జగన్ తీసుకున్న మరో నిర్ణయం రద్దు

ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. వైసీపీ ప్రభుత్వం హయాంలో తీసుకున్న మరో నిర్ణయాన్ని రద్దు చేసింది. గత ప్రభుత్వం ఏర్పాటు చేసిన స్పెషల్ ఎన్‌ఫోర్స్‌మెంట్ బ్యూరో - సెబ్‌ను టీడీపీ కూటమి ప్రభుత్వం రద్దు చేసింది. అలాగే సెబ్ ఏర్పాటు చేస్తూ గతంలో జారీ చేసిన 12 జీవోలను సైతం రద్దు చేసింది. సెబ్ కోసం ఎక్సైజ్ శాఖలో నుంచి కేటాయించిన సిబ్బందిని కూడా రిలీవ్ చేస్తూ నిర్ణయం తిసుకున్నారు. ఈ మేరకు ఏపీ డీజీపీ ద్వారకా తిరుమలరావు ఉత్తర్వులు జారీచేశారు. అలాగే సెబ్ సిబ్బందిని ఎక్సైజ్ శాఖలో రిపోర్ట్ చేయాలని ఆదేశించారు. సెబ్ విభాగంలో పనిచేస్తన్న అధికారులను కూడా వారి మాతృశాఖల్లో రిపోర్ట్ చేయాలని స్పష్టం చేశారు.

ఇదే సమయంలో సెబ్ కోసం కేటాయించిన సామాగ్రి, కంప్యూటర్లు, వాహనాలు, భవనాలను ఎక్సైజ్ శాఖకు తిరిగి అప్పగించాలని డీజీపీ ఉత్తర్వుల్లో స్పష్టం చేశారు. ఇక సెబ్ రద్దు కావటంతో ఇందులో పనిచేస్తున్న 4,393 మంది ఉద్యోగులు తిరిగి ఎక్సైజ్ శాఖలో చేరనున్నారు. వీరంతా ఎక్సైజ్‌ కమిషనర్‌ కింద పనిచేస్తారు. ఐజీ ర్యాంకు ఐపీఎస్‌ అధికారి నేతృత్వంలో ఎన్‌ఫోర్స్‌మెంట్‌ విభాగాన్ని ఏర్పాటు చేయనున్నారు.. అలాగే సెబ్ ఆధ్వర్యంలోని 208 స్టేషన్లు కూడా ఎక్సైజ్ స్టేషన్ల కిందకు రానున్నాయి.

లిక్కర్ అక్రమ రవాణాను అడ్డుకునేందుకు గత వైసీపీ ప్రభుత్వం స్పెషల్ ఎన్‌ఫోర్స్‌మెంట్ బ్యూరోను ఏర్పాటు చేసింది. ఈ విభాగం కోసం ఎక్సైజ్ శాఖ నుంచి 70 శాతం మంది ఉద్యోగులను, సిబ్బందిని కేటాయించారు. ఎక్సైజ్ శాఖకు అనుబంధంగా సెబ్ ఇన్ని రోజులూ పనిచేస్తూ వచ్చింది. అయితే ఏపీలో అధికారంలోకి వచ్చిన టీడీపీ కూటమి ప్రభుత్వం సెబ్ రద్దు చేయాలని నిర్ణయించింది. ఇటీవల జరిగిన ఏపీ మంత్రివర్గ సమావేశంలోనూ సెబ్ రద్దు చేయాలని నిర్ణయం తీసుకున్నారు. మంత్రివర్గ నిర్ణయం అనుసరించి డీజీపీ సెబ్ రద్దుచేస్తూ ఉత్తర్వులు జారీ చేశారు. సెబ్ ఏర్పాటు, సిబ్బంది కేటాయింపు, అధికారుల బదలాయింపు, విధుల నిర్వహణ గైడ్ లైన్స్, సెబ్ కమిషనర్ అధికారాలకు సంబంధించి గత ప్రభుత్వం జారీ చేసిన 12 జీవోలనూ వెనక్కి తీసుకుంటున్నట్లు తెలిపారు.