ఆలయ వేడుకలో పేలిన బాణాసంచా.. 150 మందికి గాయాలు, 8 మంది పరిస్థితి విషమం

దీపావళి పండుగ నేపథ్యంలో దేశవ్యాప్తంగా అనేక చోట్లు పేలుళ్ల ఘటనలు చోటుచేసుకుంటున్నాయి. తాజాగా, కేరళలోని కాసర్‌గఢ్‌లో భారీ దుర్ఘటన చోటుచేసుకుంది. సోమవారం రాత్రి నీలేశ్వరం వీరకావు ఆలయం వద్ద వేడుకలు జరుగుతుండగా సమీపాన ఉండే బాణాసంచా దుకాణంలో పేలుడు సంభవించింది. ఈ ఘటనలో కనీసం 154 మంది గాయపడగా.. వీరిలో అనేక మందికి తీవ్ర గాయాలైనట్టు తెలుస్తోంది. తీవ్రంగా గాయపడిన 8 మంది పరిస్థితి విషమంగా ఉందని సమాచారం. వేడుకను పురస్కరించుకుని భక్తులు పెద్ద సంఖ్యలో గుమిగూడిన సమయంలో ఈ ప్రమాదం జరిగింది. దీనికి సంబంధించిన వీడియో ప్రస్తుతం వైరల్ అవుతోంది. తొలుత బాణాసంచా దుకాణంలో మంటలు చెలరేగి.. కొన్ని సెకన్ల తర్వాత ఆలయ ఉత్సవ వేదికకు వ్యాపించాయి.

ఈ ఘటన గురించి సమాచారం అందుకున్న అగ్నిమాపక సిబ్బంది, పోలీసులు హుటాహుటిన అక్కడకు చేరుకున్నారు. మంటలు అదుపుచేసి.. క్షతగాత్రులను చికిత్స కోసం కాసర్‌గఢ్, మంగళూరు ఆసుపత్రికి తరలించారు. ఆలయానికి సమీపంలోనే బాణా సంచా దుకాణం ఉన్నట్టు పోలీసులు తెలిపారు. సోమవారం అర్ధరాత్రి తర్వాత ఈ ఘటన చోటుచేసుకుంది. ఘటనా స్థలికి చేరుకున్న జిల్లా కలెక్టర్, ఇతర ఉన్నతాధికారులు సహాయక చర్యలను పర్యవేక్షిస్తున్నారు. కాసర్‌గడ్ జిల్లా ఆసుపత్రిలో 31 మంది, ప్రయివేట్ ఆసుపత్రుల్లో మరో 71 మందికి చికిత్స కొనసాగుతోంది. మరికొందర్ని సమీపంలోని మంగళూరుకు తరలించారు. నీలేశ్వర్ తాలూకా ఆసుపత్రిలో 11 మది, కన్నూర్ కిమ్స్‌లో ఐదుగురికి చికిత్స కొనసాగుతోంది. మిగతావారిని మంగళూరు, కన్నూరు పెరియారమ్ మెడికల్ కాలేజీలో చికిత్స పొందుతున్నారు.

కాగా, వీరకావు ఆలయంలో జరుగుతోన్న థెయ్యమ్ వార్షిక ఉత్సవానికి మహిళలు, చిన్నారుల సహా భారీ సంఖ్యలో భక్తులు హాజరయ్యారు. డప్పులు, వాయిద్యాలతో ఉత్సవం సాగుతున్న సమయంలోనే ఒక్కసారిగా ఊహించని విధంగా పేలుడు చోటుచేసుకుంది. ఉత్సవాలకు భద్రపరిచిన బాణాసంచాా గదిలో పేలుడు సమయంలో రికార్డయిన వీడియోలు భయంకరంగా ఉన్నాయి. థెయ్యమ్ ఉత్సవంలో మునిగిపోయిన భక్తులు.. ఆ పక్కనే చిన్నగా మొదలైన బాణాసంచా పేలుడును తొలుత గమనించారు. తర్వాత కొద్ది సేపటికే భారీ శబ్దంతో విస్పోటనం జరిగి.. పైకప్పు ఎగిరిపడింది. ఈ ఘటనపై కేసు నమోదుచేసిన పోలీసులు.. దర్యాప్తు చేపట్టారు. నిర్లక్ష్యం వల్ల జరిగిందా? ఏదైనా కుట్ర కోణం ఉందా? అనేది దర్యాప్తులో వెల్లడవుతుందని పోలీసులు తెలిపారు.

ఇదిలా ఉండగా, హైదరాబాద్‌లోనూ వరుసగా రెండు బాణాసంచా ప్రమాదాలు చోటుచేసుకున్నాయి. ఆదివారం రాత్రి అబిడ్స్ వద్ద బాణాసంచా దుకాణంలో పేలుడు సంభవించి ఇద్దరు మహిళలు చనిపోయారు. ఇక, యాకుత్‌పురాలో టపాసులు పేలి భార్యాభర్తలు ప్రాణాలు కోల్పోయారు. టపాసుల వ్యాపారం చేసే ఈ కుటుంబం సోమవారం రాత్రి నిద్రలో ఉండగా ప్రమాదం జరిగింది. పండుగ కోసం పిండివంటలు చేసి.. సిలిండర్ ఆఫ్ చేయకపోవడంతో గ్యాస్ లీక్ అయి మంటలు చెలరేగి పేలుడు సంభవించింది.