పిడుగు పడి పొలంలో పనిచేస్తున్న ఇద్దరు కూలీలు మృతి

తిరుపతి జిల్లాలో విషాదం చోటుచేసుకుంది. పిడుగుపాటుకు గురై పొలంలో పనిచేస్తున్న ఇద్దరు కూలీలు ప్రాణాలు కోల్పోయారు. తిరుపతి జిల్లా సత్యవేడు నియోజకవర్గం పిచ్చాటూరు మండలం హనుమంతపురంలో ఈ దుర్ఘటన జరిగింది. స్థానికులు చెప్తున్న వివరాల ప్రకారం.. హనుమంతపురానికి చెందిన మణి, రాము అనే ఇద్దరు కూలీలు పొలంలో పని కోసం వెళ్లారు. పొలంలోకి దిగి పని చేస్తున్న సమయంలో ఉరుములు, మెరుపులతో కూడిన వర్షం కురిసింది. భారీగా ఉరుములు, మెరుపులు వచ్చాయని.. అకస్మాత్తుగా పొలంలో పనిచేస్తున్న ఈ ఇద్దరిపై పిడుగు పడినట్లు స్థానికులు చెప్తున్నారు. దీంతో ఇద్దరూ అక్కడే కుప్పకూలిపోయారు. చుట్టుపక్కల వారు గమనించే సరికి ఇద్దరూ చనిపోయారు.

మృతుల్లో మణి వయసు 54 సంవత్సరాలు.. ఇతనికి భార్య, ముగ్గురు కుమార్తెలు ఉన్నారు. రాము వయస్సు 50 ఏళ్లు కాగా.. ఇతనికి భార్య, ఓ కుమార్తె ఉంది. కుటుంబానికి పెద్ద దిక్కుగా ఉన్న ఈ ఇద్దరూ అనుకోని రీతిలో చనిపోవటంతో.. ఆ రెండు కుటుంబాలు ఇప్పుడు దిక్కుతోచని స్థితిలో పడ్డాయి. ఉదయమే పనికి వెళ్తున్నామని చెప్పి వెళ్లిన వ్యక్తులు.. విగతజీవులుగా ఇంటికి తిరిగి రావటంతో కన్నీరుమున్నీరుగా విలపిస్తున్నారు. మరోవైపు ఒకే రోజు గ్రామంలో ఇద్దరు వ్యక్తులు ప్రమాదవశాత్త్తూ చనిపోవటంతో ఊరంతా విషాదంలో మునిగిపోయింది. కుటుంబ పెద్ద దిక్కును కోల్పోయిన ఆ రెండు కుటుంబాలను ప్రభుత్వమే ఆదుకోవాలని స్థానికులు కోరుతున్నారు.

మరోవైపు వాయుగుండం ప్రభావంతో గత కొన్నిరోజులుగా ఏపీలో విస్తారంగా వర్షాలు కురుస్తున్న సంగతి తెలిసిందే. మరీ ముఖ్యంగా రాయలసీమ, దక్షిణ కోస్తా జిల్లాల్లో రెండు, మూడు రోజుల నుంచి భారీ వర్షాలు కురుస్తున్నాయి. భారీ వర్షాలకు తోడు ఉరుములు, మెరుపులతో కూడిన పిడుగులు పడే అవకాశం ఉందని ఏపీ విపత్తుల నిర్వహణ సంస్థ సైతం హెచ్చరిస్తూ వస్తోంది. పొలాల్లో పనిచేసే రైతులు, కూలీలు, పశువుల కాపర్లు అప్రమత్తంగా ఉండాలని హెచ్చరిస్తోంది. అలాగే కరెంట్ స్తంభాలు, కల్వర్టులకు దూరంగా ఉండాలని ఏపీ విపత్తుల నిర్వహణ సంస్థ సూచనలు చేస్తోంది.