర్తు చేశారు. విధుల్లో ఉండగానే తన కుమార్తెను హత్య చేశారని తెలిపారు. తన కుమార్తెను మాత్రమే కాకుండా.. ఆమె కలలను కూడా దారుణంగా చంపేశారని లేఖలో కన్నీరు మున్నీరుగా విలపించారు. అదే విధంగా తన కూతురైన డాక్టర్‌కు న్యాయం చేయాలంటూ ఈ సందర్భంగా ఆమె విజ్ఞప్తి చేశారు.

ఇదే సందర్భంగా ఆర్‌జీ కర్ మెడికల్ కాలేజీలోని ప్రొఫెసర్లు, డాక్టర్లు, మెడికల్ ఆఫీసర్లు, నర్సింగ్ సిబ్బంది ఒకే కర్తవ్యం, ఒక విన్నపమని పేర్కొన్నారు. ఈ ఘటనకు సంబంధించి వారి వద్ద ఏదైనా సమాచారం ఉంటే దయచేసి ముందుకు వచ్చి పోలీసులు, అధికారులకు తెలపండి అంటూ విన్నవించారు. ఎందుకంటే మంచి వారి మౌనం.. నేరస్తులకు ధైర్యాన్ని కలిగిస్తుందని తాను నమ్ముతున్నట్లు తెలిపారు. తన కుమార్తెకు న్యాయం చేయాలనే ఉద్యమానికి మద్దతు ఇస్తూ, టీచర్స్‌ డే సందర్భంగా ఉపాధ్యాయులందరినీ సన్మానిస్తూ.. తన కుమార్తెకు న్యాయం జరుగుతుందని ఆశిస్తున్నట్లు చెప్పారు.