మహిళా కమిషన్‌ చైర్‌పర్సన్‌ పదవిపై హైకోర్టులో వాడివేడిగా వాదోపవాదనలు

మహిళా కమిషన్‌ చైర్‌పర్సన్‌ పదవి నుంచి తనను తొలగిస్తూ ఈ నెల 23న ప్రభుత్వం జారీచేసిన మెమో అమలును నిలుపుదల చేయాలని కోరుతూ గజ్జల వెంకటలక్ష్మి దాఖలు చేసిన పిటిషన్‌పై గురువారం హైకోర్టులో వాదనలు ముగిశాయి. వాదనలు ముగియంతో నిర్ణయాన్ని తర్వాత వెల్లడిస్తామని న్యాయస్థానం తెలిపింది. ఈమేరకు హైకోర్టు న్యాయమూర్తి జస్టిస్‌ సత్తి సుబ్బారెడ్డి గురువారం ఉత్తర్వులు ఇచ్చారు. చైర్‌పర్సన్‌ పదవి నుంచి తనను తొలగిస్తూ ప్రభుత్వం ప్రభుత్వం తీసుకున్న నిర్ణయాన్ని సవాల్‌ చేస్తూ గజ్జల వెంకటలక్ష్మి హైకోర్టును ఆశ్రయించారు. ఈ వ్యాజ్యం గురువారం విచారణకు రాగా పిటిషనర్‌ తరఫు న్యాయవాది జడ శ్రవణ్‌కుమార్‌ వాదనలు వినిపిస్తూ... ఈ ఏడాది మార్చి 15న పిటిషనర్‌ చైర్‌పర్సన్‌గా నియమితులయ్యారని, నిబంధనల ప్రకారం నాటి నుంచి రెండేళ్లపాటు పదవిలో కొనసాగేందుకు వెసులుబాటు ఉందన్నారు.

ఏపీ ఉమెన్స్‌ కమిషన్‌ యాక్ట్‌లోని సెక్షన్‌ 6(1) ప్రకారం నియమితులైనందున పిటిషనర్‌కు రెండేళ్ల పదవీ కాలం ఉంటుందన్నారు. ఈ సందర్భంగా న్యాయమూర్తి స్పందిస్తూ పదవీకాలం పూర్తి కాకముందే వాసిరెడ్డి పద్మ చైర్‌పర్సన్‌గా రాజీనామా చేశారని గుర్తు చేశారు. ఈమె స్థానంలో పిటిషనర్‌ను చైర్మన్‌గా నియమిస్తున్నామని ప్రభుత్వ ఉత్తర్వుల్లో పేర్కొంది తప్ప పదవీకాలాన్ని ఎక్కడా పేర్కొనలేదు కదా? అని ప్రశ్నించారు. శ్రవణ్‌కుమార్‌ బదులిస్తూ ప్రభుత్వ ఉత్తర్వుల్లో టెన్యూర్‌ గురించి ప్రస్తావించనప్పటికీ, చట్టంలోని సెక్షన్‌ 6(1) ప్రకారం పిటిషనర్‌ను చైర్‌పర్సన్‌గా నియమించినందున పిటిషనర్‌కు రెండేళ్ల పదవీకాలం ఉంటుందన్నారు. దీనిపై అడ్వకేట్‌ జనరల్‌ (ఏజీ) దమ్మాలపాటి శ్రీనివాస్‌ వాదనలు వినిపిస్తూ చట్టంలోని సెక్షన్‌ 5 ప్రకారం మహిళా కమిషన్‌ చైర్‌పర్సన్‌గా నియామకం జరుగుతుందన్నారు. వాసిరెడ్డి రాజీనామాతో ఏర్పడిన ఖాళీలో వెంకటలక్ష్మిని నియమించినట్లు ప్రభుత్వ ఉత్తర్వుల్లో పేర్కొన్నారన్నారు. ఈ నేపథ్యంలో పిటిషనర్‌ పదవీకాలం ముగిసిందన్నారు. నియమాక ఉత్తర్వుల్లో సైతం తదుపరి ఉత్తర్వుల వరకు పదవిలో కొనసాగుతారని పేర్కొన్నారన్నారు. ప్రభుత్వ ఉత్తర్వుల్లో టెన్యూర్‌ గురించి ప్రస్తావించలేదన్నారు. వాసిరెడ్డి నియామకం విషయంలో ప్రభుత్వం ఇచ్చిన జీవో ప్రకారం ఈ ఏడాది ఆగస్టు 25తో పిటిషనర్‌ టెన్యూర్‌ ముగిసిందన్నారు. ఇరువైపుల వాదనలు ముగియడంతో తగిన ఉత్తర్వులు జారీ చేస్తామని పేర్కొంటూ న్యాయమూర్తి నిర్ణయాన్ని వాయిదా వేశారు.