పోలీసుల మెడకు లారెన్స్ బిష్ణోయ్ ఇంటర్వ్యూ.. ఎస్పీ, డీఎస్పీ సహా ఏడుగురికి షాక్

జైల్లో ఉన్న గ్యాంగ్‌స్టర్‌ లారెన్స్‌ బిష్ణోయ్‌ మీడియా సంస్థకు ఇచ్చిన ఇంటర్వ్యూ పోలీసుల మెడకు చుట్టుకుంది. దీనిని తీవ్రంగా పరిగణించిన పంజాబ్ ప్రభుత్వం చర్యలు చేపట్టింది. ఈ వివాదంలో ఏడుగురు పోలీస్ అధికారులను సస్పెండ్ చేసింది. విధినిర్వహణలో నిర్లక్ష్యంగా వ్యహరించారని పేర్కొంటూ ఎస్పీ, డీఎస్పీ సహా ముగ్గురు ఎస్‌.ఐ.లు, అసిస్టెంట్‌ ఎస్‌.ఐ., హెడ్‌ కానిస్టేబుల్‌‌ను విధుల నుంచి తప్పించింది. కస్టడీలో ఉన్నప్పుడు లారెన్స్‌ బిష్ణోయ్ రెండుసార్లు మీడియాకు ఇంటర్వ్యూ ఇచ్చారని ప్రత్యేక దర్యాప్తు బృందం(సిట్‌) గుర్తించింది.

గతేడాది మార్చిలో స్థానికంగా ఓ టీవీ ఛానల్‌లో లారెన్స్‌ ఇంటర్వ్యూలు ప్రసారమయ్యాయి. ఈ వ్యవహారంపై దర్యాప్తునకు పంజాబ్-హరియాణా హైకోర్టు సిట్‌ను నియమించింది. 2022 సెప్టెంబరు 3, 4 తేదీలో పంజాబ్‌లోని ఖరార్ సీఐఏ పోలీసుల కస్టడీలో ఉన్నప్పుడు వీడియో కాన్ఫరెన్స్‌ ద్వారా ఒక ఇంటర్వ్యూ ఇచ్చాడని, రాజస్థాన్‌లోని సెంట్రల్‌ జైలులో ఉన్న సమయంలో మరొక ఇంటర్వ్యూ జరిగిందని సిట్‌ తేల్చింది. ఈ ఇంటర్వ్యూ రెండు భాగాలుగా గత ఏడాది మార్చిలో ప్రసారమైనట్లు సిట్‌ ధ్రువీకరించింది. దీంతో పంజాబ్ ప్రభుత్వం చర్యలకు ఉపక్రమించింది.

ఎస్పీ గుర్షేర్ సింగ్, డీఎస్పీ సమీర్ వనీత్, ఖరార్ పోలీస్ స్టేషన్ ఎస్ఐలు రీనా, జగత్పాల్ జంగ్నూ, షాగన్‌జిత్ సింగ్, హెడ్ కానిస్టేబుల్ ఓమ్ ప్రకాశ్‌లను సస్పెండ్ చేస్తూ పంజాబ్ హోం శాఖ సెక్రెటరీ గుర్‌కిరత్ కిర్పాల్ సింగ్ ఉత్తర్వులు జారీచేశారు. పంజాబీ సింగర్, కాంగ్రెస్ నేత సిద్ధూ మూసేవాలా హత్య, రాజ్‌పుత్ కర్నిసేన చీఫ్ హత్య కేసులో లారెన్స్‌ బిష్ణోయ్‌ నిందితుడిగా ఉన్నాడు. ఇక, పంజాబ్‌లోని మొహాలీలో 13 ఏళ్ల కిందట ఓ విద్యార్ధిపై దాడి కేసులో లారెన్స్ బిష్ణోయ్‌కు ఊరట లభించింది.

ఇటీవల బాలీవుడ్ నటుడు సల్మాన్ ఖాన్ స్నేహితుడు, మహారాష్ట్ర మాజీ మంత్రి, ఎన్సీపీ నేత బాబా సిద్దిఖీని లారెన్స్ బిష్ణోయ్ గ్యాంగ్ హత్య చేసిన విషయం తెలిసిందే. అలాగే, సల్మాన్ ఖాన్ నివాసం వద్ద కూడా ఈ ముఠాకు చెందిన ఇద్దరు కాల్పులకు పాల్పడ్డారు. అతడ్ని కూడా చంపుతామని బెదిరింపులకు దిగుతున్నారు. సల్మాన్ ఖాన్‌తో ఉన్న సన్నిహిత సంబంధాల వల్లనే బాబా సిద్దిఖీని హత్యచేసినట్టు లారెన్స్ బిష్ణోయ్ గ్యాంగ్ ప్రకటించింది. ప్రస్తుతం లారెన్స్ బిష్ణోయ్ అహ్మదాబాద్‌లోని సబర్మతి జైల్లో ఉన్న విషయం తెలిసిందే. ఇక, లారెన్స్‌ బిష్ణోయ్‌ సోదరుడు అన్మోల్‌ బిష్ణోయ్‌ను కూడా జాతీయ దర్యాప్తు సంస్థ (ఎన్‌ఐఏ) మోస్ట్‌ వాంటెడ్‌ లిస్ట్‌లో చేర్చింది. అలాగే అన్మోల్‌ను పట్టించిన వారికి రూ. 10 లక్షల రివార్డును కూడా ప్రకటించింది.