ఉత్తర కొరియా అధినేత కిమ్ పిచ్చి నిర్ణయంతో ప్రమాదంలో అంతర్జాతీయ భద్రత

ఉక్రెయిన్-రష్యా మధ్య జరుగుతోన్న యుద్దంలో కీలక పరిణామం చోటుచేసుకుంది. ఈ యుద్ధంలోకి రష్యాకు మద్దతుగా ఉత్తర కొరియా తన బలగాలను రంగంలోకి దింపింది. 10 వేల మంది సైనికులను కిమ్ పంపినట్టు తాజాగా ఈ విషయాన్ని నాటో ధ్రువీకరించింది. ఇప్పటికే రష్యాలోని కొన్ని ప్రాంతాల్లో ప్యాంగాంగ్ సేనలను మోహరించినట్లు తెలిపింది. ఉక్రెయిన్ సరిహద్దుల్లోని కుర్క్స్‌ ప్రాంతంలో ఉత్తర కొరియా బలగాలను ఇప్పటికే మోహరించినట్లు నాటో సెక్రటరీ జనరల్‌ మార్క్‌ రుట్టే మీడియాకు తెలిపారు. ఉక్రెయిన్‌- రష్యా సంఘర్షణలో ఉత్తర కొరియా జోక్యం చేసుకోవడం సమంజసం కాదని.. ఇది పరిస్థితిని మరింత తీవ్రతరం చేయడమేనని ఆయన వ్యాఖ్యానించారు.

అటు, రష్యాలోకి కిమ్‌ సేనలు ఎంట్రీపై అమెరికా రక్షణ విభాగం పెంటగాన్ సైతం ధ్రువీకరించింది. ఉక్రెయిన్‌ యుద్ధంలో రష్యాకు సాయంగా పోరాటం, శిక్షణ కోసం 10 వేల మంది సైనికులను ఉత్తర కొరియా పంపిందని పెంటగాన్ అధికార ప్రతినిధి సబ్రీనా సింగ్ వెల్లడించారు. ఉక్రెయిన్‌తో తీవ్ర ప్రతిఘటన ఎదుర్కొంటున్న కుర్స్క్ ప్రాంతంలో మోహరించినట్టు తాము బలంగా నమ్ముతున్నామని సింగ్ అన్నారు. దాదాపు మూడేళ్లుగా సాగుతోన్న యుద్ధం కారణంగా ఈ ప్రాంతంలో పరిస్థితులు దిగజారాయని, ఇప్పుడు ఉత్తర కొరియా చేరడం మరింత ప్రమాదకరంగా మారుతాయని అభిప్రాయపడ్డారు.

దీనిపై అమెరికా కొద్ది రోజుల కిందటే ఆందోళన వ్యక్తం చేసింది. ఒకవేళ ఉత్తర కొరియా సైనికులు ఉక్రెయిన్‌ యుద్ధంలోకి చొరబడితే.. కచ్చితంగా వాళ్లు కూడా లక్ష్యాలుగా మారతారని హెచ్చరించింది. అంతేకాదు, కిమ్‌ సైన్యం మద్దతు తీసుకోవడం రష్యా బలహీనతను తెలియజేస్తోందని ఎద్దేవా చేసింది. ఈ క్రమంలోనే రష్యాలోకి ఉత్తర కొరియా బలగాలు ప్రవేశించడం గమనార్హం.

అటు, ఈ పరిణామాలు అంతర్జాతీయ భద్రతకు ప్రమాదకరమని దక్షిణ కొరియా అధ్యక్షుడు యూన్ సూక్ యోల్ చెప్పారు. రష్యాకు ఉత్తర కొరియా సైన్యాలు పంపడం అక్రమ సైనిక సహకారమని, తమ జాతీయ భద్రతతో పాటు అంతర్జాతీయ సమాజానికి తీవ్ర ముప్పుగా మారుతుందని అన్నారు.

సైన్యాలను పంపినట్టు వార్తలు వెలువడిన సమయంలో ఉత్తర కొరియా విదేశాంగ మంత్రి రష్యా పర్యటనకు వెళ్లడం మరింత ప్రాధాన్యత ఏర్పడింది. ఆయన పర్యటనపై ప్యాంగ్‌యాంగ్‌లోని రష్యా రాయబార కార్యాలయం స్పందిస్తూ.. ఇరు దేశాల మధ్య వ్యూహాత్మక చర్చల్లో భాగంగా జరుగుతోందని వెల్లడించింది. ఫిబ్రవరి 2022లో మొదలైన ఉక్రెయిన్, రష్యా యుద్ధంలో వేలాది మంది సైనికులు ప్రాణాలు కోల్పోయారు. ఈ సంఘర్షణ వల్ల రెండో ప్రపంచ యుద్ధం తర్వాత ఐరోపా అతిపెద్ద శరణార్ధుల సమస్యను ఎదుర్కొంటోంది.