లంబసింగి కాఫీ రైతుకు అరుదైన గౌరవం.. పైన్‌కప్‌-2024 అవార్డు దక్కింది

ఏపీలోని మన్యం కాఫీ ప్రతిష్ట ఇప్పటికే ప్రపంచవ్యాప్తమైంది.. తాజాగా అలాగే అక్కడి గిరిజన రైతుకు అరుదైన గుర్తింపు దక్కింది. అల్లూరి సీతారామరాజు జిల్లా చింతపల్లి మండలం లంబసింగి అసరాడకు చెందిన గిరిజన రైతు లాకారి వెంకటరావును కాఫీ పంట సాగు చేస్తున్నారు. ఆయనకు కాఫీ గింజల ఉత్పత్తిలో జాతీయ స్థాయి పైన్‌కప్‌-2024 అవార్డు దక్కింది. దేశవ్యాప్తంగా అన్ని రాష్ట్రాల్లో కాఫీ సాగు చేస్తున్న రైతుల నుంచి కేంద్ర కాఫీ బోర్డు నమూనాలు సేకరిస్తుంది. ఇలా నమూనాలు సేకరించిన తర్వాత పరిశీలించి.. వారికి అవార్డులు ప్రధానం చేస్తారు.

కర్ణాటకలోని చిక్కమగళూరులో ప్రతి ఏటా ఈ అవార్డులను ప్రకటిస్తారు. 2024కు సంబంధించి వెంకటరావు ఈ అవార్డుకు ఎంపికయ్యారని కేంద్ర కాఫీబోర్డు విస్తరణ విభాగం డీడీ ప్రకటించారు. వెంకటరావు సేంద్రియ పద్ధతుల్లో నాలుగు ఎకరాల్లో అరాబికా కాఫీని సాగు చేస్తున్నారు. కాస్త వినూత్నంగా ఉండే పార్చిమెంటు విభాగంలో వెంకటరావు పండించిన నమూనాలను కేంద్ర కమిటీ సేకరించి.. విశ్లేషించిన ఈ అవార్డుకు ఎంపిక చేసింది. 2008లో లంబసింగికి చెందిన గిరిజన మహిళా రైతు నర్సి రాములమ్మ పండించిన కాఫీకి ఈ పురస్కారం దక్కింది. 16ఏళ్ల తరువాత మళ్లీ వెంకటరావుకు ఈ అవార్డు వచ్చింది. ఈ అవార్డును హైదరాబాద్‌లో నిర్వహించే ఇంటర్నేషనల్‌ కాఫీ ఫెస్టివల్‌లో కేంద్ర కాఫీ బోర్డు ఉన్నతాధికారులు అందజేయనున్నారు.

రైతు వెంకటరావు ఇంటర్‌ వరకు చదువుకున్నారు.. 2007లో పాడేరు ఐటీడీఏ కాఫీ ప్రాజెక్టులో లైజన్‌ వర్కర్‌గా చేరారు. ఆ తర్వాత లంబసింగి పరిధిలో ఆదివాసీ రైతులను కాఫీ సాగులో ప్రోత్సహించగా.. ఆయన 2012లో లైజన్‌ వర్కర్‌ ఉద్యోగానికి రాజీనామా చేశారు. ఆ తర్వాత 3.5 ఎకరాల్లో కాఫీ సాగు ప్రారంభించి సక్సెస్ అయ్యారు. తాను లైజన్‌ వర్కర్‌గా పనిచేయడంతో నాణ్యమైన కాఫీ ఉత్పత్తికి నేర్చుకున్న శాస్త్రీయ పద్ధతులు, మెళుకువల్ని అవలభించారు. భార్య సుజాతలో కలిసి కాఫీ తోటలు సాగు చేస్తూ.. తోటలో కాఫీ పండ్లను సేకరించి పార్చిమెంట్‌గా తయారుచేసి మార్కెటింగ్‌ చేస్తున్నారు. కాఫీ దిగుబడులు బాగా వస్తున్నాయంటున్నారు వెంకటరావు.