తప్పిన పెను ప్రమాదం.. చేపలవేటకు వెళ్లిన బోటులో మంటలు

విశాఖపట్నంలో మరో అగ్నిప్రమాదం జరిగింది. విశాఖ కంటైనర్ టెర్మినల్‌లో ఓ కంటైనర్‌లో పొగలు వెలువడిన ఘటన మరువకముందే.. మరో ప్రమాదం జరిగింది. సముద్రంలో చేపల వేటకు వెళ్లిన మత్స్యకారుల బోటులో అగ్నిప్రమాదం జరిగింది. సముద్రంలో వేటకు వెళ్లిన ఓ బోటులో అకస్మాత్తుగా మంటలు చెలరేగాయి. తీరానికి 35 మైళ్లకుపైగా దూరంలో ఉన్నసమయంలో ఇంజిన్‌లో మంటలు చెలరేగాయి. దీంతో బోటు మొత్తం తగలబడిపోయింది. అయితే బోటులో ఉన్న ఐదుగురు మత్స్యకారులు క్షేమంగా బయటపడ్డారు. బోటు ప్రమాదంతో రూ.40 లక్షల ఆస్తినష్టం జరిగినట్లు తెలుస్తోంది.

వివరాల్లోకి వెళ్తే.. ఫిషింగ్‌ హార్బర్‌ నుంచి వాసుపల్లి అప్పయ్యమ్మకు చెందిన ఓ బోటు చేపలవేటకు బయల్దేరి వెళ్లింది. మొత్తం ఐదుగురు మత్స్యకారులు చేపలవేట కోసం బోటులో వెళ్లారు. అయితే తీరానికి 35 మైళ్ల దూరం చేరుకోగానే బోటులో మంటలు చెలరేగాయి. ఇంజిన్‌లో చెలరేగిన మంటలు క్రమంగా బోటు మొత్తం విస్తరించాయి. దీంతో మత్స్యకారులంతా భయపడిపోయారు. తప్పించుకోవడానికి సముద్రంలోకి దూకారు. అయితే ప్రమాదం విషయాన్ని గమనించిన కోస్ట్‌గార్డు సిబ్బంది అప్రమత్తమయ్యారు. మత్స్యకారులను రక్షించి మరో బోటులో తీరానికి చేర్చారు. మంటల్లో బోటు పూర్తిగా కాలిపోగా.. దీని విలువ 40 లక్షల రూపాయల వరకూ ఉంటుందని తెలిసింది.

మరోవైపు విశాఖ బోటు ప్రమాదంపై ఆంధ్రప్రదేశ్ వ్యవసాయ, మత్స్య శాఖ మంత్రి కింజరాపు అచ్చెన్నాయుడు ఆరా తీశారు. బోటులో చేపల వేటకు వెళ్లిన మత్స్యకారుల పరిస్థితి గురించి అధికారులను అడిగి తెలుసుకున్నారు. అందరూసురక్షితంగా ఉన్నారని అధికారులు మంత్రికి వివరించారు. అయితే బోటు కాలిపోవటంతో ఆస్తి నష్టం జరిగిందని కింజరాపు అచ్చెన్నాయుడు దృష్టికి తీసుకెళ్లారు. మరోవైపు ఇలాంటి ప్రమాదాలు జరగకుండా ఎలాంటి జాగ్రత్తలు తీసుకోవాలనే దానిపై మత్స్యకారులకు అవగాహన పెంచాలని అచ్చెన్నాయుడు అధికారులను సూచనలు చేశారు. మరోవైపు శనివారం కూడా విశాఖలో ప్రమాదం జరిగిన సంగతి తెలిసిందే. చైనా నుంచి వచ్చిన కంటైనర్‌లో పొగలు రాగా.. అధికారులు వెంటనే అప్రమత్తమై ఆర్పివేశారు.