పట్టపగలు స్కూల్‌లోనే బీర్లు తాగిన విద్యార్థినులు

స్కూల్ అంటే విద్యార్థులు ఏం చేస్తారు. చదువుకుంటారు, ఆడుకుంటారు, పాడుకుంటారు. కానీ వీళ్లు మాత్రం వాటితో పాటు ఇంకో పని కూడా చేశారు. పట్ట పగలే, స్కూల్ నడుస్తుండగానే.. క్లాస్ రూమ్‌లో మద్యం సేవిస్తూ కనిపించారు. అయితే ఆ విద్యార్థినులు బీర్లు తాగుతూ ఉన్న వీడియో ప్రస్తుతం సోషల్ మీడియాలో తెగ వైరల్ అవుతోంది. క్లాస్ రూంలోనే కూర్చొని బాలికలు బీర్లు, కూల్ డ్రింక్స్, స్నాక్స్‌తో ఉన్న ఫోటోలు, వీడియోలు చక్కర్లు కొడుతోంది. ఈ ఘటన తీవ్ర దుమారం రేపడంతో అధికారులు రంగంలోకి దిగారు. ఈ సంఘటన ఛత్తీస్‌గఢ్‌లో చోటు చేసుకుంది.

ఛత్తీస్‌గఢ్‌లోని బిలాస్‌పుర్ జిల్లా భట్‌చౌరా గ్రామంలో జరిగిన ఈ సంఘటన ప్రస్తుతం సంచలనంగా మారింది. స్థానికంగా ఉన్న ఓ ప్రభుత్వ పాఠశాలలో విద్యార్థినులు బీర్‌ తాగుతున్న వీడియో సోషల్‌ మీడియాలో వైరల్‌గా మారింది. తరగతి గదిలోనే కూర్చున్న విద్యార్థినులు బీర్లు, కూల్‌డ్రింక్స్‌ తాగుతున్నట్లుగా ఉన్న ఆ వీడియో వైరల్ అయింది. ఈ విషయం కాస్తా విద్యాశాఖ దృష్టికి వెళ్లడంతో ఈ ఘటనపై సమగ్ర విచారణ ప్రారంభించినట్లు అధికారులు వెల్లడించారు. అయితే ఆ విద్యార్థినుల వీడియోలను వారే తీసి సోషల్ మీడియాలో పోస్ట్ చేసినట్లు తెలుస్తోంది.

ఈ ఘటనకు సంబంధించిన వీడియోలు ఆన్‌లైన్‌లో చక్కర్లు కొడుతుండటంతో అధికారులు సీరియస్‌గా తీసుకున్నారు. దీనిపై విచారణ జరిపేందుకు ముగ్గురు సభ్యులతో ఒక కమిటీని ఏర్పాటు చేసినట్లు జిల్లా విద్యాశాఖ అధికారి టీఆర్ సాహు తెలిపారు. ఇక కమిటీ దర్యాప్తులో భాగంగా విద్యార్థులు, ఉపాధ్యాయులను ప్రశ్నించి వారు చెప్పిన విషయాలను నమోదు చేశారు. అయితే తమ ఫ్రెండ్ బర్త్ డే సందర్భంగా స్కూల్‌లోనే సెలబ్రేషన్స్ నిర్వహించామని.. అందులో భాగంగా తరగతి గదిలోనే బీర్‌ సేవించినట్లు ఇతర విద్యార్థులు తెలిపారు. అయితే వీడియోలో ఉన్న విద్యార్థులు తాము మద్యం తాగలేదని కేవలం వీడియో తీసే సమయంలో పక్కన పెట్టుకున్నట్లు కమిటీ సభ్యులకు వెల్లడించారు.

ఈ వ్యవహారంపై జిల్లా విద్యాశాఖ స్పందించింది. ఇక నుంచి పాఠశాలల్లో ఇలాంటి ఘటనలు మళ్లీ జరగకుండా కట్టడి చేస్తామని చెప్పారు. స్కూల్‌ ప్రిన్సిపల్‌, సంబంధిత అధికారులపై తగిన చర్యలు తీసుకుంటామని పేర్కొన్నారు. ఈ ఘటనలో ప్రమేయం ఉన్న విద్యార్థుల తల్లిదండ్రులకు నోటీసులు పంపించి.. వారి నుంచి వివరణ తీసుకుంటామని తెలిపారు.