అక్టోబర్ ఒకటి నుంచి నూతన ఎక్సైజ్ పాలసీ.. మద్యం షాపుల్లో వారికి రిజర్వేషన్లు

మందుబాబులకు ఏపీ ప్రభుత్వం శుభవార్త చెప్పింది. అక్టోబర్ ఒకటో తేదీ నుంచి ఏపీలో నూతన మద్యం విధానం అమల్లోకి రానుంది. ఈ విషయాన్ని మద్యం పాలసీ రూపకల్పనపై ఏర్పాటైన మంత్రివర్గ ఉపసంఘం వెల్లడించింది. కేబినెట్ సబ్ కమిటీలోని మంత్రులు మంగళవారం సీఎం చంద్రబాబు నాయుడుతో సమావేశమయ్యారు. నూతన మద్యం విధానంపై చర్చించారు. అనంతరం జరిగిన మీడియా సమావేశంలో మంత్రి కొల్లు రవీంద్ర కీలక వివరాలు వెల్లడించారు. అక్టోబర్ ఒకటో తేదీ నుంచి రాష్ట్రవ్యాప్తంగా నూతన మద్యం విధానం అమలు చేయనున్నట్లు తెలిపారు. మద్యం పాలసీ రూపకల్పన కోసం ఆరు రాష్ట్రాల్లో అమలవుతున్న మద్యం విధానాలను, అమ్మకాలను పరిశీలించినట్లు మంత్రి చెప్పారు. కొత్త మద్యం పాలసీని రేపు జరిగే ఏపీ కేబినెట్ భేటీలో ఉంచనున్నట్లు కొల్లు రవీంద్ర తెలిపారు.

మరోవైపు తెలంగాణ ప్రభుత్వం అనుసరిస్తున్న తరహాలోనే ఏపీలోనూ మద్యం దుకాణాల్లో రిజర్వేషన్లు అమలు చేయనున్నారు. మద్యం షాపులను ప్రభుత్వం నడపకుండా.. ప్రైవేట్ వ్యక్తులకు అప్పగించాలని ఆలోచిస్తున్న ఏపీ ప్రభుత్వం.. మద్యం షాపుల్లో పది శాతం దుకాణాలను గీత కార్మికులకు కేటాయించాలని నిర్ణయించింది. ఈ విషయాన్ని మంత్రివర్గ ఉపసంఘం వెల్లడించింది. గీత కార్మికులకు 10 శాతం మద్యం షాపులు ఇస్తామన్న మంత్రి కొల్లు రవీంద్ర.. అన్ని వివరాలను రేపు మంత్రివర్గ సమావేశంలో ఉంచుతామన్నారు. గత వైసీపీ ప్రభుత్వంలో మద్యం ధరలను విపరీతంగా పెంచారన్న మంత్రి.. తాము మాత్రం తక్కువ ధరలకే నాణ్యమైన మద్యం ఇస్తామని అన్నారు.

మరోవైపు ఎక్సైజ్ శాఖను నిర్వీర్యం చేస్తూ గత ప్రభుత్వం స్పెషల్ ఎన్‌ఫోర్స్‌మెంట్ బ్యూరోను పెట్టిందన్న మంత్రి కొల్లు రవీంద్ర.. దీంతో ఎక్సైజ్ శాఖ నిర్వీర్యమైందన్నారు. తమ ప్రభుత్వం ఇటీవలే ఎస్ఈబీను రద్దుచేసిన విషయాన్ని గుర్తుచేశారు. ఎక్సైజ్, ఎన్‌‌ఫోర్స్‌మెంట్ బ్యూరోలను బలోపేతం చేస్తామన్న మంత్రి.. మద్యం నియంత్రణకు కూడా నిధులు కేటాయిస్తామన్నారు. మరోవైపు ఏపీలో నూతన మద్యం విధానం రూపకల్పన కోసం ఎక్సైజ్ శాఖ అధికారులు ఆరు రాష్ట్రాల్లో పర్యటించారు. తెలంగాణ, యూపీ, పంజాబ్, తమిళనాడు, ఢిల్లీ వంటి రాష్ట్రాలలో పర్యటించిన అధికారులు ఓ నివేదిక తయారుచేసి మంత్రివర్గ ఉపసంఘానికి అందజేశారు. చంద్రబాబు నాయుడుతో జరిగిన సమావేశంలో ఈ నివేదికపైనా కేబినెట్ సబ్ కమిటీ చర్చించినట్లు తెలిసింది.