కరెంట్ బిల్లులో సర్దుబాటు భారం.. యూనిట్‌కు ఎంతంటే

ఏపీ ప్రజలకు షాకింగ్ న్యూస్.. వచ్చే నెల (నవంబర్) నుంచి ఆంధ్రప్రదేశ్‌లో కరెంట్ ఛార్జీలు పెరిగే అవకాశాలు కనిపిస్తున్నాయి. ప్రజల నుంచి ఇంధన సర్దుబాటు ఛార్జీలు (ట్రూ అప్ ఛార్జీలు) వసూలు చేసుకునేందుకు ఆంధ్రప్రదేశ్ విద్యుత్ నియంత్రణ మండలి.. విద్యుత్ డిస్కంలకు ఇటీవల అనుమతి ఇచ్చింది. నవంబర్ నెల నుంచి 15 నెలల పాటు వినియోగదారుల నుంచి సర్దుబాటు ఛార్జీలను వసూలు చేసుకునేందుకు ఏపీఈఆర్‌సీ అనుమతి ఇచ్చింది. దీంతో వచ్చే నెల నుంచి కరెంట్ బిల్లులపై ఆ మేరకు అధిక భారం పడే అవకాశం ఉంది. ఏపీఈఆర్‌సీ అనుమతి నేపథ్యంలో 2026 జనవరి వరకూ డిస్కంలు కరెంట్ బిల్లులలో ట్రూఅప్ ఛార్జీలను వసూలు చేయనున్నాయి.

2022-23 ఆర్థిక సంవత్సరంలో వినియోగించుకున్న విద్యుత్‌కు ఇప్పుడు ట్రూఅప్ ఛార్జీలు వసూలు చేయనున్నారు. 2022-23లో అధిక ధరకు విద్యుత్‌ కొనడంతో రూ.6,072.86 కోట్ల భారం పడింది. అయితే ఇప్పుడు ఆ భారాన్ని సర్దుబాటు ఛార్జీల రూపంలో ప్రజల నుంచి వసూలు చేసేందుకు ఏపీఈఆర్‌సీ అనుమతి ఇచ్చింది. దీంతో నవంబర్ నుంచి యూనిట్‌కు రూ.1.21 మేర ట్రూఅప్ ఛార్జీలు అదనంగా వసూలు చేయనున్నారు. 2026 జనవరి 26 వరకూ ఈ సర్దుబాటు ఛార్జీలను వసూలు చేయనున్నారు.

అయితే విద్యుత్ సర్దుబాటు ఛార్జీల పాపం.. మీదంటే మీదంటూ అధికార విపక్షాలు పరస్పరం ఆరోపణలు గుప్పించుకుంటున్నాయి. కరెంట్ ఛార్జీలు పెంచడమేనా దీపావళికి ప్రజలకు ఇస్తున్న కానుక అంటూ వైసీపీ పార్టీ, అధినేత వైఎస్ జగన్ ప్రశ్నిస్తున్నారు. కరెంట్ ఛార్జీలు పెంచమంటూ అధికారంలోకి వచ్చిన టీడీపీ కూటమి సర్కారు.. ప్రభుత్వంలోకి వచ్చిన నాలుగు నెలలకే ప్రజలపై విద్యుత్ ఛార్జీల భారం మోపుతోందని వైసీపీ విమర్శిస్తోంది. కరెంట్ ఛార్జీలు పెంచమని.. అవసరమైతే 30 శాతం తగ్గిస్తామని ఎన్నికల ప్రచారంలో ఇచ్చిన హామీ ఏమైందంటూ వైఎస్ జగన్ ప్రభుత్వాన్ని, సీఎం చంద్రబాబును నిలదీస్తున్నారు. కరెంట్ ఛార్జీలు పెంచమని చెప్పి.. ఇప్పుడు రూ.6,072.86 కోట్ల భారం వేయడం భావ్యమేనా అని వైఎస్ జగన్ ప్రశ్నించారు.

అయితే వైఎస్ జగన్ ఆరోపణలకు, వైసీపీ విమర్శలకు ప్రభుత్వం కౌంటరిస్తోంది. 2014 రాష్ట్ర విభజన తర్వాత ఏపీని టీడీపీ ప్రభుత్వం విద్యుత్ మిగులు రాష్ట్రంగా మార్చిందని.. కానీ వైసీపీ ఐదేళ్ల పాలనలో విద్యుత్ వ్యవస్థను దెబ్బతీశారని ఆరోపిస్తోంది. 2014-19 మధ్యలో విద్యుత్ కొనుగోలు కోసం అనేక ఒప్పందాలు చేసుకున్నారని.. యూనిట్ రూ.4.59 పైసలుకు కొనుగోలు చేసేలా ఒప్పందాలు జరిగాయని చెప్తోంది. అయితే 2019లో అధికారంలోకి వచ్చిన వైఎస్ జగన్.. విద్యుత్ కొనుగోలు ఒప్పందాలను రద్దుచేసినట్లు తెలిపింది. యూనిట్ 3 నుంచి 4 రూపాయలకు కొనుగోలు చేయాల్సిన విద్యుత్‌ను అధిక ధరలకు కొంటున్నారంటూ విద్యుత్ ఒప్పందాలను రద్దు చేశారని.. బహిరంగ మార్కెట్ నుంచి ఎడాపెడా అధిక ధరలకు కొనుగోలు చేశారని చెప్తోంది.

వైసీపీ హయాంలో విద్యుత్‌ రంగంలో చేసిన పాపాలే ఇప్పుడు ఇంధన సర్దుబాటు ఛార్జీల రూపంలో భారంగా మారాయని మంత్రి గొట్టిపాటి రవికుమార్‌ విమర్శించారు. ట్రూఅప్ ఛార్జీల వసూళ్ల కోసం డిస్కంలు రెండేళ్ల కిందటే ఏపీ ఈఆర్‌సీకి ప్రతిపాదనలు చేశాయని.. అయితే 2024 ఎన్నికల సమయంలో వీటిని వసూలు చేస్తే, వ్యతిరేకత వస్తుందని వాయిదా వేశారన్నారు. అదే కమిషన్ ఇప్పుడు సర్దుబాటు ఛార్జీల వసూలుకు అనుమతి ఇచ్చిందని తెలిపారు. వైఎస్ జగన్ తీసుకున్న తప్పుడు నిర్ణయాలతో ప్రజలు సర్దుబాటు ఛార్జీలు కట్టాల్సి వస్తోందన్న గొట్టిపాటి రవికుమార్.. 2023-24 సంవత్సరానికి మరో రూ.11,826 కోట్ల భారం ప్రజలపై పడుతుందని తెలిపారు. మొత్తంగా వారు మీద వీరు, వీరు మీద వారు ఆరోపణలు చేసుకుంటున్నప్పటికీ అంతిమంగా ప్రజలపై భారం పడే అవకాశాలు ఉన్నాయి.