అధికారులకు చుక్కలు చూపిస్తున్న తోడేళ్లు

గత కొన్ని రోజులుగా ఉత్తర్‌ప్రదేశ్‌లో తోడేళ్ల గుంపు చేస్తున్న దాడులు స్థానికంగా తీవ్ర భయాందోళనలు రేకెత్తిస్తున్నాయి. 6 తోడేళ్లు గుంపుగా ఏర్పడి గ్రామాల మీద పడి.. దొరికిన వారిపై దొరికినట్లు దాడులు చేస్తున్నాయి. మరీ ముఖ్యంగా చిన్న పిల్లలను ఎత్తుకెళ్లడం, వారిపై దాడి చేసి చంపేయడం చేస్తున్నాయి. తోడేళ్ల దాడుల్లో మొత్తం 10 మంది చనిపోగా.. అందులో 9 మంది చిన్న పిల్లలు ఉండటం తీవ్ర సంచలనంగా మారింది. ఇక మరో 36 మంది ఈ తోడేళ్ల దాడుల్లో గాయాలపాలయ్యారు. ఈ క్రమంలోనే ఎట్టి పరిస్థితుల్లోనైనా వాటిని పట్టుకోవాలని ప్రభుత్వం ఆదేశాలు జారీ చేయగా.. ఇప్పటివరకు 4 తోడేళ్లను బంధించగా.. తాజాగా మరో తోడేలు చిక్కింది. ఇక మిగిలిన ఆ ఒక్క తోడేలును పట్టుకునేందుకు అటవీ అధికారులు శ్రమిస్తున్నారు.

బహ్రెయిచ్ జిల్లాలో తోడేళ్లను పట్టుకునేందుకు ఉత్తర్‌‌ప్రదేశ్ రాష్ట్ర ప్రభుత్వం ఆపరేషన్ భేడియా పేరుతో.. అటవీ అధికారులను రంగంలోకి దింపింది. దాదాపు 2 నెలలుగా బహ్రెయిచ్ జిల్లాలోని 35 గ్రామాల్లో అధికారులు హై అలర్ట్ విధించి.. రాత్రిపూట వాటిని పట్టుకునేందుకు అన్ని చర్యలు తీసుకున్నారు. ఈ క్రమంలోనే మనుషులపై దాడులు చేసి చంపేస్తున్న ఆ తోడేళ్లను పట్టుకునేందుకు.. బొమ్మలకు చిన్న పిల్లల మూత్రంతో తడిపిన బట్టలను తొడిగి.. తోడేళ్లు సంచరించే ప్రాంతాల్లో ఉంచి.. వాటికి ఎరగా వేస్తున్నారు. అయితే అధికారుల వ్యూహాలను పసిగట్టిన తోడేళ్లు.. సరికొత్త వ్యూహంతో రోజుకో కొత్త గ్రామంపై దాడులు చేస్తున్నాయి. ఈ క్రమంలోనే తాజాగా మరో తోడేలును పట్టుకున్నారు.

బహ్రెయిచ్‌ జిల్లాలోని హరబక్ష్‌ పూర్వ గ్రామంలోని ఘఘర నది సమీపంలో ఈ గుంపులోని ఐదో తోడేలు చిక్కిందని అటవీ శాఖ అధికారులు తెలిపారు. ఇంతకుముందు పట్టుబడిన తోడేలును కూడా అదే ప్రాంతంలో బంధించినట్లు చెప్పారు. ఇంకా ఒక్క తోడేలు మాత్రమే ఉందని.. దాన్ని కూడా త్వరలోనే పట్టుకుంటామని ప్రకటించారు. ఇక ఈ తోడేళ్లు చేస్తున్నా దాడులను వైల్డ్‌లైఫ్ డిజాస్టర్‌గా ప్రకటించిన యోగి ఆదిత్యనాథ్ సర్కార్ సంచలన ఆదేశాలు ఇచ్చింది. తోడేళ్లను వీలైనంత త్వరగా పట్టుకోవాలని.. అయితే అవి దొరకని సమయంలో కనిపిస్తే కాల్చిపారేయాలని కూడా యూపీ సీఎం ఆదేశించారు.

ఇక గత కొన్ని రోజులుగా బహ్రెయిచ్‌లో తోడేళ్ల దాడులు పెరిగిపోతుండటం పట్ల జంతు నిపుణులు తీవ్ర కలవరం వ్యక్తం చేశారు. సాధారణంగా జంతువులు సున్నితమైన స్వభావంతోపాటు విధేయతను కలిగి ఉంటాయని యూపీ ఫారెస్ట్ కార్పొరేషన్ జనరల్ మేనేజర్ సంజయ్ పాఠక్ తెలిపారు. ఈ తోడేళ్లు తమ ఆవాసాలు, పిల్లలకు హాని కలిగిస్తే మాత్రం వారిపై ప్రతీకారం తీర్చుకునే ధోరణిని కలిగి ఉంటాయని చెప్పారు. అయితే భారీ వర్షాల కారణంగా చెరకు పొలం పక్కనే ఉన్న ఓ తోడేలు గుహలోకి వరద పొంగి.. అందులో ఉన్న తోడేలు పిల్లలు చనిపోయి ఉంటాయని.. అందుకే అవి ఇప్పుడు దాడులు చేస్తున్నట్లు సంబంధిత గ్రామస్థులు చర్చించుకుంటున్నారు.