సిబ్బంది అప్రమత్తతతో..ఏపీ మంత్రి సుభాష్‌కు తప్పిన ప్రమాదం

ఆంధ్రప్రదేశ్ కార్మికశాఖ మంత్రి వాసంశెట్టి సుభాష్‌కు కొద్దిలో ప్రమాదం తప్పింది. కాకినాడ జిల్లా రౌతులపూడి మండలంలోని ఎన్‌ఎన్‌ పట్నం గ్రామంలో జరిగిన ఓ కార్యక్రమానికి వాసంశెట్టి సుభాష్ మంగళవారం హాజరయ్యారు. గ్రామంలోని శెట్టిబలిజలు దొమ్మేటి వెంకటరెడ్డి విగ్రహ ఆవిష్కరణ కార్యక్రమం ఏర్పాటు చేశారు. ఈ కార్యక్రమానికి రావాల్సిందిగా ఆహ్వానించడంతో మంత్రి వాసంశెట్టి సుభాష్, ప్రత్తిపాడు ఎమ్మెల్యే సత్యప్రభ హాజరయ్యారు. అయితే కార్యక్రమంలో భాగంగా నేతలు ప్రసంగిస్తున్న సమయంలో ఒక్కసారిగా వేదిక ఒకవైపు ఒరిగిపోయింది. దీంతో మంత్రి వాసంశెట్టి సుభాష్ కింద పడిపోబోయారు. అయితే పక్కనే ఉన్న భద్రతా సిబ్బంది, అనుచరులు వెంటనే అప్రమత్తమై ఆయనను పట్టుకున్నారు. దీంతో ప్రమాదం తప్పింది.

అయితే ఒక్కసారిగా ఎక్కువ మంది వేదికపైకి చేరుకోవటంతోనే ఈ ప్రమాదం జరిగింది. పరిమితికి మించి వేదికపైకి ఎక్కడంతో వేదిక ఒరిగిపోయింది. అయితే సిబ్బంది అప్రమత్తతతో మంత్రి వాసంశెట్టి సుభాష్‌కు ప్రమాదం తప్పింది. ఈ ఘటన తర్వాత కార్యక్రమాన్ని మరో వేదిక మీదకు మార్చారు. కార్యక్రమాన్ని అక్కడే నిర్వహించారు. అనంతరం ఎలాంటి ఇబ్బంది లేకుండా కార్యక్రమం పూర్తి కావటంతో నిర్వాహకులు ఊపిరి పీల్చుకున్నారు.

పశ్చిమగోదావరి జిల్లా నల్లజర్లలో ప్రమాదం

మరోవైపు పశ్చిమగోదావరి జిల్లా నల్లజర్లలో జరిగిన రోడ్డు ప్రమాదంలో ఓ వ్యక్తి చనిపోయాడు. ముందు వెళ్తున్న కంటైనర్‌ను వెనకనుంచి కారు ఢీకొంది. ఈ ప్రమాదంలో దుగ్గంపూడి వేమారెడ్డి అనే వ్యక్తి అక్కడికక్కడే చనిపోయాడు. సాయినాథ్‌రెడ్డి అనే వ్యక్తికి తీవ్రగాయాలు అయ్యాయి.పల్నాడు జిల్లా నరసరావుపేట‌కు చెందిన దుగ్గంపూడి వేమారెడ్డి తన స్వగ్రామం నుంచి కారులో సాయినాథ్‌రెడ్డి, మాధవరెడ్డిలతో కలిసి తాళ్లపూడికి వచ్చారు.

పని ముగించుకున్న అనంతరం వేమారెడ్డి, సాయినాథ్ రెడ్డి తిరుగు పయనమయ్యారు. అయితే దూబచర్ల జాతీయ రహదారిపై రాజమండ్రి నుంచి ఏలూరువైపు వెళ్తున్న కంటైనర్‌ను వీరు ప్రయాణిస్తున్న కారు ఢీకొట్టింది. దీంతో వేమారెడ్డి ఘటనాస్థలంలోనే ప్రాణాలు కోల్పోగా.. సాయినాథ్‌రెడ్డికి తీవ్ర గాయాలయ్యాయి.