ఇండియా కూటమికి ఇంకో 20 సీట్లు వస్తే వాళ్లను జైలులో పెట్టేవాళ్లం

జమ్మూ కాశ్మీర్ అసెంబ్లీ ఎన్నికల సందర్భంగా కాంగ్రెస్, బీజేపీల మధ్య మరోసారి తీవ్ర మాటల యుద్ధం చోటు చేసుకుంటోంది. ఎన్నికల ప్రచారంలో భాగంగా జమ్మూ కాశ్మీర్‌లో పర్యటించిన కాంగ్రెస్ జాతీయాధ్యక్షుడు మల్లికార్జున ఖర్గే.. బీజేపీపై తీవ్ర విమర్శలు చేశారు. కొన్ని నెలల క్రితం జరిగిన లోక్‌సభ ఎన్నికల్లో తమ ఇండియా కూటమి ఇంకో 20 ఎంపీ స్థానాలను గెలుచుకుని ఉంటే.. దేశంలో మరో విధమైన పరిస్థితి ఉండేదని అన్నారు. అదే సమయంలో వారంతా జైలులో ఉండేవారని.. బీజేపీపై తీవ్ర విమర్శలు గుప్పించారు. అయితే మల్లికార్జున ఖర్గే చేసిన వ్యాఖ్యలపై స్పందించిన కమలం పార్టీ.. కాంగ్రెస్ పార్టీది ఎమర్జెన్సీ ఆలోచనా ధోరణి అంటూ తీవ్ర స్థాయిలో గట్టి కౌంటర్ ఇచ్చింది.

జమ్మూ కాశ్మీర్‌లోని అనంత్‌నాగ్‌లో నిర్వహించిన ఎన్నికల ప్రచారంలో మాట్లాడిన మల్లికార్జున ఖర్గే.. పార్లమెంటు ఎన్నికల్లో 400 సీట్లు వస్తాయని ప్రచారం చేసిన వారు ఇప్పుడు ఎక్కడికి వెళ్లారని ప్రశ్నించారు. వారి సీట్లు కేవలం 240కి పడిపోయాయని ఎద్దేవా చేశారు. అదే సమయంలో తమకు మరో 20 సీట్లు వచ్చి ఉంటే.. వారంతా జైలుకు వెళ్లి ఉండేవారని పేర్కొన్నారు. వారు జైలుకు వెళ్లడానికి అర్హులు అంటూ మల్లికార్జున ఖర్గే ఘాటు వ్యాఖ్యలు చేశారు. అయితే ఎవరి పేర్లను ప్రస్తావించకుండా కేవలం బీజేపీ పేరును మాత్రమే ఆయన ప్రసంగంలో వినిపించారు. ఈ ఏడాది జరిగిన సార్వత్రిక ఎన్నికల్లో బీజేపీ 240 స్థానాలకే పరిమితం అయి.. మిత్ర పక్షాల సహాయంతో కేంద్రంలో అధికారాన్ని ఏర్పాటు చేసింది.

ఇక మల్లికార్జున ఖర్గే చేసిన వ్యాఖ్యలపై బీజేపీ తీవ్రంగా విరుచుకుపడింది. కాంగ్రెస్ పార్టీ ఎమర్జెన్సీ ఆలోచనా విధానానికి మల్లికార్జున ఖర్గే చేసిన ఈ వ్యాఖ్యలు ఒక ఉదాహరణ అని మండిపడింది. ప్రతిపక్ష పార్టీలకు చెందిన నేతలను జైల్లో పెట్టాలని ఖర్గే అన్నారని.. గతంలో ఎమర్జెన్సీ సమయంలో అప్పటి ప్రధానమంత్రి ఇందిరాగాంధీ అదే పనే చేశారని గుర్తు చేశారు. అప్పుడు అనుసరించిన విధానాలనే ఇప్పుడు కాంగ్రెస్‌ పార్టీ కొనసాగించాలని అనుకుంటోందని తీవ్రంగా విమర్శించింది. పశ్చిమ బెంగాల్‌లో అధికారంలో ఉన్న తృణమూల్ కాంగ్రెస్ పార్టీ నియంతృత్వ వైఖరిని అనుసరిస్తుంటే కాంగ్రెస్ పార్టీ దానిపై మాట్లాడదని ఎద్దేవా చేశారు. కానీ ఇతరులను మాత్రం నియంతృత్వ పార్టీలు అంటారని బీజేపీ తీవ్ర విమర్శలు చేసింది.