పిల్లికి బిచ్చమైనా పెట్టారా,,,,యాంకర్ శ్యామల

వైసీపీ అధికార ప్రతినిధిగా ఊహించని రీతిలో అవకాశం దక్కించుకున్న యాంకర్ శ్యామల.. అప్పుడే తన పని మొదలెట్టారు. టీడీపీ కూటమి ప్రభుత్వం తీరుపైనా, చంద్రబాబు విధానాలపైనా విమర్శనాస్త్రాలు సంధించారు. వరద బాధితులకు వైఎస్ జగన్ ప్రకటించిన కోటి రూపాయలు సాయం ఏమైందంటూ టీడీపీ సహా కూటమి పార్టీలు, శ్రేణులు సోషల్ మీడియా వేదికగా విమర్శలు, సెటైర్లు గుప్పిస్తున్నాయి. ఈ క్రమంలో వైఎస్ జగన్‌కు మద్దతుగా యాంకర్ శ్యామల వీడియో రిలీజ్ చేశారు. ఎక్స్ ఖాతా వేదికగా ఈ వీడియో షేర్ చేశారు.

" ప్రజలకు సాయం చేసే విషయంలో వైఎస్ జగన్ గురించి,. పిల్లికి కూడా బిచ్చం వేయని తండ్రీకొడుకులు చంద్రబాబు, నారా లోకేష్ సన్నాయి నొక్కులు చూస్తుంటే నవ్వాలో ఏడవాలో తెలియని పరిస్థితి. రెండు ఎకరాల నుంచి రెండు లక్షల కోట్లకుపైగా సంపాదించుకున్న చంద్రబాబు.. తన రాజకీయం జీవితంలో ఎంత మందికి సహాయపడ్డారో వివరిస్తే ప్రజలు కూడా తెలుసుకుంటారు. వరద బాధితులకు జగన్ ఏం సాయం చేశారని ప్రశ్నిస్తున్న సూడో మేధావులు.. దయచేసి కనులు తెరిచి, చెవులు రిక్కించి వినండి. టీడీపీ కూటమి ప్రభుత్వం అధికారంలోకి వచ్చాక.. టీడీపీ గూండాలు రాష్ట్రంలోని వైసీపీ నేతలు, కార్యకర్తలపై హత్యలు, ఆస్తి విధ్వంసాలు, దాడులు చేశారు. ఈ క్రమంలో గాయపడిన, నష్టపోయిన 200 కుటుంబాలకు వైఎస్ జగన్ సాయం చేశారు. విశాఖ ఫార్మా కంపెనీలో జరిగిన పేలుడులో 15 మంది చనిపోతే ఒక్కొక్క కుటుంబానికి ఐదు లక్షలు, గాయపడిన వారికి లక్ష రూపాయలు చొప్పున సాయం చేశారు. ఇవన్నీ కనపడలేదా.?" అంటూ వైసీపీ అధికార ప్రతినిధి యాంకర్ శ్యామల ప్రశ్నించారు.

" విజయవాడలో వరద బాధితులకు వైఎస్ కోటి రూపాయలు సాయం చేసిన విషయం తెలియదా.. ఈ రోజు వరద బాధితులకు అవసరమైన పాలు, కూరగాయలు నిత్యావసరాలు అందిస్తున్నారు. పులివెందులలోని వెంకటప్ప స్కూలులో ఒక్క రూపాయి కూడా ఫీజు తీసుకోకుండా చదువు చెప్పిస్తున్నారు. పాదయాత్రలో, ఓదార్పు యాత్రలో ఎంతో మంది యువతకు ఉద్యోగాలు కల్పించారు, భరోసా కల్పించారు. వైఎస్ జగన్ సాయం వలన ఎన్నో కుటుంబాలు బాగుపడ్డాయి. ఎంతో మంది విద్యార్థులు ఉన్నత స్థానాల్లో ఉన్నారు.. ఇలా చెప్పుకుంటూ పోతే చాలా ఉన్నాయి. ఇలాంటి సాయం మీరు చేసుంటే ఠక్కున చెప్పండి ఓసారి. అధికారం ఉంది కదా అని అబద్ధాలు చెప్తూ పోతే.. అవన్నీ నిజాలు అవుతాయా" అంటూ శ్యామల ప్రశ్నించారు.

మరోవైపు ఇటీవల జరిగిన ఏపీ అసెంబ్లీ ఎన్నికల్లో యాంకర్ శ్యామల వైసీపీ తరుఫున విస్తృత ప్రచారం నిర్వహించారు. ఈ విషయాన్ని దృష్టిలో పెట్టుకుని వైఎస్ జగన్ మోహన్ రెడ్డి.. వైసీపీ అధికార ప్రతినిధిగా యాంకర్ శ్యామలకు అవకాశం ఇచ్చారు. యాంకర్ శ్యామలతో పాటుగా మాజీ మంత్రి ఆర్కే రోజా, మాజీ ఎమ్మెల్యే భూమన కరుణాకర్ రెడ్డి, జూపూడి ప్రభాకర్ రావులను వైసీపీ అధికార ప్రతినిధులుగా నియమిస్తూ వైఎస్ జగన్ ఇటీవల నిర్ణయం తీసుకున్నారు.