టెకీ హత్య.. హంతకుడి ఆచూకీ చెబితే ఐదున్నర కోట్ల రివార్డు

దాదాపు పదేళ్ల కిందట జరిగిన భారత్‌కు చెందిన సాఫ్ట్‌వేర్ ఇంజినీర్ హత్య కేసులో నిందితుడి ఆచూకీ కోసం ఆస్ట్రేలియా తీవ్రంగా గాలిస్తోంది. అతడి ఆచూకీ ఇంత వరకు తెలియరాకపోవడంతో హంతుకుడి గురించి సమాచారం ఇస్తే భారీ రివార్డు అందజేయనున్నట్టు తాజాగా ప్రకటించింది. బెంగళూరులోని మైండ్ ట్రీ ఐటీ కంపెనీలో సాఫ్ట్‌వేర్ ఇంజినీర్‌గా పనిచేస్తోన్న ప్రభ అరుణ్‌కుమార్ (41) ప్రాజెక్ట్ కోసం ఆస్ట్రేలియాలోని సిడ్నీకి వెళ్లారు. అక్కడ 2015 మార్చి 7న ప్రభ హత్యకు గురయ్యారు. దుండుగులు గొంతులో కత్తితో పొడిచి దారుణంగా హత్యచేశారు. అయితే, ఈ హత్య జరిగి పదేళ్లవుతున్నా ఇప్పటి వరకు హంతకుడి ఆచూకీని అక్కడి పోలీసులు గుర్తించలేకపోయారు.

ఇది వారికి పెద్ద సవాల్‌గా మారింది. దీంతో హంతకుడి వివరాలు చెప్పిన వారికి మిలియన్‌ డాలర్లను బహుమతిగా ఇస్తామని న్యూసౌత్‌ వేల్స్‌ ప్రభుత్వం ప్రకటించింది. ఇది భారత కరెన్సీలో రూ.5.57 కోట్లకు సమానం. హత్య జరిగిన రోజున విధులు ముగించుకుని ఆఫీసు నుంచి ఇంటికి బయలుదేరిన ప్రభ.. బెంగళూరులో ఉన్న భర్తతో ఫోన్‌లో మాట్లాడుతూ వస్తోంది. ఈ సమయంలో తనను ఎవరో వెంబడించుకుని వస్తున్నట్లు గమనించిన ఆమె.. వెనక్కి తిరిగి చూసింది. ఇంతలోనే ఆమెపై దుండుగులు దాడి చేశారు. ‘కత్తి వాడు పొడిచాడు కన్నా’ అంటూ భర్తతో ఫోన్‌లో ఆమె చెప్పిన చివరి మాట ఇదే. ఆ తర్వాత ఫోన్ కట్ అయ్యింది.

సిడ్నీ నగరంలో పరమట్టా పార్క్ సమీపంలో తాను ఉండే ఇంటికి 300 మీటర్ల దూరంలోనే దుండుగులు ఆమె గొంతుకోసి హత్యచేశారు. అయితే, ఆమెను ఎవరు వెంబడించారు? ఎందుకు హత్య చేశారు? ఎవరు హత్య చేశారు? విషయాన్ని ఇప్పటి వరకు అక్కడి పోలీసులు గుర్తించలేకపోయారు. ఇపుడామెను చంపినవాడి కోసం ఆస్ట్రేలియా, భారత్‌లో గాలింపు కొనసాగుతోంది. ప్రభ ఆస్ట్రేలియాలో ఉండగా.. భర్త అరుణ్ కుమార్, కుమార్తె మేఘన ఇండియాలో ఉన్నారు. అయితే, హత్య వెనుక భర్త పాత్ర ఏమైనా ఉందా? అనే అనుమానం కూడా ఉంది. భార్య అక్కడ ఉండటంతో మరో మహిళతో అతడు సంబంధం పెట్టుకున్నాడనే ఆరోపణలు కూడా ఉన్నాయి.

హోమిసైడ్ స్క్యాడ్ కమాండర్ డ్యానీ డోహెర్టీ మాట్లాడుతూ.. ప్రభ హత్యకు గురైన సమయంలో ఆయనకు మరో యువతితో సంబంధం ఉందని ధ్రువీకరించారు. కానీ అతను మాత్రమే దర్యాప్తులో ఉన్న వ్యక్తి కాదన్నారు. ‘ప్రభను కత్తితో పొడిచి చంపిన వ్యక్తి ఎవరో గుర్తిస్తే కేసులో కొత్త విషయాలు వెలుగులోకి వస్తాయి.. ఆ సమయంలో ఆమె భర్త భారత్‌లో ఉన్నట్టు ఆధారాలు ఉన్నాయి’ అని ఆయన చెప్పారు.

కాగా, నాటి ఈ హత్య సిడ్నీలో తీవ్ర కలకలం రేపింది. పెద్ద సంఖ్యలో అక్కడి భారతీయులు బయటకు వచ్చి కొవొత్తులతో ర్యాలీ చేపట్టి ఆమెకు సంతాపం తెలిపారు. తాజాగా, న్యూసౌత్ వేల్స్ ప్రభుత్వం హంతకుడ్ని పట్టుకోడానికి రివార్డు ప్రకటించడంతో హర్షం వ్యక్తం చేస్తున్నారు. ఇది చాలా మంచి ఆలోచన అని, ఆమెకు ఇచ్చే నిజమైన నివాళి అని పవన్ లూత్రా అనే భారతీయుడు ఒకరు వ్యాఖ్యానించారు.