కూటమి నేతల మధ్య బ్యానర్ చిచ్చు,,,,జనసేన నేతతో కాళ్లు మొక్కించుకున్న టీడీపీ లీడర్

ఓ బ్యానర్ చించడం రెండు పార్టీల మధ్య వివాదానికి కారణమైంది. చివరకు మిత్రపక్షానికి చెందిన నేతతోనే కాళ్లు పట్టించుకునే పరిస్థితి తెచ్చింది. ఈ వ్యవహారం మచిలీపట్నంలో జరిగింది. వినాయకచవితిని పురస్కరించుకుని మచిలీపట్నంలోని పరాసుపేటలో కూటమి నేతలు ఫ్లెక్సీలు ఏర్పాటు చేయించారు. ప్రజలకు పండుగ శుభాకాంక్షలు తెలియజేస్తూ బ్యానర్లు కట్టించారు. అయితే ఈ బ్యానర్లలో తమ ఫోటో లేదని జనసేన నేతలు అభ్యంతరం వ్యక్తం చేశారు. కూటమి పార్టీల బ్యానర్లలో తమ ఫోటో లేకపోవటం ఏమిటంటూ ఆవేశంతో రాత్రిపూట బ్యానర్ చించేశారు. జనసేన నేతలు యర్రంశెట్టి నాని, శ్రీనివాసరావు రెండు రోజుల క్రితం ఈ బ్యానర్ చించేశారు.

అయితే ఈ విషయం తెలిసీ స్థానిక టీడీపీ నేతలు ఫైర్ అయ్యారు. యర్రంశెట్టి నాని ఇంటికి చేరుకుని ఆయనపై దాడి చేసినట్లు తెలిసింది. ఇదే సమయంలో బ్యానర్ చించేశారనే కోపంతో ఇల్లు మొత్తం ధ్వంసం చేశారు. దీంతో మచిలీపట్నంలో యవ్వారం టీడీపీ వర్సెస్ జనసేనగా మారిపోయింది. దీంతో పరిస్థితులను చక్కదిద్దేందుకు స్థానికంగా ఉన్న కూటమి పార్టీల పెద్దలు రంగంలోకి దిగారు. రెండు వర్గాలకు నచ్చజెప్పారు. అయితే సెటిల్‌మెంట్ చేసిన మరుసటి రోజే మరోసారి జనసేన నేత యర్రంశెట్టి శ్రీనివాస్ ఇంటిపై దాడి జరిగింది. టీడీపీ నేతలు మరోసారి నాని ఇంటిపై దాడిచేశాయి. అలాగే అక్కడే ఉన్న మరో జనసేన నేత శాయన శ్రీనివాసరావుపైనా చేయి చేసుకున్నారు.

టీడీపీ శ్రేణుల దాడిలో జనసేన నేత శాయన శ్రీనివాసరావుకు గాయాలు కూడా అయ్యాయి. దీంతో భయపడిపోయిన జనసేన నేతలు యర్రంశెట్టి నాని, శాయన శ్రీనివాసరావు.. టీడీపీ నేత శంఖు శ్రీను కాళ్లు మొక్కి క్షమాపణలు చెప్పారు. అయితే ఈదాడి, కాళ్లు మొక్కిన వీడియోలు ఎవరో వీడియో తీసి సోషల్ మీడియాలో పోస్ట్ చేశారు. దీంతో ప్రస్తుతం నెట్టింట అవి చక్కర్లు కొడుతున్నాయి. అలాగే టీడీపీ, జనసేన నేతలు కూడా పరస్పరం చిలకలపూడి పోలీస్ స్టే్షన్‌లో ఫిర్యాదు చేసుకోవటంతో వ్యవహారం మరింత వేడెక్కి.. టీడీపీ వర్సెస్ జనసేనగా మారింది.

మరి ఈ విషయం రెండు పార్టీల అధిష్టానం దృష్టికి చేరుతుందా.. చేరితే పార్టీల అధిష్టానాలు ఎలా స్పందిస్తాయనేదీ తెలియాల్సి ఉంది. ఎందుకంటే ఎన్నికల సమయంలో టీడీపీ, జనసేన, బీజేపీ పార్టీల సమన్వయంతోనే ఏపీలో కూటమి ప్రభుత్వం అధికారంలోకి వచ్చింది. వైసీపీపై గ్రాండ్ విక్టరీ కొట్టి ప్రభుత్వాన్ని ఏర్పాటు చేయగలిగింది. అయితే ప్రభుత్వం ఏర్పడి మూడు నెలలు కూడా పూర్తికాకకముందే ఇలా మిత్రపక్షాల నేతల మధ్య లుకలుకలు వెలుగుచూడటంపై అధిష్టానాలు ఎలా రియాక్ట్ అవుతాయో చూడాలి మరి.