బెడ్రూం, బాత్రూంలలో స్పై కెమెరా.. యువతికి భయానక అనుభవం

కొన్ని రోజుల క్రితం ఆంధ్రప్రదేశ్‌లోని కృష్ణా జిల్లా గుడ్లవల్లేరు ఇంజినీరింగ్ కాలేజీలో యువతుల బాత్రూంలలో రహస్య కెమెరాలు ఉన్నాయంటూ ఆరోపణలు రావడం.. ఇటీవల బెంగళూరుకు సమీపంలో ఉన్న మెడికల్ కాలేజీ బాత్రూంలలో స్పై కెమెరాలు ఉన్నట్లు వార్తలు రాగా తాజాగా దేశ రాజధాని ఢిల్లీలో అలాంటి దారుణ ఘటన వెలుగు చూసింది. యూపీఎస్సీ సివిల్స్ పరీక్షల కోసం ప్రిపేర్ అవుతున్న ఓ యువతి.. ఒక ఇంట్లో అద్దెకు ఉంటోంది. ఆ ఇంటి యజమాని కుమారుడు.. ఆ యువతి ఉంటున్న ఇంట్లోని బెడ్రూం, బాత్రూంలలో స్పై కెమెరాలు బిగించి.. వీడియోలు రికార్డ్ చేస్తున్న ఘటన వెలుగులోకి రావడం సంచలనంగా మారింది. ఈ క్రమంలోనే రంగంలోకి దిగి విచారణ జరిపిన పోలీసులు నిందితుడిని అరెస్ట్ చేసి.. అతని ఫోన్లో వీడియోలను గుర్తించారు.

ఉత్తర్‌ప్రదేశ్‌కు చెందిన ఓ యువతి.. ఢిల్లీలోని కరణ్‌పూర్‌లో అద్దె ఇంట్లో ఉంటూ సివిల్స్‌కు ప్రిపేర్ అవుతోంది. ఈ క్రమంలోనే ఎప్పుడైనా తన స్వగ్రామానికి యువతి వెళ్తే.. ఆ ఇంటి తాళాన్ని యజమాని కుమారుడు కరణ్‌కు ఇచ్చి వెళ్లేది. అయితే కొన్ని రోజులకు ఆమె లేని సమయం చూసిన కరణ్.. ఈ ఇంట్లోని బాత్రూమ్, బెడ్రూమ్‌లో స్పై కెమెరాలు అమర్చాడు. ఎలక్ట్రిక్ బల్బు స్క్రూలో స్పై కెమెరా బిగించిన కరణ్.. వాటిని రికార్డ్ చేసేవాడు. అయితే ఇటీవల ఊరి నుంచి వచ్చిన ఆ యువతికి అనుమానం వచ్చింది. తన వాట్సాప్ అకౌంట్ తెలియని ల్యాప్‌టాప్‌లో లాగిన్ అయినట్లు గుర్తించి.. తనను ఎవరో స్పై చేస్తున్నారని అనుమానించింది.

ఈ క్రమంలోనే బాత్రూంలో కరెంట్ బల్బుకు ఉన్న స్పై కెమెరాను గుర్తించి పోలీసులకు ఫిర్యాదు చేసింది. ఈ క్రమంలోనే అక్కడికి చేరుకున్న పోలీసులు.. ఇంట్లో సోదాలు చేయగా.. బెడ్రూమ్‌లోని మరో బల్బుకు స్పై కెమెరా అమర్చినట్లు గుర్తించారు. ఈ క్రమంలోనే పోలీసులు విచారణ జరపగా.. తాను తాళాన్ని కరణ్‌కు అప్పగించినట్లు తెలపగా.. అతడ్ని ప్రశ్నించారు. దీంతో నేరాన్ని అంగీకరించగా.. కరణ్‌ను పోలీసులు అరెస్ట్ చేశారు. ఆ యువతి లేని సమయంలో ఇంట్లోకి చొరబడి స్పై కెమెరాలోని మెమరీ కార్డులో ఉన్న వీడియోలను ల్యాప్‌టాప్‌లో అప్‌లోడ్ చేసుకునే వాడని పేర్కొన్నారు. ఈ క్రమంలోనే అతడి వీడియోలను కరణ్ ల్యాప్‌టాప్‌లో పోలీసులు గుర్తించారు.