ఇళ్ళు చోరీ కేసులో నిందితులు అరెస్ట్

కంటికి కనబడిన ఇంటికి కన్నం వేయడంలో ఆరితేరిపోయారు. మూడు పదుల వయసులోనే నాలుగు పదుల కేసుల్లో చాలాసార్లు జైలుకు వెళ్లొచ్చినా దొంగబుద్ధిలో కొద్దిగా కూడా మార్పు రాలేదు. జైలుకు వెళ్లడం, విడుదల కావడం...మళ్లీ దొంగతనం చేయడం దైనందిన జీవనంగా మార్చుకున్న దొంగలను కొవ్వూరు పట్టణ పోలీసులు కటకటాల్లోకి నెట్టారు. ఎస్పీ నరసింహ కిశోర్‌ వీటి వివరాలను వెల్లడించారు. కొవ్వూరులోని మహమ్మద్‌ మహారాజ్‌కి చెందిన అపార్ట్‌మెంట్‌లో కట్టా ఉషశ్రీ నివాసం ఉంటున్నారు. గతనెల 26న బెడ్‌రూంలో నిద్రించారు. తెల్లవారుజామున 4గంటల ప్రాంతంలో మేల్కోగా బీరువా తలుపులు తెరిచి ఉండటాన్ని గమనించారు. బీరువాలోని బంగారు వస్తువులు, నగదు, సెల్‌ఫోన్‌, సెల్లార్లో ఉన్న యాక్టివా కనబడకపోవడాన్ని గుర్తించారు. దీనిపై అప్పట్లో పోలీసులకు ఫిర్యాదు చేయగా కేసు నమోదు చేశారు. దీంతో ఎస్పీ ఆదేశాలతో కొవ్వూరు డీఎస్పీ జి.దేవకుమార్‌ పర్యవేక్షణలో కొవ్వూరు పట్టణ పోలీస్‌స్టేషన్‌ సీఐ పి.విశ్వం ఆధ్వర్యంలో రెండు ప్రత్యేక పోలీసు బృందాలను ఏర్పాటు చేశారు. ప్రస్తుతం ఏవీఏ రోడ్డులో ఉం టున్న కాకినాడ జిల్లా ఏటిమొగకు చెందిన పొన్నాడ రవిశంకర్‌ (వీరబాబు)ను, భీమవరం పాలూరువారి వీధికి చెందిన లంకలపల్లి నాగరాజును అరెస్టు చేశామని ఎస్పీ తెలిపారు. 

యాక్టివా బైక్‌తోపాటు రూ.15.30లక్షల విలువ చేసే 400 గ్రాముల బంగారాన్ని రికవరీ చేశామన్నారు. మరికొంత బంగారాన్ని ఒక ఫైనాన్సులో కుదువ పెట్టారని దానిని రికవరీ చేయాల్సి ఉందన్నారు. గతంలో వీరబాబుపై పశ్చిమ గోదావరి జిల్లాలో 22, విశాఖలో 16, తూర్పు గోదావరిలో 2, శ్రీకాకుళంలో 2, విజయనగరం, అనకాపల్లి జిల్లాలో ఒక్కోటి కలిపి మొత్తం 44 కేసుల్లో జైలుశిక్ష అనుభవించాడని తెలిపారు. ఈ ఏడాది ఏప్రిల్‌లో ఒక కేసులో శిక్ష అనుభవించి విడుదల అయ్యాడన్నారు. రెండో నిందితుడు నాగరాజుపై గతంలో క్రికెట్‌ బెట్టింగ్‌పై భీమవరంలో, హత్యాయత్నంపై పాలకోడేరులో నమోదైన కేసుల్లో జైలుకు వెళ్లొచ్చాడని ఎస్పీ చెప్పారు. కేసును ఛేదించడంలో ప్రతిభ చూపిన కొవ్వూరు టౌన్‌, రూరల్‌ సీఐలు పి.విశ్వం, కె.విజయ బాబు, ఎస్‌ఐలు పి.రవీంద్రబాబు, కె.జగన్మోహన్‌ రావు, హెచ్‌సీలు కె.వెంకటేశ్వరరావు, జె.శ్రీనివాసరావు, ఆర్‌.సత్య నారాయణ, పీసీలు అప్సారీ బేగ్‌, శ్రీనివాసరావు, సుగుణ కుమార్‌, అనీల్‌కుమార్‌, బేగ్‌ రహమతుల్లా, రాజులను ఎస్పీ అభినందించి ప్రశంసాపత్రాలను అందజేశారు