మళ్లీ మండుతున్న మణిపూర్.. కర్ఫ్యూ విధింపు

ఈశాన్య రాష్ట్రం మణిపూర్‌ మరోసారి తీవ్ర ఉద్రిక్తతలకు నిలయం అయింది. గతేడాది ఆ రాష్ట్రంలోని మెయితీ, కుకీ తెగల మధ్య తలెత్తిన ఘర్షణ ఇంకా చల్లారడం లేదు. గత కొన్ని నెలలుగా అక్కడ పరిస్థితి సద్దుమణిగినట్లే కనిపించినా.. కొన్ని రోజులుగా మళ్లీ హింసాత్మక ఘటనలు పెరుగుతూనే ఉన్నాయి. ఈ క్రమంలోనే గత 10 రోజుల్లోనే 11 మంది మృత్యువాత పడటంతో మళ్లీ పాత రోజులు వచ్చాయి. దీంతో ఆగ్రహించిన విద్యార్థులు రాజ్‌భవన్ ముట్టడికి యత్నించగా తీవ్ర ఉద్రిక్త పరిస్థితులు చోటుచేసుకున్నాయి. బీజేపీ సర్కార్‌కు వ్యతిరేకంగా విద్యార్థులు మంగళవారం చేపట్టిన నిరసన కార్యక్రమాలు ఉద్ధృతం కావడంతో ప్రభుత్వం చర్యలు చేపట్టింది. అక్కడ కర్ఫ్యూ విధించగా.. ఇంటర్నెట్ కూడా రద్దు చేశారు.

ఖ్వైరంబంద్ మహిళా మార్కెట్ వద్ద సోమవారం నుంచి ధర్నా చేస్తున్న వందలాది మంది విద్యార్థులు.. మంగళవారం రాజ్ భవన్‌ ముట్టడికి పిలుపునిచ్చారు. ఈ క్రమంలోనే ర్యాలీగా రాజ్ భవన్‌కు బయలుదేరగా.. కాంగ్రెస్ భవన్ వద్ద భద్రతా దళాలు వారిని అడ్డుకున్నాయి. దీంతో విద్యార్థులకు, భద్రతా దళాలకు మధ్య తీవ్ర ఘర్షణ వాతావరణం నెలకొంది. ఆగ్రహించిన విద్యార్థులు భద్రతా దళాలపై రాళ్లు రువ్వారు. వారిని కంట్రోల్ చేసేందుకు భద్రతా బలగాలు కూడా వారిపై టియర్ గ్యాస్‌ను విడుదల చేశాయి. దీంతో ఆ ప్రాంతంలో యుద్ధ వాతావరణం నెలకొంది. ఈ ఘటనతో అలర్ట్ అయిన ప్రభుత్వం.. మణిపూర్‌లోని కొన్ని జిల్లాల్లో కర్ఫ్యూ విధించింది. తదుపరి ఉత్తర్వులు వచ్చే వరకు ప్రజలు ఇళ్లలోనే ఉండాలని పోలీసులు హెచ్చరికలు జారీ చేశారు.

 ఇక గత కొన్ని రోజులుగా జరుగుతున్న నిరసనలు, అల్లర్ల కారణంగా 10 రోజుల వ్యవధిలోనే 11 మంది మృతి చెందడం అక్కడి పరిస్థితిని తెలియజేస్తోంది. ఈ క్రమంలోనే రాష్ట్ర వ్యాప్తంగా 5రోజుల పాటు ఇంటర్నెట్ సేవలను తాత్కాలికంగా నిలిపివేస్తూ ప్రభుత్వం నిర్ణయం తీసుకుంది. ఈ మేరకు మణిపూర్ హోంశాఖ ఒక ప్రకటన విడుదల చేసింది. సెప్టెంబర్ 15వ తేదీ వరకు రాష్ట్రంలో ఇంటర్నెట్ సర్వీసులపై ఆంక్షలు విధించినట్లు ప్రకటించింది. ప్రజలను రెచ్చగొట్టేలా సోషల్ మీడియాలో ఫొటోలు, వీడియోలు, హేట్ స్పీచ్‌లు షేర్ చేయకుండా ఉండేందుకే ఇంటర్నెట్‌ నిలిపివేస్తున్నట్లు ప్రభుత్వం వెల్లడించింది. మరోవైపు.. అల్లర్ల నేపథ్యంలో మణిపూర్‌లో సెప్టెంబర్ 11, 12వ తేదీల్లో అన్ని ప్రభుత్వ, ప్రైవేటు విద్యాసంస్థలకు సెలవులు ప్రకటించారు. ఒకవేళ నిరసనలు ఆగకపోతే సెలవులను మరికొన్ని రోజులు పొడిగించే అవకాశాలు ఉన్నాయి.

మణిపూర్‌లో కొండ ప్రాంతాల్లో నివసించే కుకీలు.. మైదాన ప్రాంతాల్లో నివసించే మెయితీలకు మధ్య తలెత్తిన వివాదంతో ఆ రాష్ట్రం గత ఏడాది కాలంగా రగిలిపోతోంది. ఇప్పటివరకు 220 మంది ఈ ఆందోళనల్లో ప్రాణాలు కోల్పోయారు. గతేడాది మే నెలలో ప్రారంభమైన ఈ ఘర్షణలు, దాడులు.. ఇప్పటికీ జరుగుతూనే ఉన్నాయి. సీఎం బీరెన్‌ సింగ్‌ నేతృత్వంలోని బీజేపీ ప్రభుత్వం మెయితీల పక్షం వహిస్తూ కుకీల అణచివేతకు పాల్పడుతోందనే ఆరోపణలు వెల్లువెత్తున్నాయి.