అధికార టీడీపీని వీడి కాంగ్రెస్‌లో చేరిన యువ నేత

ఏ రాజకీయ నాయకుడైనా అధికారంలో ఉండాలని కలలు కంటారు. అధికారాన్ని హస్తగతం చేసుకునేందుకు నిత్యం ప్రయత్నిస్తూ ఉంటారు. ఈ క్రమంలోనే ప్రత్యర్థులను ఓడించేందుకు వారు వేసే ఎత్తులు, జిత్తులు అన్నీ ఇన్ని కావు. అంతా చేసిన ఎన్నికల్లో ప్రజలు ఆశీర్వదిస్తారనే గ్యారెంటీ లేదు. ఒకవేళ తిరస్కరిస్తే మాత్రం మరో ఐదేళ్లు ఎదురుచూడాల్సి ఉంటుంది. అధికార పార్టీతో కొట్లాడాల్సి ఉంటుంది. కానీ ఏపీలోని తెలుగుదేశం పార్టీకి చెందిన ఓ యువ నేత మాత్రం ఇందుకు భిన్నంగా వ్యవహరించారు. వైసీపీతో ఐదేళ్లు పోరాడి.. అధికారంలోకి వస్తే.. పవర్‌లోకి వచ్చి పట్టుమని మూడు నెలలు కూడా తిరగకుండానే అధికార పార్టీకి గుడ్ బై చెప్పారు. పోనీ అంతకుమించిన ఆఫర్ ఏమైనా వచ్చిందా అనుకుంటే.. ఆయన వెళ్లింది ఏపీలో ఉనికి కోసం పోరాడుతున్న కాంగ్రెస్ పార్టీలోకి..

కాసరగడ్డ నాగార్జున.. అంతగా ఫేమస్ ఏమీ కాదు కానీ.. టీడీపీ తరుఫున సోషల్ మీడియాలో తన వాణి వినిపిస్తూ ఉంటారు. తెలుగు యువత రాష్ట్ర అధికార ప్రతినిధిగా గత ఐదేళ్ల కాలంలో ఆ పార్టీ తరుఫున పోరాటం చేశారు. అయితే పార్టీ అధికారంలోకి వచ్చిన మూడు నెలలో కండువా మార్చారు నాగార్జున. ఆంధ్రప్రదేశ్ కాంగ్రెస్ పార్టీ కార్యాలయంలో జరిగిన కార్యక్రమంలో ఏపీ కాంగ్రెస్ చీఫ్ వై.ఎస్.షర్మిల సమక్షంలో హస్తం పార్టీ కండువా కప్పుకున్నారు. షర్మిల సైతం నాగార్జునను సాదరంగా పార్టీలోకి ఆహ్వానించారు.

ఈ సందర్భంగా మాట్లాడిన కాసరగడ్డ నాగార్జున.. రాహుల్ గాంధీ నాయకత్వం పట్ల గౌరవంతో, కాంగ్రెస్ పార్టీ సిద్ధాంతాలకు ఆకర్షితుడై పార్టీలో చేరినట్లు చెప్పారు. ఏపీకి ప్రత్యేకహోదా, విభజన హామీల అమలు కావాలంటే కాంగ్రెస్ పార్టీతోనే సాధ్యమన్నారు. వైఎస్ షర్మిల సారథ్యంలో ఆంధ్రప్రదేశ్‌లో కాంగ్రెస్ పార్టీ పుంజుకుంటుందని విశ్వాసం వ్యక్తం చేశారు. మరోవైపు ప్రకాశం జిల్లా వినుకొండకు చెందిన నాగార్జున సేవలను రాష్ట్ర కమిటీలో ఉపయోగించుకోవాలని కాంగ్రెస్ భావిస్తోందట. అలాగే వినుకొండ నియోజకవర్గంలో పార్టీ బలోపేతానికి ఆయనను ఉపయోగించుకోవాలని భావిస్తున్నట్లు కాంగ్రెస్ వర్గాలు చెప్తున్నాయి.