రైలు ప్రయాణంలో ఆ సమస్యకు చెక్.. దక్షిణ మధ్య రైల్వే కీలక నిర్ణయం

పండుగ సమయం కావటంతో ఊర్లకు వెళ్లేవారితో రైల్వే స్టేషన్లు, బస్టాండులు కిటకిటలాడుతున్నాయి. దీపావళి సందర్భంగా ఊర్లకు వెళ్లేవారితో ముఖ్యంగా రైళ్లన్నీ నిండిపోతున్నాయి. రిజర్వేషన్ బోగీలలో సీట్ల కోసం చాంతాడంత వెయిటింగ్ లిస్టులు కనిపిస్తున్న పరిస్థితి. ఇక జనరల్ బోగీల పరిస్థితి అయితే చెప్పనక్కర్లేదు. రైళ్లోకి ఎక్కాలంటే ఓ సాహసమే చేయాల్సి వస్తోంది. రైలు వచ్చీ రాగానే.. బోగీల్లోకి ఎక్కేందుకు జనం మధ్య తోపులాటలు సర్వసాధారణైపోయాయి. మరీ ఈ మధ్య కాలంలో అయితే ట్రైన్ రన్ని్ంగ్‌లో ఉండగానే యువత.. జనరల్ బోగీల్లోకి ముందే ఎక్కేందుకు పోటీపడుతున్నారు. సీట్లు కాదు కదా.. జనరల్ బోగీల్లో నిల్చోడానికి కూడా ఖాళీ ఉండని పరిస్థితి. దీంతో ముందుగానే లోపలికి ప్రవేశించి సీట్లు సంపాదించాలనేది వారి ప్రయత్నం. ఈ క్రమంలోనే కొన్నిచోట్ల ప్రమాదాలు కూడా జరుగుతున్నాయి.

అయితే ఇలాంటి పరిస్థితికి అడ్డుకట్ట వేసేందుకు దక్షిణ మధ్య రైల్వే కీలక నిర్ణయం తీసుకుంది. రైలు ప్రయాణికులకు సౌకర్యవంతమైన, సురక్షితమైన ప్రయాణాన్ని అందించేందుకు ఎప్పటికప్పుడు చర్యలు తీసుకునే రైల్వే.. పండుగల సీజన్ కావటంతో రద్దీ నియంత్రణకు ప్రత్యేక చర్యలు తీసుకుంటోంది. అందులో భాగంగానే రైళ్లల్లో జనరల్ బోగీల్లోకి ఎక్కే ప్రయాణికుల కోసం రైల్వే స్టేషన్లలో ప్లాట్‌ఫాంలపై క్యూలైన్ విధానాన్ని అమలు చేయాలని నిర్ణయించింది. ప్రయాణికుల రద్దీ ఎక్కువగా ఉండే రైల్వే స్టేషన్లలో జనరల్ బోగీలు ఆగే చోట ఈ విధానం అమలు చేస్తారు.

ఈ విధానంలో భాగంగా రైలు వచ్చే సమయంలో జనరల్ బోగీలు ఆగే చోట ప్లాట్‌ఫాంలపై క్యూలైన్‌లు ఏర్పాటు చేస్తారు. ప్రయాణికులు లైన్‌లో నిల్చొని తమ వంతు వచ్చినప్పుడు రైలు ఎక్కాల్సి ఉంటుంది. ఈ విధానం ద్వారా తోపులాటలు ఉండవని.. ప్రశాంతంగా రైలు ఎక్కేందుకు వీలువుతుందని అధికారులు చెప్తున్నారు. ఇప్పటికే విజయవాడ నుంచి బయలుదేరే పలు రైళ్లకు ఈ విధానాన్ని అమలు చేస్తున్నారు దక్షిణ మధ్య రైల్వే అధికారులు. పండుగల సీజన్ కావటంతో రైల్వే స్టేషన్లలో రద్దీ ఉంటోందని.. జనరల్‌ బోగీల్లో ఎక్కే క్రమంలో ప్రయాణికుల మధ్య వాగ్వాదం, తోపులాటలు జరుగుతున్నాయని రైల్వే సిబ్బంది చెప్తున్నారు. ఈ విధానం అమలు చేయడం ద్వారా అలాంటి పరిస్థితులకు తావులేకుండా ఈ ఏర్పాట్లు చేసినట్లు చెబుతున్నారు. అటు ప్రయాణికుల నుంచి కూడా దీనిపై హర్షం వ్యక్తమవుతోంది.