ఏపీలోని రైతులకు బిగ్ రిలీఫ్.. గడువు పొడిగింపు

ఆంధ్రప్రదేశ్‌లోని రైతులకు బిగ్ రిలీఫ్. ఖరీఫ్ సీజన్ పంటలకు సంబంధించి ఈ- క్రాప్ గడువును ప్రభుత్వం పొడిగించింది. ముందుగా నిర్ణయించిన ప్రకారం ఖరీఫ్ సీజన్ పంటలకు ఈ క్రాప్ బుకింగ్ సెప్టెంబర్ 15వ తేదీతో ముగిసింది. అయితే ఇంకా పలుచోట్ల పంటల నమోదు చేయాల్సి ఉన్నందున ఈ గడువును మరో 15 రోజలు పొడిగిస్తూ నిర్ణయం తీసుకుంది. పంటల బీమాతో పాటుగా, ఇన్‌పుట్ సబ్సిడీ, పంట కొనుగోలుకు ఈ క్రాప్ తప్పనిసరి. ఈ నేపథ్యంలో పంటలు సాగుచేసిన రైతులు అందరూ తప్పనిసరిగా ఈ- క్రాప్‌లో పంటల వివరాలు నమోదు చేసుకోవాలని అధికారులు సూచిస్తున్నారు.

మరోవైపు వర్షాలు, కరవు వంటి విపత్కర పరిస్థితులు తలెత్తితే రైతులు నష్టపోకూడదనే ఉద్దేశంతో ప్రభుత్వాలు బీమా పథకాలు అమలు చేస్తున్నాయి. ఈ క్రమంలోనే రైతుల కోసం కేంద్రం ప్రధానమంత్రి ఫసల్‌ బీమా యోజన పథకం అమలు చేస్తోంది. అయితే ఈ పథకంలో రైతులు ఇన్సూరెన్స్ ప్రీమియం చెల్లించాల్సి ఉంటుంది. ఖరీఫ్ సీజన్‌లో పండించే పంటలకు రెండు శాతం ప్రీమియం చెల్లించాల్సి ఉంటుంది. అలాగే రబీ పంటల కోసం 1.5 శాతం ప్రీమియం చెల్లించాల్సి ఉంటుంది. ఇక వార్షిక వాణిజ్య పంటలకు అయితే ఐదు శాతం ఇన్సూరెన్స్ ప్రీమియం చెల్లించాల్సి ఉంటుంది. అయితే ఆంధ్రప్రదేశ్‌లో వాతావరణ ఆధారిత పంటల బీమాను ఏపీ ప్రభుత్వం అమలు చేస్తోంది. అందులో భాగంగా ఖరీఫ్ సీజన్‌లో రైతులు పండించిన పంటలకు ప్రభుత్వమే ప్రీమియం చెల్లించి.. ఉచితంగా బీమా కల్పిస్తోంది. అయితే రబీ సీజన్‌కు మాత్రం ఇన్సూరెన్స్ ప్రీమియం‌ను రైతులే చెల్లించాల్సి ఉంటుందని ప్రభుత్వం ఇప్పటికే స్పష్టం చేసింది.

ఇక పంటల బీమా కోసం ఈ క్రాప్ బుకింగ్ నమోదు చేస్తున్నారు. ఇందుకోసం ఓ పోర్టల్ కూడా అందుబాటులోకి తెచ్చారు. వ్యవసాయశాఖ అధికారులు, సిబ్బంది క్షేత్ర స్థాయిలో పర్యటించి పంటల నమోదు ప్రక్రియ చేపడుతున్నారు. రైతుల తమ పొలంలో సాగు చేసిన పంట వివరాలను వ్యవసాయశాఖ అధికారులకు తెలియజేస్తే.. వారు వచ్చి తనిఖీ చేసి ఈ క్రాప్‌లో నమోదు చేస్తారు. అనంతరం రైతును పొలంలో ఫోటో తీసి అప్‌లోడ్ చేస్తారు. ఇలా ఈ క్రాప్ చేసిన తర్వాత రైతుల దగ్గర నుంచి సర్వే నంబర్లు, మొబైల్ నంబర్లు, ఆధార్ నంబర్ తీసుకుని వివరాలు నమోదు చేస్తారు. ఈ క్రాప్ పూర్తి అయిన తర్వాత రైతులు రైతు భరోసా కేంద్రానికి వెళ్లి ఈ కేవైసీ పూర్తి చేయాల్సి ఉంటుంది. అలా ఈ క్రాప్, ఈ కేవైసీ పూర్తి అయిన వారికి మాత్రమే పంటల బీమా వర్తిస్తుందని ప్రభుత్వం తెలిపింది. ఈ నేపథ్యంలో ఈ క్రాప్ నమోదు గడువును సెప్టెంబర్ 30 వరకూ పొడిగించారు.