స్కూల్‌లో బాలికల నగ్న వీడియోలు తీసిన టీచర్.. ఫోన్లో 5వేలకుపైగా అశ్లీల వీడియోలు

దేశంలో వెలుగు చూస్తున్న కొన్ని ఘటనలు వింటేనే అసలు ఆడ పిల్లలను బయటికి పంపాలంటే తల్లిదండ్రులు భయపడిపోతున్నారు. బాలికలకు ఇల్లు, స్కూల్‌లోనే రక్షణ ఉంటుంది అనుకుంటే.. ప్రస్తుత కాలంలో అవి కూడా కామాంధుల ఆగడాలకు అడ్డాలుగా మారుతున్నాయి. పిల్లలకు విద్యా బుద్ధులు నేర్పించి వారిని ప్రయోజకులను చేసే దేవాలయాలే స్కూళ్లు. కానీ అలాంటి స్కూళ్లలో కూడా బాలికలకు రక్షణ లేకుండా పోయింది. ఇక దైవంతో సమానమైన టీచర్లే.. కామక్రీడలకు పాల్పడుతుంటే ఆ చిన్నారులు ఏం చేయాలో తెలియక దిక్కుతోచని స్థితిలో పడుతున్నారు. తాజాగా ఓ స్కూల్‌లో జరుగుతున్న ఘటన బయటికి రాగా.. అది బాలికల తల్లిదండ్రులను తీవ్ర దిగ్భ్రాంతికి గురి చేస్తోంది.

కర్ణాటక రాష్ట్రంలోని కోలార్ జిల్లా మూలూరు తాలూకా మొరార్జీదేశాయ్ రెసిడెన్షియల్ స్కూల్‌లో దారుణం చోటు చేసుకుంది. ఆ స్కూల్‌లో పనిచేసే డ్రాయింగ్ టీచర్ మునియప్ప.. బాలికల వీడియోలు తీస్తున్నారని ఫిర్యాదులు వెల్లువెత్తాయి. అయితే గతేడాది అతడిపై ఆరోపణలు రాగా.. అధికారులు ఆ డ్రాయింగ్ టీచర్‌ను సస్పెండ్ చేసి.. అక్కడి నుంచి వేరే స్కూల్‌కు ట్రాన్స్‌ఫర్ చేశారు. ఆ డ్రాయింగ్ టీచర్.. విద్యార్థినుల అశ్లీల ఫోటోలు, వీడియోలు తీశారని వారి తల్లిదండ్రులు పైఅధికారులకు ఫిర్యాదు చేశారు. ఈ క్రమంలోనే అతడి ఫోన్‌లను సీజ్ చేశారు. ఈ క్రమంలోనే విచారణ సందర్భంగా మునియప్ప ఫోన్లలో ఉన్న డేటాను పరిశీలించిన మాస్తి పోలీసులకు షాక్ తగిలింది.

మునియప్ప ఫోన్లలో వేల సంఖ్యలో అశ్లీల, నగ్న వీడియోలు, ఫోటోలు ఉండటం గమనించి నోరెళ్లబెట్టారు. మొత్తం 5 ఫోన్లు ఉండగా.. ఒక్కో ఫోన్లో వెయ్యికి పైగా వీడియోలు ఉన్నాయని గుర్తించారు. అందులో ఆ స్కూల్ విద్యార్థినుల వీడియోలు కూడా ఉండటం సంచలనం రేపింది. రెసిడెన్షియల్ స్కూల్‌లో విద్యార్థినులు బట్టలు మార్చుకునేవి.. బాత్రూంలలో స్నానాలు చేసిన వీడియోలు కూడా ఉండటంతో.. బాలికల తల్లిదండ్రులు తీవ్ర భయాందోళనలకు గురవుతున్నారు. దీంతో కర్ణాటక సాంఘిక సంక్షేమ శాఖ జాయింట్ డైరెక్టర్ శ్రీనివాస్ ఫిర్యాదుతో పోలీసులు మునియప్పపై పోక్సో కేసు నమోదు చేశారు.

ఈ క్రమంలోనే తనపై నమోదైన పోక్సో కేసును కొట్టివేయాలని మునియప్ప కర్ణాటక హైకోర్టులో పిటిషన్‌ దాఖలు చేశాడు. ఈ ఘటనపై విచారణ జరిపిన హైకోర్టు.. మునియప్ప చేసిన పని చాలా నీచమని, భయంకరమైందని వ్యాఖ్యానించింది. ఇలాంటి నిందితుడిని కఠినంగా శిక్షించాలని.. అతడు పెట్టుకున్న కేసు రద్దు పిటిషన్‌ను కొట్టిపారేసింది. ఈ ఘటన స్థానికంగా తీవ్ర భయాందోళలకు కారణం అయింది. నిందితుడు ఆ వీడియోలను ఇంకా ఎవరికైనా పంపించాడా లేక సోషల్ మీడియాలో షేర్ చేశాడా అని భయపడుతున్నారు.