టీడీపీ కూటమి ప్రభుత్వానికి వంద రోజులు,,,ప్రత్యేక కార్యక్రమం చేపట్టనున్న చంద్రబాబు

2024 ఆంధ్రప్రదేశ్ అసెంబ్లీ ఎన్నికల్లో ఘన విజయం సాధించి.. టీడీపీ కూటమి అధికార పగ్గాలు చేపట్టి సెప్టెంబర్ 20వ తేదీ నాటికి వంద రోజులు పూర్తి కానుంది. ప్రభుత్వానికి వందరోజులు పూర్తికానున్న నేపథ్యంలో సీఎం నారా చంద్రబాబు నాయుడు ఓ సరికొత్త కార్యక్రమానికి శ్రీకారం చుట్టనున్నారు. ఎన్డీఏ కూటమి వంద రోజుల పాలనపై ప్రజాభిప్రాయం తెలుసుకోవాలని చంద్రబాబు భావిస్తున్నారు. వంద రోజుల పరిపాలనలో ఎమ్మెల్యేలు, మంత్రుల పనితీరుపై క్షేత్రస్థాయిలో ప్రజల నుంచి అభిప్రాయాలు తెలుసుకోవాలని చంద్రబాబు ఆలోచిస్తున్నారు. ఈ దిశగానే మంత్రులు, శాసనసభ్యులకు సైతం ఆదేశాలు జారీచేసినట్లు తెలిసింది. ఈ నెల 20తో వందరోజులు పూర్తికావొస్తున్న నేపథ్యంలో సెప్టెంబర్ 20 నుంచి 26వ తేదీ వరకూ వారం రోజులపాటు నియోజకవర్గంలోని ప్రజల వద్దకు వెళ్లి అభిప్రాయాలు తెలుసుకోవాలని ఆదేశించారు.

మరోవైపు ఎన్డీయే కూటమి ఎమ్మెల్యేలతో బుధవారం చంద్రబాబు సమావేశం నిర్వహించనున్నారు. మంగళగిరి సీకే కన్వెన్షన్‌లో ఈ సమావేశం జరగనుంది. ఈ సమావేశానికి అందరు ఎమ్మెల్యేలు తప్పనిసరిగా రావాలని ఆహ్వానించారు. ఈ కార్యక్రమంలో గత వంద రోజులలో ప్రభుత్వం చేసిన వివిధ పనులు, చేపట్టిన కార్యక్రమాలు, లోటు పాట్లపై సీఎం చంద్రబాబు మంత్రులు, శాసనసభ్యులకు వివరిస్తారు. అలాగే వారి నుంచి సలహాలు, సూచనలు స్వీకరించనున్నారు. మరోవైపు వైసీపీ ప్రభుత్వ హయాంలోనూ వైఎస్ జగన్ ఇదే తరహా కార్యక్రమాన్ని చేపట్టారు. గడప గడపకూ మన ప్రభుత్వం అనే పేరుతో మంత్రులు, ఎమ్మెల్యేలను నియోజకవర్గంలోని ప్రజల వద్దకు వెళ్లి.. ప్రభుత్వం చేసిన సంక్షేమ కార్యక్రమాలను ప్రజలను వివరించే ప్రయత్నం చేశారు.

ఇప్పుడు చంద్రబాబు నాయుడు సైతం ఇదే తరహాలో ప్రజల నుంచి అభిప్రాయాలను సేకరించాలని నిర్ణయించుకున్నట్లు తెలిసింది. అయితే వైఎస్ జగన్ మూడేళ్ల పాలన తర్వాత ఈ కార్యక్రమం చేపట్టగా.. చంద్రబాబు మాత్రం వంద రోజుల పాలన గురించి ప్రజల నుంచి ఫీడ్ బ్యాక్ తీసుకోవాలని నిర్ణయించుకోవడం విశేషం. ఈ సందర్బంగా ఎమ్మెల్యేలు, మంత్రుల పనితీరు కూడా ఓ అంచనాకు రావచ్చని.. వారిపై నియోజకవర్గంలో ఎలాంటి అభిప్రాయం వ్యక్తమవుతోందో తెలుస్తుందనే ఆలోచనలోనూ చంద్రబాబు ఉన్నట్లు తెలిసింది.